Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Kwamuka kwa Mafumbu 10 ngo Achinyamata Afumba

 FUMBU 4

Kumbi Ndingachita Wuli Ndi Vinthu vo Ndinangisa?

Kumbi Ndingachita Wuli Ndi Vinthu vo Ndinangisa?

NTCHIFUKWA WULI MUKHUMBIKA KUJIFUMBA FUMBU ILI?

Asani tizomeleza vo tinangisa ntchipusu kunoza vo tinangisa ndipuso ŵanthu atigomezengi.

KUMBI MUNGACHITA WULI?

Ŵanaŵaniyani chakuchitika ichi: Tim watchaya bola ndi anyaki ndipu bola laswa gilasi la pawindu la nyumba ya aneba.

Asani imwi mwenga Tim, kumbi mwatingi muchitengi wuli?

MUŴANAŴANIYENGEPU DANKHA!

MUNGASANKHAPU NICHI PA VINTHU VITATU IVI:

  1. Kuthaŵa.

  2. Kupusikiziya anyinu.

  3. Kuŵakonkhose vo vachitika ndi kuŵakambiya kuti mulipiyengepu gilasi lo lasweka.

Nyengu zinyaki mtima winu ungakunyengani kuchita vo valembeka pa Sachizu A. Kaya mwaswa gilasi pamwenga mwananga chinthu chinyaki chechosi, kweni chinthu chakukhumbika ukongwa nkhuzomeleza vo mwanangisa.

 NTCHIFUKWA WULI MUKHUMBIKA KUZOMELA VO MUNANGISA?

  1. Ntchinthu chamampha kuchita viyo.

    Bayibolu likamba kuti: “Tikhumba kuchita vinthu vosi mwakugomezeka.”—Ŵahebere 13:18.

  2. Ŵanthu agowoke munthu yo wazomela vo wanangisa.

    Bayibolu likamba kuti: “Munthu yo wabisa maubudi ngaki wasaniyengi mwaŵi cha, kweni yo wazomela ndi kungaleka wachitikiyengi lisungu.”—Nthanthi 28:13.

  3. Tikondwesa Chiuta asani tichita viyo.

    Bayibolu likamba kuti: “Yehova watinkha munthu wachinyengu, kweni watanja ŵanthu a mtima wamampha.”—Nthanthi 3:32.

Karina wa vyaka 20, wangubisa awisi kuti walipira ndalama chifukwa chakuti watchimbizanga ukongwa galimotu. Kweni awisi anguziŵa zuŵa linyaki vo wanguchita. Karina wangukamba kuti, “Pati pajumpha chaka, ada angusaniya tikiti la ndalama zo ndingulipira. Venivi vingundiŵika mumasuzu.”

Kumbi wangusambiranjipu? Karina wangukamba kuti: “Vinthu vinganangika ukongwa asani wabisa vo wanangisa. Chinanga pangajumpha nyengu yitali wuli, wazamukumana nangu mbwenu masuzu!”

KUMBI MUNGASAMBIRANJI PA VO MUNANGISA?

Bayibolu likamba kuti: “Tosi tinangisa nyengu zinandi.” (Yakobe 3:2) Nge mo tawone, asani tizomela liŵi vo tanangisa vilongo kuti te akujiyuyuwa kweniso tiŵanaŵana umampha.

Chinthu chinyaki cho mungachita nkhusambira pa vo mwanangisa. Msungwana munyaki zina laki Vera wangukamba kuti: “Ndisambirapu kanthu pa chechosi cho ndanangisa, ndipu ivi vitindiwovya kuti ndije munthu wamampha ndipuso kuti ndizisankhi umampha vakuchita nyengu yinyaki.” Wonani mo mungachitiya venivi.

Kumbi mungachitanji asani mwananga njinga yo mungubweleka kwa ada ŵinu?

  • Mungaja cheti ndi kuŵanaŵana kuti awiskemwi aziŵengi cha.

  • Kuŵakambiya chechosi cho mwachita.

  • Kupusikiziya munthu munyaki kuti ndiyu wananga.

Kumbi mungachita wuli asani mwatondeka mayesu chifukwa chakuti mwaŵerenganga cha?

  • Mukambengi kuti mayesu ngangusuza.

  • Muzomelezengi vo munguchita kuti mutondeki.

  • Mumbengi mlandu asambizi kuti ŵe namwi ndi chifukwa.

Kuŵanaŵaniya ukongwa vo mukunangisapu kungayanana ndi kulelesa pagilasi dodoli asani mutendesa galimotu

 Ŵanaŵaniyani vakuchitika vo vakambika kukwambiliya kwa nkhani ndipu yeruziyani kuti ndimwi (1) ada (2) asambizi. Kumbi ada ŵinu kweniso asambizi angakuŵanaŵaniyaninji asani mungazomela vo mwanangisa? Kumbi angakuŵanaŵaniyaninji asani mungabisa vo mwanangisa?

Ŵanaŵaniyani vo mungunangisa chaka chamala ndipu mukani mafumbu yanga.

Kumbi ndi vinthu wuli vo mungunangisa, nanga munguchita wuli?

  • Ndingubisa.

  • Ndingumba mlandu munthu munyaki.

  • Ndinguzomela.

Kumbi munguvwa wuli mwati mwaleka kuzomela vo mungunangisa?

  • Ndinguvwa umampha.

  • Ndingujimba mlandu.

Kumbi mwatingi muchitengi wuli kuti musankhi umampha vinthu?

Kumbi mungusambiranji pa vo mungunangisa?

KUMBI MUŴANAŴANA WULI?

Ntchifukwa wuli ŵanthu anyaki azomela cha vo anangisa?

Kumbi ŵanthu angakuwonani wuli asani nyengu zosi muzomela cha vo mwanangisa, nanga angakuwonani wuli asani muzomela vo munangisa?—Luka 16:10.