Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Banja Linu Likhoza Kuja Lalikondwa

 CHIGAŴA 7

Vo Mungachita Kuti Musambizi Mwana Winu

Vo Mungachita Kuti Musambizi Mwana Winu

“Mazu yanga ndikulanguliyani zuŵa ili ngaje mumitima yinu. mungasambizengi ku ŵana ŵinu kwalwana.”Marangu 6:6, 7

Yehova wachiyambisa banja, wangupaska apapi udindu wakusambiza ŵana ŵawu. (Ŵakolose 3:20) Mbudindu winu apapi kusambiza mwana winu kuti wayanjengi Yehova ndipuso kuti wakuwi umampha. (2 Timote 1:5; 3:15) Mukhumbika so kuziŵa vo ve mumtima wa mwana winu. Mutenere kuziŵa kuti vo imwi muchita, vingawovya ukongwa mwana winu. Kuti mufiski kusambiza mwana Mazu Ngaku Yehova, mukhumbika dankha kungaŵika m’mitima yinu.—Sumu 40:8.

 1 WOVYANI ŴANA ŴINU KUTI AKAMBISKANENGI NAMWI MWAKUFWATUKA

VO BAYIBOLO LIKAMBA: ‘Muŵi apusu kwachivwa, achizita kulongoro.’ (Yakobe 1:19) Muchitengi vinthu vo vingaŵovya kuti ŵana ŵinu akambiskanengi namwi mwakufwatuka. Yiwu atenere kuziŵa kuti imwi mwe akunozgeka kuvwisiya pa nyengu yo akhumba kulongoro namwi. Muyesesengi kuchita vinthu mwachimangu panyumba pinu, kuti ŵana ŵinu akambiskanengi namwi mwakufwatuka. (Yakobe 3:18) Asani mutanja kuŵakalipa pamwenga kuŵachenya nyengu zosi, angafwatukirana namwi cha. Muchitengi nawu vinthu mwakuzizipizga, ndipu nyengu zosi muŵalongongi kuti mutiŵayanja.Mateyu 3:17; 1 Ŵakorinte 8:1.

VO MUNGACHITA:

  • Asani ŵana ŵinu akhumba kukambiskana namwi, mungaŵakaniyanga cha

  • Mukambiskanengi ndi ŵana ŵinu pafupipafupi, kukambiskana nawu asani pe masuzgu pe cha

2 MUYESESENGI KUVWISISA VO AKAMBA

VO BAYIBOLO LIKAMBA: “Mweniyo waphwere mazu wakasakatanga.” (Nthanthi 16:20) Asani ŵana ŵinu akonkhoska maŵanaŵanu ngawu, nyengu zinyaki muvwisiyengi ndi chilatu chakukhumba kuvwisisa mo avwiya. Mbuneneska kuti ŵana anandi atanja kukuskiyaku nkhani pamwenga kukamba vinthu mwakupekula. Kweni Bayibolo likamba kuti “Asani munthu wamuka wenga wandavwi, nkhupusa kwaki.” (Nthanthi 18:13) Mwaviyo, mungathaŵiriyanga kukwiya cha.Nthanthi 19:11.

VO MUNGACHITA:

  • Muyesesengi kuwuko mtima kuti asani ŵana ŵinu akonkhoska maŵanaŵanu ngawu, mungaŵadumulizganga pamwenga kuŵakalipiya cha

  • Mukumbukengi mo imwi mwavwiyanga kweniso vinthu vo mwayanjanga pa nyengu yo mwenga msinkhu wawu

 3 MUCHITENGI VINTHU MWAKUKOLIYANA

VO BAYIBOLO LIKAMBA: “Yivwa wa mwana wangu chisambizu cha awusu; ndipu ungakananga [cha] kusambiza kwa anyoku.” (Nthanthi 1:8) Yehova wakupaska mazaza ngakulunguchizga ŵana kwa apapi wosi ŵaŵi. Mwaviyo, muyesesengi kusambiza ŵana ŵinu kuti akutumbikeningi ndi kukuvwiyani. (Ŵaefesu 6:1-3) Ŵana akhoza kuziŵa kuti apapi ŵawu mbambula ‘kumangana pamoza mu chinjeru chakuyana.’ (1 Ŵakorinte 1:10) Asani mwaguŵiskana, yesani kukambiskana kumphepeti, chifukwa asani mungapindana pamasu pa ŵana, akutumbikeningi cha.

VO MUNGACHITA:

  • Mukambiskanengi vo mungachita kuti musambizengi ŵana ŵinu ndipu muchitengi vinthu mwakukoliyana

  • Asani mwe ndi maŵanaŵanu ngakupambana pa nkhani ya mo mugasambiziya ŵana ŵinu, yesesani kuvwisa vo munyinu wang’anamuwa

 4 NOZGEKIYANI LIMU

VO BAYIBOLO LIKAMBA: “Sambiza mwana mu nthowa yeniyo watenere kwendamu.” (Nthanthi 22:6) Mutenere kuchita phamphu kuti musambizi umampha ŵana ŵinu. Mukhumbika kunozgeke limu vo mwazamuchita kuti musambizi ndi kulunguchizga ŵana ŵinu. (Sumu 127:4; Nthanthi 29:17) Kusambiza ŵana kuti kung’anamuwa kuŵalanga pe cha, kweni kusazgapu kuŵawovya kuti avwisisi chifukwa cho mwajalikiskiya marangu. (Nthanthi 28:7) Asambizeni so kuti ayanjengi ndi kuvwisa fundu za m’Mazu Ngaku Yehova. (Sumu 1:2) Ivi vingaŵawovya kuti aje ndi njuŵi yamampha.Ŵahebere 5:14.

VO MUNGACHITA:

  • Muyesesengi kuwovya ŵana ŵinu kuti awonengi Chiuta nge Munthu chayiyu yo angamuthemba

  • Awovyeni kuti aŵanikengi ndi kukhwecha mijalidu yiheni nge yo yisanirika pa Intaneti ndi malu nganyaki ngakucheze nga pa Intaneti. Asambizeni mo angankhweche ŵanthu wo angaŵachichizga kugonana nawu

“Sambiza mwana mu nthowa yeniyo watenere kwendamu”