Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Banja Linu Likhoza Kuja Lalikondwa

 CHIGAŴA 5

Vo Mungachita Kuti Mujengi Mwachimangu ndi Apapi

Vo Mungachita Kuti Mujengi Mwachimangu ndi Apapi

“Vwarani . . . ulemu, kujiyuyuwa, upovu, chilekerezga.”Ŵakolose 3:12

Nthengwa yichitiska kuti ŵanthu ayambi banja lifya. Chinanga kuti mukhumbika kwanja ndi kutumbika apapi ŵinu nyengu zosi, kweni sonu, munthu yo mwatolana nayu ndiyu wakukhumbika ukongwa pacharu chosi. Abali ŵinu anyaki angasuzgika kuzomerezga fundu yeniyi. Kweni fundu za m’Bayibolo ndizu zingakuwovyani kuti muwonengi vinthu mwakwenere ndi chilatu chakuti mujengi mwachimangu ndi apapi, pa nyengu yo mutesesa kukuzga chanju m’banja linu lifya.

 1 MUWONENGI APAPI ŴINU MWAKWENERE

VO BAYIBOLO LIKAMBA: “Tumbika awusu ndi anyoku.” (Ŵaefesu 6:2) Chinanga kuti mungawoneka kuti mwe ŵara, nyengu zosi mukhumbika kutumbika apapi ŵinu. Mutenere kuziŵa so kuti yo mwatolana nayu we ndi apapi ŵaki wo wakhumbika kuŵaphwere. Mungakwiyanga cha asani munthu yo mukutolana nayu wachita vinthu vinyaki ndi apapi ŵaki, pakuti “chanju kuti chiŵiniwa cha [“chilivi sanji,” NW].”1 Ŵakorinte 13:4; Ŵagalatia 5:26.

VO MUNGACHITA:

  • Mukhumbika cha kukamba mazu nge ngakuti: “Banja linu litinditumbika cha nyengu zosi” pamwenga “Anyinamwi alumbapu cha vo nditiŵachitiya”

  • Muyesesengi kuwona vinthu nge mo munthu yo mukutolana nayu wativiwone

 2 MUCHITENGI VINTHU MWACHIGANGA ASANI MPHAKWENERE

VO BAYIBOLO LIKAMBA: “Chifukwa chenichi munthurumi wasiya awiski ndi anyina ndi watijibatika ku muwolu waki, ndipu ŵatuŵa nyama yimoza.” (Chiyambo 2:24) Asani mwato pamwenga kuyirwa, apapi ŵinu angawona nge kuti akhumbika kulutirizga kukuphweriyani ndipu angakhumba kukuchitiyaningi vinthu vinandi vo atenere cha kuchita.

Mungakambiskana vo apapi akhumbika cha kukuchitiyani ndipu mungakambirana nawu mwachanju. Mutenere kuŵakambiya mwakufwatuka kweniso mwaulemu. (Nthanthi 15:1) Kujiyuyuwa, kuzika ndipuso kuzizipizga kungakuwovyani kuti muje pa ubwezi wamampha ndi apapi ndipuso kuti mulutirizgi ‘kukunthiriyana mu chanju.’Ŵaefesu 4:2.

VO MUNGACHITA:

  • Asani muwona kuti apapi asereriyapu ukongwa pa vakuchitika va banja linu, kambiskanani ndi munthu yo mukutolana nayu pa nyengu yakwenere

  • Muvwanani fundu yimoza yo yingakuwovyani kumaliska masuzgu yanga