Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Kumbi Bayibolo Lisambizanji Weniukongwa?

 MUTU 7

Chilindizga Cheneku cha Akwanjiwa Ŵinu wo Akutayika

Chilindizga Cheneku cha Akwanjiwa Ŵinu wo Akutayika
  • Kumbi tiziŵa wuli kuti akufwa azamuyuka nadi?

  • Kumbi Yehova watiyiwona wuli nkhani yakuyuska akufwa?

  • Kumbi mbayani wo azamuyuskika?

1-3. Kumbi ndi murwani nuyu yo watchimbizga taŵanthu tosi, nanga nchifukwa wuli kuziŵa vo Bayibolo lisambiza nkhwakujalika mtima pasi?

YERUZGIYANI kuti muthaŵa murwani wakofya ukongwa. Murwani yo ngwanthazi ukongwa ndipuso watchimbiya kuruska imwi. Muziŵa so kuti ngwankhaza chifukwa mukumuwonapu wachibaya anyinu. Chinanga wuli mutesesa kutchimbiya juŵani, kweni murwani yo we pafupi kukukoni. Pawoneka kuti palivi chechosi cho mungachita. Kweni mwamwaŵi pasanirika munthu munyaki yo wakhumba kukutaskani. Iyu ngwanthazi ukongwa kuruska murwani winu, ndipu watikusimikizgiyani kuti wakuwovyeningi. Ivi vingakujalikiskani mtima pasi.

2 Mwakuyana waka, pe murwani munyaki yo watikutchimbizgani. Taŵanthu tosi tidikiskika ndi murwani uyu. Nge mo tikusambiriya m’mutu wajumpha, Bayibolo likamba kuti nyifwa ndi murwani. Palivi weyosi yo wangathaŵa murwani uyu. Murwani uyu wato maumoyu nga akwanjiwa ŵidu anandi. Kweni Yehova ngwanthazi ukongwa kuruska nyifwa. Iyu ndi Mutaski wachanju yo walongo kali kuti wangakhoza kuthereska murwani uyu. Ndipu walayizga kuti wazamutuzgiyapu limu nyifwa, yo ndi murwani. Bayibolo lisambiza kuti “Wamawongu wakumariya kwachiwayulika ndi nyifwa.” (1 Ŵakorinte 15:26) Nkhani iyi njakukondweska ukongwa!

 3 Tiyeni tiwoni dankha mwakudumuwa mo weyosi waku isi wakwaskikiya ndi nyifwa. Kuziŵa ivi kutiwovyengi kuti tivwisi chinthu chinyaki cho chingatipaska likondwa. Wonani kuti Yehova walayizga kuti akufwa azamuja so ndi umoyu. (Yesaya 26:19) Yiwu azamuyuskika. Ichi ndichu chilindizga cho tenachu chifukwa chakuti ndivu Yehova walayizga.

ASANI WAKWANJIWA WIDU WATAYIKA

4. (a) Kumbi nchifukwa wuli vo Yesu wanguchita wakwanjiwa waki wati wafwa, vititisambiza mo Yehova wavwiya? (b) Kumbi Yesu wangupanga ubwezi wapade nuwu?

4 Kumbi pe wakwanjiwa winu weyosi yo wakutayika? Mukhoza kumala zeru chifukwa cha chitima, urwirwi ndipuso kujiwona kuti mulivi pakuko. Panyengu yangeti iyi ndipu tikhumbika kupembuzgika ndi Mazu ngaku Chiuta. (2 Ŵakorinte 1:3, 4) Bayibolo lititiwovya kuvwisa mo Yehova ndi Yesu avwiya pa nkhani yakukwaskana ndi nyifwa. Yesu, yo wayezganga Awiski mwakufikapu, waziŵanga urwirwi wo munthu watuvwa asani wafwirika. (Yohane 14:9) Panyengu yo wenga ku Yerusalemu, Yesu wayanjanga kuchicheza ndi Lazaro ndi achizi ŵaki ŵaŵi, Mariya ndi Marta wo ajanga pa msumba wapafupi wa Betaniya. Yiwu angwanjana ukongwa. Bayibolo likamba kuti: “Yesu wanguŵanja Marta, ndi muvurwa waki, ndi Lazaro.” (Yohane 11:5) Kweni nge mo tingusambiriya mu mutu wajumpha, Lazaro wangufwa.

5, 6. (a) Kumbi Yesu wanguchita wuli panyengu yo wenga ndi banja laku Lazaro limoza ndi anyawu wo aliyanga? (b) Kumbi nchifukwa wuli chitima chaku Yesu chititipaska nthazi?

5 Kumbi Yesu wanguvwa wuli mubwezi waki wati wafwa? Bayibolo likamba kuti Yesu wanguluta kuchija limoza ndi abali aku Lazaro ndi anyawu wo ŵenga pa maliru. Wati waŵawona, Yesu wanguchita chitima ukongwa. Iyu “wangukoreka chitima mu mzimu, wangudagha.” Nkhani iyi yilutirizga kuti, “Yesu wanguliya.” (Yohane 11:33, 35) Kumbi Yesu wangulongo kuti wengavi chilindizga chifukwa chakuti wanguliya? Awa. Kweniso Yesu waziŵanga kuti we pafupi kuchita chinthu chinyaki chakuziziswa. (Yohane 11:3, 4) Chinanga wuli venga viyo iyu wanguvwa urwirwi ndi chitima chifukwa cha nyifwa yaku Lazaro.

 6 Mwaviyo tingakamba kuti chitima chaku Yesu chititipaska nthazi. Chititiwovya kuziwa kuti Yesu ndi Awiski a Yehova atinkha nyifwa. Kweni Yehova Chiuta wazamutuzgapu murwani uyu. Tiyeni tiwoni vo Chiuta wanguwovya Yesu kuchita.

“LAZARO, TULIYA KUNU KUBWARU!”

7, 8. Kumbi nchifukwa wuli ŵanthu awonanga nge kuti Lazaro wangayuka so cha, nanga Yesu wanguchitanji?

7 Lazaro wanguŵikika kumphaku, ndipu Yesu wangukamba kuti atuzgepu mwa wo wenga pakhomu. Marta wangukana chifukwa chakuti ndipu pajumpha mazuŵa nganayi kutuwa po angumuŵikiya, mwaviyo Lazaro wangwamba kuvunda. (Yohane 11:39) Kweni ŵanthu awonanga kuti palivi cho chingachitika.

Ŵanthu angukondwa ukongwa Lazaro wati wayuskika.Yohane 11:38-44

8 Mwa wati watuzgikapu Yesu wangukambulizga kuti: “Lazaro, tuliya kunu kubwaru!” Kumbi nchinthu wuli cho chinguchitika? “Wakufwa yo wangutuwa.” (Yohane 11:43, 44) Kumbi mungaŵanaŵaniya likondwa lo ŵanthu ŵenga nalu? Kwali Lazaro wenga mzichi, mubali, mubwezi pamwenga mzengezgani wawu, yiwu anguziŵa kuti wafwa. Kweni panyengu iyi, ŵenga so ndi munthu mweniyo amuyanjanga. Ichi chenga chakuziziswa ukongwa. Mwambula kukayika ŵanthu anandi angumulonde Lazaro mwalikondwa. Yapa nyifwa yinguthereskeka!

Eliya wanguyuska mwana munthurumi wa choko.1 Ŵakaronga 17:17-24

9, 10. (a) Kumbi Yesu wangukamba kuti nthazi zo wanguyuskiya Lazaro Zingutuwa pani? (b) Kumbi kuŵerenga nkhani za m’Bayibolo zakukwaskana ndi chiyuka kungatiwovya wuli?

9 Yesu wangukamba kuti chakuziziswa ichi wanguchichita ndi nthazi zaki cha. Murombu laki lo wanguromba wechendayuski Lazaro, wangukamba kuti Yehova ndiyu Wangumupaska nthazi zakuyuskiya Lazaro. (Yohane 11:41, 42) Mphachakuchitika chenichi pe cha po Yehova wangugwiriskiya nchitu nthazi zaki munthowa yeniyi. Chiyuka chaku Lazaro nchimoza cha vakuziziswa 9 va ŵanthu wo anguyuskika, vo vikulembeka m’Mazu ngaku Chiuta. * Kuŵerenga ndi kusambira nkhani zenizi  nkhwakukondweska. Zititisambiza kuti Chiuta watanjiya cha, chifukwa ŵanthu wo anguyuskika ŵenga ŵana, ŵara, anthurumi, anthukazi, Ayisraele ndi ŵanthu amitundu yinyaki. Nkhani izi zakukondweska ukongwa. Mwakuyeruzgiyapu, Yesu wati wayuska ka msungwana, apapi ŵaki “ŵangurwita ndi chirwitu chikuru.” (Marko 5:42) Kukamba uneneska, Yehova wanguŵachitiska kuti akondwi ukongwa.

Wakutumika Petro wanguyuska munthukazi wachikhristu Dorka.Machitidu 9:36-42

10 Mbuneneska kuti ŵanthu wo anguyuskika ndi Yesu akufwa so. Kumbi ivi ving’anamuwa kuti kuyuska ŵanthu yaŵa kwenga kwambura chanduru? Awa. Nkhani za m’Bayibolo izi zititisimikizgiya uneneska wa vinthu vo vazamuchitika nadi ndipuso zititipaska chilindizga.

VO TISAMBIRA PA NKHANI ZA ŴANTHU WO ANGUYUSKIKA

11. Kumbi nkhani ya chiyuka chaku Lazaro yilongo wuli kuti mazu ngo nge pa Wakutaula 9:5, ngauneneska?

11 Bayibolo lisambiza kuti “ŵakufwa kuti ŵaziŵa kanthu cha.” Nkhani yaku Lazaro mbukaboni ukulu. Kumbi Lazaro wati wayuka, wanguziziswa ŵanthu mwakuŵakonkhoske mo kuchanya kuliri? Pamwenga wanguŵawofya ndi nkhani za helo wa motu? Awa, ndivu wanguchita cha. Bayibolo likambapu cha kuti Lazaro wangukonkhoska nkhani zangeti izi. Pa mazuŵa nganayi ngo wenga wakufwa, iyu ‘waziŵanga kanthu cha.’ (Wakutaula 9:5) Lazaro wangugona waka mu nyifwa.Yohane 11:11.

12. Kumbi tingasimikizga wuli kuti Lazaro wanguyuskika nadi?

12 Nkhani yaku Lazaro yititisambiza so kuti chiyuka ndi nthanu waka cha kweni chazamuŵaku nadi. Yesu wanguyuska Lazaro wumba wa ŵanthu uchiwona. Chinanga mbalongozgi a visopa, wo atinkhanga Yesu anguzomerezga kuti ivi vikuchitika nadi. Ndipu yiwu angukamba kuti: “Tichitenji? Uyu munthu [Yesu] wachita visimikizgu vinandi.” (Yohane 11:47) Ŵanthu anandi anguluta kuchiwona Lazaro yo wanguyuskika. Ivi vinguchitiska kuti ŵanthu anandi avwani mwaku Yesu. Yiwu angusimikizga kuti Yesu wangutumika ndi Chiuta chifukwa chakuwona kuti Lazaro ngwamoyu. Uwu wenga ukaboni  wanthazi ukongwa, mwakuti Ayuda anyaki wo ŵenga alongozgi avisopa akulama mtima angupangana kuti abayi Yesu ndi Lazaro.Yohane 11:53; 12:9-11.

13. Kumbi nchifukwa wuli titenere kugomezga kuti Yehova wazamuyuska akufwa?

13 Kumbi tingasuska kuti chiyuka chiliku nadi? Awa, chifukwa Yesu wangusambiza kuti “wosi ŵamu miunda” azamuyuskika. (Yohane 5:28) Yehova ndiyu Mulengi wa vamoyu vosi. Kumbi nchakusuzga kugomezga kuti iyu wazamulenga so umoyu? Kweni vosi vithemba kuti munthu yo waje mu chikumbusku chaku Yehova. Kumbi iyu wangakumbuka akwanjiwa ŵidu wo akufwa? Kuchanya kwe nyenyezi zinandi ukongwa, kweni yeyosi Chiuta wakuyipaska zina. (Yesaya 40:26) Mwakuyana waka, Yehova Chiuta wangakumbuka chechosi chakukwaskana ndi abali ŵidu wo akufwa ndipu ngwakunozgeka kuziŵapaska so umoyu.

14, 15. Mwakuyana ndi vo Jobu wangukamba, kumbi Yehova watiyiwona wuli nkhani yakuyuska akufwa?

14 Sonu kumbi Yehova watiyiwona wuli nkhani yakuyuska akufwa? Bayibolo lisambiza kuti iyu wanweka kuyuska ŵakufwa. Munthu wakugomezgeka Jobu wangufumba kuti: “Asani munthu wafwa, kumbi wakaŵanga so wamoyu?” Jobu wakambanga kuti wangalindizga mu muunda mpaka pa nyengu yo Chiuta wazakumukumbukiya. Iyu wangukambiya Yehova kuti: “Mphanyi mungudana, ndatingi ndimumukeningi, mwatingi mukhumbi nchitu ya manja nginu.”Jobu 14:13-15.

15 Aŵanaŵaniyani waka kuti Yehova ngwakunweka kuyuska ŵanthu wo akufwa! Kumbi nchakukondweska cha kuziŵa kuti Yehova ngwakukhumbisiska kuyuska akufwa? Kumbi chiyuka chamunthazi chazamuja wuli? Kumbi mbayani wo azamuyuskika ndipu azamuyukiya nunkhu?

“WOSI ŴAMU MIUNDA”

16. Kumbi akufwa azamuyuskikiya mu charu cha mtundu wuli?

16 Nkhani za m’Bayibolo zakukamba va chiyuka zititisambiza va chiyuka cho chazamuchitika kunthazi. Ŵanthu wo anguyuskika  pacharu chapasi anguja so limoza ndi akwanjiwa ŵawu. Ivi ndivu vazamuchitika pa chiyuka chakunthazi, kweni chiyuka ichi chazamuruska chakali. Nge mo tingusambiriya mu Mutu 3, chilatu chaku Chiuta nchakuti charu chosi chizije paradayisu. Pa chifukwa ichi, ŵanthu wo akufwa azamuyuskikiya mu charu chambula nkhondu, uchigeŵenga ndi matenda. Yiwu azamuja ndi mwaŵi wakuja ndi umoyu wambura kumala pacharu mwachimangu ndi likondwa.

17. Kumbi mbayani wo azamuyuskika?

17 Kumbi mbayani wo azamuyuskika? Yesu wanguti: “Wosi ŵamu miunda ŵakavwanga liu laki [laku Yesu] ndipu ŵakatuwangamu.” (Yohane 5:28, 29) Lemba la Chivumbuzi 20:13, likamba so kuti: “Ndipu nyanja yingufunchizga ŵakufwa ŵamwaki; ndipu nyifwa ndi Hadesi vingupereka ŵakufwa ŵamwaku wo.” Mazu ngakuti “Nyifwa” ndi “Hadesi” ngang’anamuwa chinthu chimoza, masanu nga ŵanthu wosi. (Wonani Fundu Zakukumaliya mapeji 212-13.) Masanu yanga ngazamuja mwazi. Ŵanthu wosi wo ŵe mwenimo ŵazamuja so ndi umoyu. Wakutumika Paulo wangukamba kuti: “Chiŵengepu chiyuka cha ŵarunji ndi ŵaziraurunji.” (Machitidu 24:15) Kumbi ivi ving’anamuwanji?

Mu Paradayisu, akufwa azamuyuskika ndi kuja so ndi akwanjiwa ŵawu

18. Kumbi mbayani wo ŵe mugulu la “ŵarunji” wo azamuyuskika, nanga kumbi chilindizga ichi chitikukwaskani wuli?

18 “Ŵarunji” asazgapu ŵanthu anandi wo tiŵerenga nkhani zawu m’Bayibolo wo ŵengaku Yesu wechendazi pacharu. Akhumba mukumbuka ŵanthu nge Nowa, Abrahamu, Sara, Mosese, Ruti, Estere ndi anyaki anandi. Nkhani zakukwaskana ndi anyaki mwa ŵanthu akugomezgeka yaŵa zisanirika mu buku la Ŵahebere chaputala 11. Kweni “ŵarunji” yaŵa asazgapu so ateŵeti aku Yehova wo atufwa mazuŵa nganu. Tiwonga ukongwa chifukwa cha chilindizga cha chiyuka cho chititovya kuti tilekengi kuwopa nyifwa.Ŵahebere 2:15.

19. Kumbi “ŵaziraurunji mbayani, ndipu Yehova waŵapaska mwaŵi nuwu?

19 Nanga nchinthu wuli cho chazamuchitikiya ŵanthu wosi wo akufwa kwambula kuteŵete pamwenga kuvwiya Yehova  chifukwa chakuti amuziŵanga cha? Yehova wazamuluwa cha “ŵaziraurunji” anandi yaŵa. Nawuso azamuyuskika ndi kupaskika nyengu yakusambiriya vakukwaskana ndi Chiuta wauneneska kweniso kumuteŵete. Pa nyengu ya vyaka 1,000, akufwa azamuyuskika ndi kupaskika mwaŵi wakuteŵete Yehova pamoza ndi ateŵeti ŵaki akugomezgeka. Nyengu iyi yazamuja yakukondweska ukongwa. Bayibolo likamba kuti nyengu iyi, ndi Zuŵa la Cheruzgu. *

20. Kumbi Gehena nchinthu wuli, nanga mbanthu amtundu wuli wo aluta ku Gehena?

20 Kumbi ivi ving’anamuwa kuti munthu weyosi wazamuyuskika? Awa. Bayibolo likamba kuti akufwa anyaki ŵe ku “Gehena.” (Luka 12:5) Zina lakuti Gehena likutuliya ku malu ngakali ngo ngenga ku Yerusalemu ko atayangaku vinthu. Kumalu yanga awotchiyangaku ŵanthu ndi nyama zakufwa kweniso viswaswa vosi. Ŵanthu wo aŵatayanga kweniko aŵawonanga kuti ŵenga ambula kwenere chiyuka. Mwaviyo, Gehena wamiya pharanyiku lamuyaya. Chinanga kuti Yesu ndiyu we ndi udindu wakweruzga amoyu ndi akufwa, Yehova ndiyu Mweruzgi wakumaliya. (Machitidu 10:42) Iyu wazamuyuska cha ŵanthu wo watiŵayeruzga kuti mbaheni ndipuso ambula kukhumba kulapa.

‘CHIYUKA CHAKWAMBA’

21, 22. (a) Kumbi ‘chiyuka chakwamba’ ching’anamuwanji? (b) Kumbi ndiyani yo wangwamba kuyuskikiya ku umoyu wauzimu?

21 Bayibolo likamba so va chiyuka chinyaki cho chidanika kuti ‘chiyuka chakwamba.’ (Chivumbuzi 20:6) M’Bayibolo mukulembeka nkhani ya munthu yumoza pe yo wakuyuskika pa chiyuka ichi, Yesu Khristu.

22 Yesu wati wabayika, Yehova wanguzomerezga cha kuti Mwana waki wakugomezgeka walutirizgi kuja mu muunda. (Sumu 16:10; Machitidu 13:34, 35) Chiuta wanguyuskiya Yesu  ku umoyu wa umunthu cha. Wakutumika Petro wangukonkhoska kuti Khristu ‘wangubayika mu liŵavu kweni wanguja wamoyu mu mzimu.’ (1 Petro 3:18) Ichi chenga chakuziziswa chikulu nadi. Yesu wanguja so wamoyu nge munthu wauzimu wanthazi ukongwa. (1 Ŵakorinte 15:3-6) Yesu ndiyu wenga wakwamba kuyuskika mwapade viyo. (Yohane 3:13) Kweni iyu wenga wakumaliya cha.

23, 24. Kumbi mbayani wo apanga ‘kamskambu kamana,’ ndipu alipu alinga?

23 Yesu wati waziŵa kuti we pafupi kuwere kuchanya, wangukambiya akumulondo ŵaki kuti “ndiruta kwachirongosole imwi malu.” (Yohane 14:2) Yesu wangukamba kuti ŵanthu wo aluta kuchanya ‘nkhamskambu kamana.’ (Luka 12:32) Kumbi mbalinga wo ŵe mugulu limana la Akhristu akugomezgeka ili? Nge mo likambiya Lemba la Chivumbuzi 14:1, wakutumika Yohane wanguti: “Ndipu ndingulereska, ehe, Mwana-mberere wanguma pa phiri Zioni, ndi pamoza nayu penga vikwi machumi pe chumi ndi machumi nganayi ndi vinayi (144,000) wo ŵenga ndi zina laki, ndi zina la Awiski, lakulembeka pa mphumi zawu.”

24 Akhristu 144,000 yaŵa kusazgapu akutumika akugomezgeka aku Yesu, ayuskikiya ku umoyu wakuchanya. Kumbi yiwu ayuskika nyengu niyi? Wakutumika Paulo wangulemba kuti kwazamuchitika munyengu yakujapu kwaku Khristu. (1 Ŵakorinte 15:23) Nge mo mwazamusambiriya mu mutu 9, isi tija mu nyengu yeniyi. Mwaviyo, akujaliya mwa ŵanthu 144,000 wo atufwa mazuŵa nganu, ayuskikiya kuchanya nyengu yeniyo afwiya. (1 Ŵakorinte 15:51-55) Kweni ŵanthu anandi ŵe ndi mwaŵi wakuziyuskikiya ku umoyu mu Paradayisu pacharu chapasi.

25. Kumbi tazamusambiranji mu mutu wa panthazi?

25 Yehova wazamutuzgapu murwani widu, nyifwa ndipu wazamuŵaku so cha. (Yesaya 25:8) Kweni akhumba mungafumba kuti, ‘Kumbi wo ayuskikiya kuchanya amuchitanji?’ Yiwu amuja chigaŵa cha boma la Ufumu wakuchanya. Mu mutu wa panthazi, tisambirengi vinandi vakukwaskana ndi boma ili.

^ ndimi 9 Nkhani zinyaki zisanirika pa 1 Ŵakaronga 17:17-24; 2 Ŵakaronga 4:32-37; 13:20, 21; Mateyu 28:5-7; Luka 7:11-17; 8:40-56; Machitidu 9:36-42; ndipuso Mac 20:7-12.

^ ndimi 19 Kuti muvwi vinandi vakukwaskana ndi Zuŵa la Cheruzgu, ndipuso chifukwa cho ŵanthu azamuyeruzgikiya, wonani Fundu Zakukumaliya mapeji 213-15.