Yohane 2:1-25

  • Zowala ku Kana, maji ngasambuka vinyu (1-12)

  • Yesu watowesa nyumba yakusopiyamu (13-22)

  • Yesu waziŵa vo ve mumtima wa munthu (23-25)

2  Ndipu pa zuŵa lachitatu, ku Kana wa ku Galileya kwenga zowala, ndipu anyina aku Yesu ŵenga kweniko.  Yesu ndi akusambira ŵaki nawu angudanika ku zowala zo.  Vinyu wati wamala, anyina aku Yesu angukambiya Yesu kuti: “Vinyu waŵamaliya.”  Kweni Yesu wanguŵakambiya kuti: “Ama, ini ndi yimwi vititikwaska wuli? Ora langu lechendafiki.”  Anyina angukambiya ŵanthu wo ateŵetiyanga kuti: “Muchiti chechosi cho wangakukambiyani.”  Mwakukoliyana ndi dangu la Ayuda lakujitowesa, pamalu ngo anguŵikapu misuku 6 yakupangika ndi mya. Msuku wewosi wakwananga miyesu* yiŵi pamwenga yitatu.  Yesu wanguŵakambiya kuti: “Zazani maji mumisuku.” Sonu yiwu anguzazamu mpaka pamulomu.  Pavuli paki wanguŵakambiya kuti: “Tonimu, mukapaski wakuwonere phwandu.” Sonu yiwu angumutole.  Wakuwonere phwandu wati wayesa maji ngo ngangusambuka vinyu, wangudana munthulumi mweneku wa nthengwa, chifukwa wanguziŵa cha ko kungutuliya vinyu yo (chinanga kuti ateŵeti wo angumutole, anguziŵa). 10  Ndipu wangumukambiya kuti: “Munthu weyosi watuzga dankha vinyu wamampha, asani ŵanthu aloŵe, ndipu watuzga vinyu wawuliwuli. Kweni yiwi upereka vinyu wamampha mpaka sonu.” 11  Yesu wanguchita venivi ku Kana wa ku Galileya nge chisimikizu chakwamba, ndipu unkhankhu waki unguwoneke ndipuso akusambira ŵaki anguja ndi chivwanu mwaku iyu. 12  Pavuli paki, iyu ndi anyina kweniso avurwa ŵaki limoza ndi akusambira ŵaki anguluta ku Kaperenao, kweni angujaku mazuŵa nganandi cha. 13  Sonu Pasika wa Ayuda wenga pafupi, ndipu Yesu wanguluta ku Yerusalemu. 14  Iyu wangusaniya kuti ŵanthu wo agulisanga ng’ombi, mbereri, nkhunda kweniso akusintha ndalama aja mumipandu yawu munyumba yakusopiyamu. 15  Sonu wangupanga likhwechu la vingwi, pavuli paki wangudikisa ŵanthu wosi wo ŵenga ndi mbereri kweniso ng’ombi munyumba yakusopiyamu. Ndipu wangudira so ndalama za ŵanthu akusintha ndalama ndi kugudubuwa mathebulu ngawu. 16  Ndipu wangukambiya ŵanthu wo agulisanga nkhunda kuti: “Tuzganimu ivi munu! Nyumba ya Ada lekani kuyisambusa nyumba yamalonda!”* 17  Akusambira ŵaki angukumbuka kuti Malemba ngakamba kuti: “Phamphu la panyumba yinu lazakundirya.” 18  Ayuda ŵati awona venivi angumukambiya kuti: “Pakuti uchita vinthu ivi, kumbi ungatilongo chisimikizu cho uchitiya venivi?” 19  Yesu wanguŵamuka kuti: “Wisiyani pasi nyumba yakusopiyamu iyi, ndipu ndiyizengengi so mu mazuŵa ngatatu.” 20  Ayuda angukamba kuti: “Nyumba yakusopiyamu iyi yinguzengeka kwa vyaka 46, mbwenu yiwi ungayizenga mu mazuŵa ngatatu?” 21  Kweni wachikamba nyumba yakusopiyamu wang’anamuwanga liŵavu laki. 22  Wati wayuskika, akusambira ŵaki angukumbuka kuti wayanjanga kukamba mazu ngenanga, ndipu angugomezga lemba kweniso vo Yesu wangukamba. 23  Kweni po wenga ku Yerusalemu pa phwandu la Pasika, ŵanthu anandi anguja ndi chivwanu mu zina laki ŵati awona visimikizu vo wachitanga. 24  Kweni Yesu wanguŵagomezga viŵi cha chifukwa waŵaziŵanga wosi 25  kweniso chifukwa wakhumbikanga munthu cha kuti wamukambiyi vakukwaskana ndi munthu, pakuti waziŵanga vo ve mumtima wa munthu.

Mazu Ngam'mphata

Mwesu uwu utenere kuti wenga msuku wo wakwananga malita 22.
Pamwenga kuti, “msika.”