Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Kabuku ka Unganu wa Umoyu Widu Wachikhristu Ndipuso Uteŵeti  |  June 2017

 TICHITENGI VINTHU NGE AKHRISTU

Mukondwengi ndi Ntchitu Yakupharazga Uthenga Wamampha

Mukondwengi ndi Ntchitu Yakupharazga Uthenga Wamampha

Kumbi kupharazga nkhwakusuzga? Tanandi tingazomereza. Chifukwa wuli? Chifukwa chakuti kanandi tisuskika asani tipharazga kweniso titopa kukambisana ndi ŵanthu wo tileka kuŵaziŵa. Kukamba uneneska, venivi vingatiweze vuli. Chinanga kuti ve viyo, tisopa Chiuta walikondwa yo wakhumba kuti timuteŵetiyengi so mwalikondwa. (Sumu 100:2; 1 Tim. 1:11) Kumbi ndi vinthu vitatu nivi vo vingatiwovya kuti tikondwengi ndi ntchitu yakupharazga?

Chakwamba, tipharazga uthenga wachilindiza. Chinanga kuti ŵanthu anandi alivi chilindiza mazuŵa nganu, kweni tingaŵawovya ndi “uthenga wamampha wa vinthu vamampha.” (Yes. 52:7) Kweniso, uthenga wamampha wa Ufumu utitiwovya kuti nasi tikondwengi. Techendaluti kuchipharazga, tikhumbika kuŵanaŵaniya vitumbiku vo Ufumu waku Chiuta uzisengi pacharu.

Chachiŵi, uthenga wamampha wo tipharazga utovya ŵanthu mwakuliŵavu ndipuso mwauzimu. Yiwu aleka mijalidu yawu yiheni ndipu aja ndi chilindiza chakuzilonde umoyu wambula kumala. (Yes. 48:17, 18; Ŵar. 1:16) Mwaviyo, tosi tikhumbika kujipereka kugwiraku ntchitu yakutaska ŵanthu yeniyi! Chinanga kuti anyaki akana asani titiŵapharazgiya, kweni tilutiliza mbwenu kupenja wo akhumba kutaskika.—Mat. 10:11-14.

Chachitatu kweniso chakukhumbika ukongwa ntchakuti ntchitu yakupharazga yitumbika Yehova. Iyu wawona kuti ntchitu yakupharazga njakukhumbika ukongwa. (Yes. 43:10; Ŵah. 6:10) Tikondwa so ukongwa kuti watitiwovya ndi mzimu waki kuti tifiski ntchitu yakupharazga. Mwaviyo, titenere kupempha Yehova kuti watiwovyi kuja alikondwa chifukwa lenili ndimoza mwa mijalidu ya mzimu wakupaturika. (Ŵag. 5:22) Asani tithembengi Yehova nyengu zosi, iyu watiwovyengi kuti tileki kuchita mantha kweniso tipharazgengi mwachiganga. (Mac. 4:31) Isi tilutirizengi mbwenu kukondwa ndi ntchitu yakupharazga chinanga kuti anyaki angakana kuŵapharazgiya.—Ezek. 3:3.

Kumbi mukhumbika kuja ndi maŵanaŵanu wuli asani mupharazga? Kumbi mungalongo wuli kuti mukondwa ndi ntchitu yakupharazga?

WONESANI VIDIYO YAMUTU WAKUTI MUKONDWENGI ASANI MUSAMBIRA NDI KUŴANAŴANIYA VO MWAŴERENGA, NDIPU PAVULI PAKI MUKANI MAFUMBU YANGA:

  • Ntchifukwa wuli tikhumbika kusambira Mazu Ngaku Chiuta chinanga kuti tipharazga kwa maola nganandi mwezi wewosi?

  • Kumbi tingalondo wuli chakuwoniyapu chaku Mary?

  • Kumbi ndi nyengu niyi yo mutanja kuŵanaŵaniya Mazu Ngaku Chiuta?

  • Ntchifukwa wuli mukondwa ndi ntchitu yakupharazga uthenga wamampha?