Tito 3:1-15

  • Kujithereska mwakwenere (1-3)

  • Jani akunozgeka kuchita ntchitu zamampha (4-8)

  • Kana suskanu zakupusa kweniso timagulu takugaruka (9-11)

  • Ulongozgi kwaku Tito ndipuso kutawuzga (12-15)

3  Lutirizga kuŵakumbusa kuti ajithereskengi ndipuso avwiyengi maboma kweniso amazaza, kuti so ajengi akunozgeka kuchita ntchitu yeyosi yamampha,  kuti angalongoronga mwachimwaza cha kwaku weyosi, aleki kupindana, kweni aje akoloŵa, alongongi kuti mbakuzika ku ŵanthu wosi.  Pakuti nasi kali tenga ambula zeru, ambula kuvwiya, akulandizgika, akapolu a makhumbiru kweniso vakukondwesa vakupambanapambana, talutirizganga kuchita vinthu viheni kweniso sanji, tenga awuyu ndipuso tatinkhananga.  Kweni wezi waku Chiuta Mtaski widu, ndipuso chanju chaki ku ŵanthu, vati vawoneke  (chifukwa cha ntchitu zaurunji zo tinguchita cha, kweni chifukwa cha lisungu laki), wakutitaska mwakutisambisa ndipu ivi vikutitole ku umoyu kweniso vititiwovya kuja ŵafya kuporote mu mzimu wakupaturika.  Wakutipunguliya mwakuzara* mzimu wenuwu kuporote mwaku Yesu Khristu, Mtaski widu,  kuti pavuli pakudanika arunji kuporote mu wezi waki ukulu, tije akuhara mwakukoliyana ndi chilindizga cha umoyu wamuyaya.  Mazu ngenanga ngakugomezgeka ndipu ndikhumba kuti yiwi ulutirizgi kukamba vinthu venivi mwakudidimizga, kuti ŵanthu wo agomezga Chiuta, alutirizgi kuŵika maŵanaŵanu ngawu ngosi pa ntchitu zamampha. Vinthu venivi vamampha ndipuso vakovya ku ŵanthu.  Kweni ungachitangaku cha suskanu zakupusa, kukumba mikoka, kupindana ndi kuyambana pa Dangu,* pakuti venivi vambula phindu kweniso vaŵaka. 10  Munthu yo watovya timagulu takugaruka, umukani pavuli pakuti wamutcheŵeska kakwamba ndipuso kachiŵi, 11  pakuziŵa kuti munthu waviyo watuwapu pa nthowa, wabuda ndipuso watijisuska. 12  Asani ndatuma Atema pamwenga Tukiko kwaku yiwi, uyesesi kuti uzi kwaku ini ku Nikopoli, chifukwa ndiku ndaŵanaŵana kuti ndikaje mu chipwepwi. 13  Uwonesesi kuti Zenasi wakuziŵa Dangu* ndipuso Apolo, waŵapaska vosi vaku­khumbika kuti aleki kusoŵa kanthu pa ulendu wawu. 14  Kweni ŵanthu ŵidu nawu asambiri kulutirizga kuchita ntchitu zamampha kuti awovwengi asani pakhumbika chovyu chaliŵi, ndi chilatu chakuti aleki kuja ambula kubala vipasu. 15  Ŵanthu wosi wo ŵe ndi ini atikutawuzgani. Tawuzgani ŵanthu wo atitiyanja kweniso wo ŵe mu chivwanu. Wezi ukulu uŵi namwi mosi.

Mazu Ngam'mphata

Pamwenga kuti, “mwamasangu.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.