Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Kumbi Bayibolo Lisambizanji Weniukongwa?

 FUNDU ZAKUKUMALIYA

Yesu Khristu Ndiyu Mesiya Wakulayizgika

Yesu Khristu Ndiyu Mesiya Wakulayizgika

PAKUKHUMBA kutiwovya kuti tiziŵi Mesiya, Yehova Chiuta wanguchitiska kuti achimi anandi wo alembanga Bayibolo alembi nkhani zakupambanapambana zakukwaskana ndi kuwa, uteŵeti ndi nyifwa ya Mtaski wakulayizgika. Mauchimi ngosi nga m’Bayibolo yanga ngangufiskika mwaku Yesu Khristu. Ndipu ngakulembeka mwandondomeku  ndipuso mwauneneska. Mwakuyeruzgiyapu, tiyeni tiwoni mauchimi ngamanavi ngo ngangukambiya limu vakukwaskana ndi kuwaku kwaku Mesiya ndi wanamana waki.

Mchimi Yesaya wangukambiya limu kuti Mesiya wazamuja mphapu ya Karonga Davidi. (Yesaya 9:7) Yesu wanguwiya nadi mu mzeri waku Davidi.Mateyu 1:1, 6-17.

Mchimi waku Chiuta munyaki, zina laki Mika, wangukambiya limu kuti mwana uyu wazamuja karonga ndipu wazamuwiya ku “Betelehemu Efrata.” (Mika 5:2) Pa nyengu yo Yesu wawiyanga, ku Yisraele kwenga misumba yiŵi yo yadanikanga kuti Betelehemu. Msumba unyaki wenga pafupi ndi Nazarete ku nkhondi kwa charu cha Yuda ndipu unyaki wenga pafupi ndi Yerusalemu wa ku Yuda. Betelehemu yo wenga pafupi ndi Yerusalemu wadanikanga kuti Efrata pakwamba. Uku ndiku Yesu wanguwiya, mwakuyana ndi mo uchimi ungukambiya.Mateyu 2:1.

Uchimi unyaki wa m’Bayibolo ungukambiya limu kuti Mwana waku Chiuta wazamudanika “kutuwa mu Egipiti.” Panyengu yo wenga mwana, Yesu wangutoleke ku Egipiti. Ndipu anguweku nayu Herode wati wafwa, ndipu ivi vingufiska uchimi uwu.Hoseya 11:1; Mateyu 2:15.

Pa  peji 200, pa mutu wakuti “Uchimi,” pandandaliskika malemba ngo ngakonkhoska vinthu vakukwaskana ndi Mesiya. Kozganiskani fundu izi ndi malemba ngo nge pa mutu wakuti “Kufiskika.” Kuchita ivi kukuwovyeningi kuti mulutirizgi kugomezga kuti Mazu ngaku Chiuta ngauneneska.

Pakusanda malemba yanga, kumbukani kuti mauchimi yanga ngangulembeka kweche vyaka mahandiredi nganandi Yesu wechendawi. Yesu wangukamba kuti: “Nkhwakwenere vifiskiki vinthu vosi vakulembeke paku ini mu langulu laku Mosese, ndi mu ŵamchimi ndi mubuku la Sumu.” (Luka 24:44) Nge penipo mwawone m’Bayibolo linu, mauchimi ngosi yanga ngakufiskika.