Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Kumbi Bayibolo Lisambizanji Weniukongwa?

 MUTU 12

Kuja ndi Umoyu Wakukondweska Chiuta

Kuja ndi Umoyu Wakukondweska Chiuta
  • Kumbi mungaja wuli pa ubwezi ndi Chiuta?

  • Kumbi vo Satana wangususka vitikukwaskani wuli?

  • Ndi mijalidu niyi yo yileka kukondweska Yehova?

  • Kumbi mungachita wuli kuti muje ndi umoyu wakukondweska Chiuta?

1, 2. Konkhoskani vakuyeruzgiyapu va ŵanthu wo Yehova waŵawonanga nge abwezi ŵaki a pa mtima.

KUMBI mungasankha munthu wa mtundu wuli kuti waje mubwezi winu? Mwambula kukayika mungasankha munthu yo mungayanana nayu maŵanaŵanu, vakwanja ndipuso nkharu. Ndipu mungayanja kuja pa ubwezi ndi munthu yo we ndi mijalidu yamampha, nge kugomezgeka kweniso lisungu.

2 Chiuta wakwamba kali kusankha ŵanthu anyaki kuti aje abwezi ŵaki a pa mtima. Mwakuyeruzgiyapu, Yehova wangukamba kuti Abrahamu ndi mubwezi waki. (Yesaya 41:8; Yakobe 2:23) Chiuta wangukamba Davidi kuti ndi “munthu wakuyana ndi mtima wangu,” chifukwa chakuti wenga munthu yo Yehova wangwanja. (Machitidu 13:22) Ndipuso Yehova wawonanga mchimi Danyele nge “wakwanjiwa” waki.Danyele 9:23.

3. Nchifukwa wuli Yehova wasankha ŵanthu anyaki kuti aje abwezi ŵaki?

3 Nchifukwa wuli Yehova wawonanga Abrahamu, Davide ndi Danyele kuti ŵenga abwezi ŵaki? Iyu wangukambiya Abrahamu kuti: “Wavwiya mazu ngangu.” (Chiyambo 22:18) Mwaviyo, Yehova waja pa ubwezi ndi ŵanthu wo mwakujiyuyuwa achita vinthu vo iyu wakhumba. Chiuta wangukambiya Ayisraele kuti: “Muvwiyengi mazu ngangu, ndipu ini ndikaŵanga Chiuta winu, imwi mukaŵanga ŵanthu ŵangu.” (Yeremiya 7:23) Namwiso mukhoza kuja mubwezi waku Yehova asani mutimuvwiya.

 YEHOVA WAPASKA NTHAZI ABWEZI ŴAKI

4, 5. Kumbi Yehova walongo wuli nthazi zaki m’malu mwa ŵanthu ŵaki?

4 Aŵanaŵaniyani umampha wakuja pa ubwezi ndi Chiuta. Bayibolo likamba kuti Yehova wapenja mipata ya ‘kulongore nthazi kuti wawovyi wo mitima yawu njakufikapu pa masu paki.’ (2 Mikoka 16:9) Kumbi Yehova wangalongo wuli nthazi m’malu mwinu? Nthowa yimoza yazumbulika pa lemba la Sumu 32:8, po tiŵerenga kuti: “Ndikurunguchizgengi ndi kukusambizga nthowa yo utenere kwendamu. Ndikupangengi fundu, jisu langu liŵengi paku iwi.”

5 Mazu yanga ngakukondweska ukongwa chifukwa ngalongo chanju cho Yehova wenachu. Iyu wakupaskeningi ulongozgi wakwenere ndipuso wakuvikiriyeningi asani mutiwugwiriskiya nchitu. Chiuta wakhumba kuti imwi mupundi mayeseru ngosi ngo mungakumana nangu. (Sumu 55:22) Mwaviyo, asani muteŵete Yehova ndi mtima wosi, mukhoza kukamba mwakutuliya pasi pa mtima mazu ngo wakulemba buku la sumu wakambanga kuti: “Nyengu zosi ndiŵika Ambuya paurongo pangu, kuti nkhasukunyiskikanga cha, chifukwa we pafupi nani.” (Sumu 16:8; 63:8) Yehova wangakuwovyani nadi kuti muchitengi vinthu vakumukondweska pa umoyu winu. Kweni nge po muziŵiya, pe murwani waku Chiuta yo wangayanja kuti imwi muleki kuchita ivi.

VO SATANA WANGUSUSKA

6. Kumbi Satana wanguŵakayikiya wuli ŵanthu?

6 Mutu 11, ungukonkhoska kuti Satana Diabolo wakususka muwusu waku Chiuta. Satana wangumba mulandu Chiuta kuti wakamba boza kweniso wang’anamuwanga kuti Yehova ngwankhaza chifukwa chakuti wanguzomerezga cha kuti Adamu ndi Eva ajisankhiyengi ŵija pakati pa chamampha ndi chiheni. Adamu ndi Eva ŵati abuda ndipuso ŵana ŵawu ŵati ayamba kwandana pacharu, Satana wangukayikiya vilatu va ŵanthu wosi pakuteŵete Chiuta. Iyu wangukamba kuti, “ŵanthu ateŵete Chiuta chifukwa chakuti atimwanja cha, ndipu asani mungandipaska mpata, ndikhoza kugaruska weyosi kwaku Chiuta.” Nkhani yaku Jobu yilongo kuti ivi ndivu Satana wagomezganga. Kumbi  Jobu wenga yani, nanga wangukwaskika wuli ndi vo Satana wangususka?

7, 8. (a) Kumbi nchinthu wuli cho chinguchitiska Jobu kuja munthu wamampha ukongwa kuruska ŵanthu a mu nyengu yaki? (b) Kumbi Satana wangukayikiya wuli vilatu vaku Jobu?

7 Jobu wengaku vyaka 3,600 vajumpha. Iyu wenga munthu wamampha, chifukwa Yehova wangukamba kuti: “Mulivi mu charu wakuŵa nge ndiyu, munthu wambura kalema, ndi murunji yo watopa Chiuta ndi wakupatukaku ku uheni.” (Jobu 1:8) Jobu wakondweskanga nadi Chiuta.

8 Satana wangukamba kuti Jobu wateŵete Chiuta ndi vilatu vamampha cha. Diabolo wangukambiya Yehova kuti: “Asi mukumuzingizga [Jobu] ndi lisitu, ndi nyumba yaki ndi vosi vo we navu? Mwatumbika mlimu wa manja ngaki ndipu viŵetu vaki vayandana mu charu. Kweni tambasuwani janja linu sonu ndi kukwaska vosi vo we navu, ndipu mukawonanga kuti wakamutukaninga pa masu pinu.”Jobu 1:10, 11.

9. Kumbi Yehova wangumuka wuli vo Satana wangususka, ndipu nchifukwa wuli wanguchita viyo?

9 Satana wangukamba kuti Jobu wateŵetiyanga Chiuta chifukwa cha vinthu vo wangumupaska. Diabolo wangukamba so kuti asani Jobu wangayeseka, wakhoza kuleka kuteŵete Chiuta. Kumbi Yehova wangumumuka wuli Satana? Pakuti nkhani iyi yakwaskanga vilatu vaku Jobu, Yehova wanguzomerezga Satana kwesa Jobu. Nthowa yeniyi ndiyu yatingi yilongongi umampha ukongwa kuti Jobu watanja nadi Chiuta pamwenga cha.

KWESEKA KWAKU JOBU

10. Kumbi Jobu wangukumana ndi mayeseru nanga, ndipu wanguchita wuli?

10 Mwambula kutaya nyengu, Satana wangwesa Jobu munthowa zakupambanapambana. Pakwamba viŵetu vosi vaku Jobu vingubika, ndipu anchitu ŵaki angubayika. Ivi vinguchitiska kuti waje pausauchi. Soka linyaki so linguchitika pa nyengu yo chimphepu chingubaya ŵana 10 aku Jobu. Kweni chinanga kuti vosi ivi vinguchitika, “Jobu kuti wangunanga cha pamwenga ku mutonyora Chiuta.”Jobu 1:22.

11. (a) Kumbi nchinthu wuli so cho Satana wangukamba chakukwaskana ndi Jobu, nanga Yehova wangumuka wuli? (b) Kumbi Jobu wanguchita wuli ndi nthenda yakuŵaŵa yo wenga nayu?

 11 Satana wanguthera mbwenu cha. Iyu watenere kuti wanguŵanaŵana kuti chinanga kuti Jobu wangakunthiyapu nyifwa ya ŵana ŵaki, anchitu ŵaki kweniso kumala kwa katundu waki, kweni asani wangatama wangakho cha, wakhoza kugarukiya Chiuta. Yehova wanguzomerezga Satana kuti wasuzgi Jobu ndi nthenda yiheni, kweniso yakuŵaŵa ukongwa. Kweni Jobu wangutaya cha chigomezgu chaki mwaku Chiuta. M’malu mwaki wangukamba mwanthazi kuti: “Kuti ndingataya chigomezgu changu cha mpaka ku nyifwa.”Jobu 27:5.

Jobu wangulonde mphotu chifukwa cha kugomezgeka kwaki

12. Kumbi vo Jobu wanguchita vingulongo wuli kuti Satana ngwaboza?

12 Jobu waziŵanga cha kuti Satana ndiyu wachitiskanga masuzgu ngo iyu wakumananga nangu. Chifukwa chakuti waziŵanga chechosi cha chakukwaskana ndi vo Diabolo wachitanga, Jobu waŵanaŵananga kuti Chiuta ndiyu wachitiska kuti iyu wakumani ndi masuzgu. (Jobu 6:4; 16:11-14) Kweni ndipu wuli, wangusunga uzirima waki kwaku Yehova. Chifukwa chakugomezgeka kwaku Jobu, vo Satana wangukamba kuti Jobu wateŵete Chiuta chifukwa cha mbunu, vinguwoneka kuti venga vaboza.

13. Nchinthu wuli cho chinguchitika chifukwa chakuti Jobu wenga wakugomezgeka kwaku Chiuta?

13 Kugomezgeka kwaku Jobu kunguchitiska kuti Yehova wamuki mwanthazi vo Satana wangususka mwamtonyoru. Jobu wenga mubwezi waku Yehova wa pamtima ndipu Chiuta wangumutumbika chifukwa chakugomezgeka kwaki.Jobu 42:12-17.

MO IMWI MUKWASKIKIYA NDI NKHANI IYI

14, 15. Kumbi nchifukwa wuli tingakamba kuti vo Satana wangususka Jobu vikwaska mtundu wosi wa ŵanthu?

14 Nkhani yakusunga uzirima kwaku Chiuta yo Satana wangwambiska yakwaskanga Jobu pe cha. Imwi so namwi yitikukwaskani. Ukaboni wakuti namwi mukwaskika uwoneka umampha pa lemba la Nthanthi 27:11 po patiti: “Uŵi wa zeru, wamwana wangu, ndipu ukondwereski mtima wangu, alinga ndimuki mweniyo watindichenya.” Mazu yanga ngo ngakulembeka  vyaka vinandi Jobu wati wafwa, ngalongo kuti Satana weche kunyoza Chiuta ndi kukayikiya ateŵeti Ŵaki. Asani tichita vinthu vakukondweska Yehova, ndikwesa titovya kumuka maboza ngaku Satana ndipuso tikondweska mtima waku Chiuta. Kumbi fundu iyi yitikukondweskani cha? Kumbi vingaŵa vakukondweska cha kuti namwi muwovyi kumuka maboza ngaku Diabolo, chinanga kuti mukhumbikengi kusintha vinthu vinyaki pa umoyu winu?

15 Wonani vo Satana wangukamba: “Vosi vo munthu we navu wakapaskanga kutaska umoyu waki.” (Jobu 2:4) Pakukamba kuti “munthu,” Satana wangulongole limu kuti wasuskanga Jobu pe cha, kweni wasuskanga mtundu wosi wa ŵanthu. Fundu iyi njakukhumbika ukongwa. Satana wakamba kuti mungaja azirima cha kwaku Chiuta. Satana wangakondwa ukongwa kukuwonani kuti mwaleka kuvwiya Chiuta ndipuso mwaleka kwenda munthowa zamampha asani mwakumana ndi masuzgu Kumbi Satana wachita wuli ivi?

16. (a) Kumbi Satana wagwiriskiya nchitu nthowa nizi kuti wapatuski ŵanthu kwaku Chiuta? (b) Kumbi Diabolo wangagwiriskiya wuli nthowa izi pakulimbana namwi?

16 Nge mo tingusambiriya mu Mutu 10, Satana wagwiriskiya nchitu nthowa zakupambanapambana pakukhumba kupatuska ŵanthu kwaku Chiuta. Kweniso iyu watiŵayukiya “uli ndi nkharamu yakukoroma, wayingayinga ndi kupenja mweniyo wakamphi [pamwenga kumeza].” (1 Petro 5:8) Pa chifukwa ichi, mukhoza kuwona fuzi yaku Satana asani abali ŵinu, abwezi ŵinu pamwenga ŵanthu anyaki atikunenani ndi chilatu chakuti muleki kusambira Bayibolo ndi kugwiriskiya nchitu vo musambira. * (Yohane 15:19, 20) Kweniso Satana ‘walutirizga kujisambuska kuŵa mungelu wa ukweru.’ (2 Ŵakorinte 11:14) Diabolo wangagwiriskiya nchitu nthowa zakusuzga kuziŵanika kuti wakulandizgeni  ndipuso kuti muleki kwenda mu nthowa yaku Chiuta. Iyu wangakhoza so kukugongoweskani mwakukuchitiskani kujivwa kuti mwe ambula kwenere kukondweska Chiuta. (Nthanthi 24:10) Kwali Satana wachita vinthu nge “nkharamu yakukoroma” pamwenga nge “mungelu wa ukweru,” iyu we ndi chilatu chimoza chakukususkiyani, ndipu chilatu ichi nchakuti: Mulekengi kuteŵete Chiuta asani mwakumana ndi mayeseru. Kumbi mungamuka wuli boza ili ndi kulongo kuti musunga uzirima pamasu paku Chiuta nge mo wanguchitiya Jobu?

KUVWIYA MARANGU NGAKU YEHOVA

17. Kumbi chifukwa chikulu chakuvwiya marangu ngaku Yehova ndi nichi?

17 Asani muja ndi umoyu wakukondweska Chiuta, mukhoza kumuka maboza ngaku Satana. Kumbi mutenere kuchitanji? Bayibolo limuka kuti: “Mwanjengi Ambuya Chiuta winu, ndi mtima winu wosi ndi umoyu winu wose ndi nthazi zinu zose.” (Marangu 6:5) Asani chanju chinu paku Chiuta chikuwa, muŵengi ndi khumbu lakuchita vo iyu wakhumba kuti muchitengi. Wakutumika Yohane wangulemba kuti: “Chifukwa chenichi nchanju cho chaku Chiuta, kuti tisungi marangu ngaki.” Asani mutanja Yehova ndi mtima winu wosi musaniyengi kuti “marangu ngaki ngo kuti ngazitu cha.”1 Yohane 5:3.

18, 19. (a) Kumbi nganyaki mwa marangu ngaku Yehova ndi nanga? (Wonani bokosi pa peji 122.) (b) Kumbi tiziŵa wuli kuti Chiuta watitipempha kuchita vo tingatondeka kufiska cha?

18 Kumbi marangu ngaku Yehova ndi nanga? Nganyaki mwaku ngo ngakamba va mijalidu yo tikhumbika cha kuja nayu. Mwakuyeruzgiyapu, wonani  bokosi la mutu wakuti “Kanani Vinthu vo Yehova Watinkha,” lo le pa peji 122. Pa bokosi ili musaniyengepu ndondomeku ya mijalidu yo Bayibolo likanizgiya limu. Pakwamba mukhoza kuwona kuti mijalidu yinyaki yo yalembaka njiheni viŵi cha. Kweni asani mwalunguruka pa malemba ngo ngaŵikika penipo, muwonengi kuti marangu ngaku Yehova ngazeru. Kusintha jalidu linu kungaŵa chinthu chakusuzga ukongwa pa vinthu vosi vo mungachita. Kweni kuja ndi umoyu wakukondweska Chiuta kungakuwovyani kuja ndi likondwa kweniso kukhorweskeka ukongwa pa umoyu winu. (Yesaya 48:17, 18)  Ndipu imwi mungatondeka cha kuchita ivi. Kumbi tiziŵa wuli venivi?

19 Yehova wangatipempha cha kuchita vinthu vo tingatondeka kufiska. (Marangu 30:11-14) Iyu waziŵa vo tingafiska ndi vo tingatondeka kufiska kuruska po taŵesi titijiziŵiya. (Sumu 103:14) Yehova wakhoza so kutipaska nthazi kuti timuvwiyengi. Wakutumika Paulo wangulemba kuti: “Chiuta ngwamagomezgeka, mweniyo kuti wangatayirizga imwi cha kuti mweseki kwakujumpha cho mungakunthiyapu; kweni pamoza ndi kesedu ko wapaskengi so nthowa yakupozomoskiyapu alinga kuti muziŵengi kukunthiyapu.” (1 Ŵakorinte 10:13) Yehova wakhoza  kukupaskani “nthazi yo yijumpha vinthu vosi,” kuti wakuwovyeni kukunthiyapu.2 Ŵakorinte 4:7.

KUJA NDI MIJALIDU YAKUKONDWESKA CHIUTA

20. Kumbi mutenere kuja ndi mijalidu niyi yo Chiuta watanja, ndipu nchifukwa wuli njakukhumbika?

20 Kukondweska Yehova nkhuleka kuchita vinthu vo iyu watinkhana navu pe cha. Mutenere so kwanja vinthu vo iyu watanja. (Ŵaroma 12:9) Kumbi imwi mukopeka cha ndi ŵanthu wo muyanana nawu maŵanaŵanu, vakwanja ndipuso nkharu? Ivi ndivu Yehova nayu wachita. Mwaviyo, sambirani kwanja vinthu  vo Yehova watanja. Vinyaki mwa vinthu ivi vazumbulika pa lemba la Sumu 15:1-5, po pakamba va ŵanthu wo Chiuta watanja. Ŵanthu wo Yehova watanja alongo “chipasu cha mzimu,” pa umoyu wawu. Chipasu ichi chimiya mijalidu nge ‘chanju, likondwa, chimangu, kuzizipizga, lisungu, umampha, chivwanu, kuziza, ndipuso kukunthiyapu.’Ŵagalatia 5:22, 23.

21. Kumbi nchinthu wuli cho chingakuwovyani kuti muje ndi mijalidu yo Chiuta watanja?

21 Kuŵerenga ndi kusambira Bayibolo nyengu zosi, kukuwovyeningi kuja ndi mijalidu yo Chiuta watanja. Ndipu kusambira vo Chiuta wakhumba kukuwovyeningi kuti muŵanaŵanengi vinthu vakukoliyana ndi khumbu laku Chiuta. (Yesaya 30:20, 21) Khumbiru linu lakuti mujengi ndi umoyu wakukondweska Chiuta likuwengi asani mulutirizga kwanja Yehova.

22. Kumbi nchinthu wuli cho mufiskengi kuchita asani mujengi ndi umoyu wakukondweska Chiuta?

22 Kuti muje ndi umoyu wakukondweska Yehova mukhumbika kuchita phamphu. Bayibolo likamba kuti kusintha mijalidu yinu kuyanana waka ndi kuzuwa umunthu wakali ndi kuvwala umunthu wufya. (Ŵakolose 3:9, 10) Kweni wakulemba buku la sumu wangukamba vakukwaskana ndi marangu ngaku Yehova kuti: “Mu kuvisunga mwe mphotu yikuru.” (Sumu 19:11) Namwiso muwonengi kuti kuja ndi umoyu wakukondweska Chiuta nkhwakwanduliska ukongwa. Asani muchitengi ivi mumukengi maboza ngaku Satana ndi kukondweska mtima waku Yehova.

^ ndimi 16 Ivi ving’anamuwa kuti ŵanthu wo atikususkani achita kutumika ndi Satana cha. Kweni Satana ndi chiuta wa mgonezi wunu, ndipu charu chosi chagona munthazi yaki. (2 Ŵakorinte 4:4; 1 Yohane 5:19) Mwaviyo, tiziŵa kuti mbanthu wosi cha wo aja ndi umoyu wakukondweska Chiuta ndipu anyaki akususkeningi.