Mateyu 7:1-29

  • UPHARAZGI WA PAPHIRI (1-27)

    • Lekani kuyeruzga ŵanthu (1-6)

    • Lutirizgani kupempha, kupenja, kugong’oska (7-11)

    • Muchitengi vo mukhumba kuti anyinu akuchitiyeningi (12)

    • Geti lifinyi (13, 14)

    • Aziŵika ndi vipasu vawu (15-23)

    • Nyumba ya pajalawi, nyumba ya pamuchenga (24-27)

  • Chigulu cha ŵanthu chizizwa ndi mo Yesu wasambiziya (28, 29)

7  “Lekani kuyeruzga ŵanthu kuti namwi muleki kuyeruzgika;  chifukwa cheruzgu cho muyeruzgiya anyinu namwi muyeruzgikiyengi chenicho, ndipu mwesu wo mupimiya anyinu namwi akupimiyeningi weniwo.  Sonu ntchifukwa wuli uwona kachiswaswa ko ke mujisu la mubali waku penipo utondeka kuwona mugomba wo we mujisu laku?  Pamwenga ungamukambiya wuli mubali waku kuti, ‘Aga ndikutuzgemu kachiswaswa mujisu laku,’ penipo mujisu laku mwe mugomba?  Wakunyenga yiwi! Uyambi dankha kutuzgamu mugomba mujisu laku ndipu uwonengi umampha mo ungatuzgiya kachiswaswa ko ke mujisu la mubali waku.  “Mungapaskanga agalu cha vinthu vakupaturika pamwenga kuponya ngali* panthazi pa nkhumba, kuchitiya kuti zingakandapukandapu, kukung’anamukiyani ndi kukufwimbuwani.  “Lutirizgani kupempha ndipu mupaskikengi; lutirizgani kupenja ndipu musaniyengi; lutirizgani kugong’oska ndipu kukujulikiyeningi;  pakuti weyosi yo wapempha walonde, weyosi yo wapenja wasaniya, ndipu weyosi yo wagong’osa wajulikiya.  Ndiyani waku yimwi yo asani mwana waki wangamupempha buledi wangamupaska mwa? 10  Pamwenga asani mwana waki wangamupempha somba wangamupaska njoka? 11  Sonu, asani yimwi chinanga kuti mwe aheni muziŵa kupereka mphasu zamampha ku ŵana ŵinu, Awusemwi akuchanya angatondeka wuli kupereka vinthu vamampha ku ŵanthu wo atiŵapempha? 12  “Mwaviyo, vinthu vosi vo mukhumba kuti ŵanthu akuchitiyeni, namwi muŵachitiyi venivo. Venivi ndivu Dangu* ndi Vakulemba va Achimi vikamba. 13  “Sereni pageti lifinyi, chifukwa geti lisani kweniso msewu ukulu ngwakulongozge ku pharanyiku, ndipu akwendamu mbanandi; 14  penipo geti lifinyi kweniso msewu umana ngwakulongozge ku umoyu ndipu mbamanavi wo atiwusaniya. 15  “Tcheŵani ndi achimi aboza, wo awoneka nge mbereri pakuza kwaku yimwi penipo mukati mwawu ndi mphumphi zakusaluka. 16  Muŵaziŵengi ndi vipasu vawu. Kumbi ŵanthu apontho mphereska paminga pamwenga mkuyu pachinthembwi?* 17  Mwakuyanana ŵaka, chimiti chechosi chamampha chipasa vipasu vamampha kweni chimiti chechosi chakunangika* chipasa vipasu vabwekabweka. 18  Chimiti chamampha chingapasa vipasu vabwekabweka cha ndipu chimiti chakunangika chingapasa vipasu vamampha cha. 19  Chimiti chechosi cho chileka kupasa vipasu vamampha chiwisika ndi kuponyeka pamotu. 20  Nditikuneneskiyani, ŵanthu ŵenaŵa muŵaziŵengi ndi vipasu vawu. 21  “Ndi munthu weyosi cha yo watindidana kuti, ‘Ambuya, Ambuya,’ wazamusere mu Ufumu wakuchanya, kweni yija yo wachita khumbu la Ada wo ŵe kuchanya. 22  Pa zuŵa lo, ŵanthu anandi azakundikambiya kuti: ‘Ambuya, Ambuya, asi takambanga vinthu nge achimi mu zina linu, ndipuso tatuzganga viŵanda mu zina linu, kweniso tachitanga vinthu vinandi vakuziziswa mu zina linu?’ 23  Ndipu ndazakuŵakambiya kuti: ‘Nditikuziŵani cha! Tuwanipu yapa, mwaŵanthu ambula kuvwiya marangu yimwi!’ 24  “Mwaviyo, munthu weyosi yo watuvwa mazu ngangu ndi kuchita vo ndikamba, wajengi nge munthu wazeru yo wanguzenga nyumba yaki pajalawi. 25  Ndipu chivuwa chinguwa, maji ngangusapaliya ndipuso chimphepu chingupuma nyumba yo, kweni yinguwa cha chifukwa yinguzengeka pajalawi. 26  Kweniso munthu weyosi yo watuvwa mazu ngangu kweni wachita cha vo ndikamba, wayanana ndi munthu wakupusa yo wanguzenga nyumba yaki pamchenga. 27  Ndipu chivuwa chinguwa, maji ngangusapaliya ndipuso chimphepu chingupuma nyumba yo mpaka yinguwa mwakuti kuwa kwaki kwenga kukulu.” 28  Yesu wati wamaliza kukamba venivi, chigulu chosi cha ŵanthu chinguzizwa ndi mo wasambiziyanga, 29  chifukwa waŵasambizanga nge alembi ŵawu cha, kweni nge munthu waudindu.

Mazu Ngam'mphata

Tinthu tinyaki takuzirwa ukongwa to tiwoneka nge mya ndipu tisanirika mukati mwa nkhonu zinyaki za munyanja zikuluzikulu.
Wonani Mazu ngo Ngakonkhoskeka.
Mazu nga Chigiriki ngo ngafwatulikiya kuti chinthembwi ngang’anamuwa vakume vinyaki vakukozganaku ndi chinthembwi vo vipasa vipasu vaminga.
Mazu ngaki chayingu, “chakuvunda.”