Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Kwamuka kwa Mafumbu 10 ngo Achinyamata Afumba

 FUMBU 2

Ntchifukwa Wuli Ndifipa Mtima Ndi mo Ndiwoneke?

Ntchifukwa Wuli Ndifipa Mtima Ndi mo Ndiwoneke?

NTCHIFUKWA WULI MUKHUMBIKA KUJIFUMBA FUMBU ILI?

Vinthu vinyaki vakukhumbika ukongwa kuphara vo muwona pagilasi.

KUMBI MUNGACHITA WULI?

Ŵanaŵaniyani chakuchitika ichi: Julia watijilelesa pagilasi ndipu wawona kuti ngwakututuŵa ukongwa. Walongoro yija kuti, “Ndikhumbika kuwondaku.” Kweni apapi ŵaki ndi anyaki atimukambiya kuti ndi mumana liŵavu.

Nyengu yinyaki Julia waŵanaŵanangapu kuti wachiti vinthu vo vingamuwovya kuti wawondi. Iyu wanguŵanaŵana kuti waje kwambula kurya kwa mazuŵa ngamanavi . . .

Kumbi mungachita wuli asani mwe ndi maŵanaŵanu nge ngaku Julia?

MUŴANAŴANIYENGEPU DANKHA!

Nyengu zinyaki mungajiwona mwambula kwenere ndipu vingayanana ndi kujiwona pagilasi liheni

Mbuheni cha asani mufipa mtima ndi mo muwoneke. Bayibolu nalu lilumba anthurumi ndi anthukazi anandi kuti ŵenga akutowa. Likamba zaku Sara, Rakelu, Abigayili, Yosefi ndi Davidi kuti ŵenga akutowa. Bayibolu likamba kuti Abishagi wenga “wakutowa ukongwa.”1 Ŵakaronga 1:4.

Kweni achinyamata anandi akondwa cha ndi mo awoneke. Ivi vingachitisa kuti akumani ndi masuzu ngakulu. Wonani ivi:

  • Ŵanthu anyaki wo anguchita kafukufuku angusaniya kuti pa asungwana 58 wo akambanga kuti mbakututuŵa ukongwa, asungwana 17 pe ndiwu ŵenga akututuŵa nadi.

  • Pa kafukufuku munyaki angusaniya kuti anthukazi 45 wo ŵenga amana liŵavu ajiwonanga kuti mbakututuŵa ukongwa.

  • Chifukwa chakuti anandi akhumba kuti liŵavu lawu lije limana atamba kujinola chakurya. Ndipu ivi vingachitisa kuti ayambi kutama.

 Asani mwayamba kutama chifukwa cha kujinola vakurya, mutenere kupenja chovyu. Kambiyani apapi ŵinu pamwenga mubwezi winu yo mutimugomeza. Bayibolu likamba kuti: “Bwezi litanja nyengu zosi, ndipu ndilu mubali widu yo wakuwiya kuti watiwovyi pa nyengu ya masuzu.”Nthanthi 17:17.

CHINTHU CHAKUKHUMBIKA UKONGWA CHO MUNGACHITA

Kukamba unenesa, jalidu ndilu lichitisa kuti munthu wayanjiki pamwenga cha. Ŵanaŵaniyani zaku Abisalomu mwana waku Davidi. Bayibolu likamba kuti:

“Pengavi so munyaki yo wangulumbika chifukwa chakutowa. . . . Wengavi kalema paliŵavu laki.”—2 Samuele 14:25.

Kweni munyamata uyu wenga wakunyada, wakujikuza ndipuso wachinyengu! Ndichu chifukwa chaki Bayibolu likambapu cha vamampha vakukwasana ndi Abisalomu. Likamba kuti wenga wakuchitisa chitima, wambula kugomezeka kweniso wakubaya.

Bayibolu lititipasa ulongozi uwu wo ungatiwovya:

“Vwalani umunthu wasonu.”Ŵakolose 3:10.

“Kujitowesa kwinu kungajanga kwa kubwalu cha . . . , kweni kuje kwa umunthu wakubisika wa mumtima.”1 Petro 3:3, 4.

Chinanga kuti mbuheni cha asani munthu wakhumba kuti wawonekengi umampha, kweni chakukhumbika ukongwa ndi jalidu lamampha. Jalidu lamampha lingachitisa kuti ŵanthu akuyanjeningi ukongwa. Msungwana munyaki zina laki Phylicia wangukamba kuti: “Chinanga kuti ŵanthu angakopeka ndi mo muwoneke, kweni jalidu lamampha ndilu ŵanthu akumbuka ukongwa.”

KUMBI MUTIJIWONA WULI?

Kumbi mukondwa cha ndi mo muwoneke?

Kumbi mukuŵanaŵanapu za kuchichitisa opaleshoni pamwenga kujinola vakurya kuti muwonekengi umampha?

Kumbi ntchinthu wuli cho mungasintha asani mungapasika mwaŵi wakusintha? (Chongani cho mungayanja.)

  • UTALI

  • UZITU

  • SISI

  • MO LIŴAVU LIKUWUMBIKIYA

  • CHISKU

  • KAWONEKERU

Asani mwamuka kuti hinya mafumbu ngaŵi ngakwamba kweniso asani mwachonga vitatu pamwenga kujumpha, mutenere kuŵanaŵaniya fundu iyi: Ŵanthu atikuwonani mwakupambana ndi mo imwi mutijiwone. Asani muŵanaŵaniya ukongwa mo muwoneke mungayamba kusuzika maŵanaŵanu.1 Samuele 16:7.