Julani

Lutani pa vo ve mukati

Mateyu 28:1-20

NKHANI ZO ZE MUBUKU ILI

  • Yesu wayuskika (1-10)

  • Apereka ndalama kwa Asilikali kuti akambi boza (11-15)

  • Atumika kuchisambiza ŵanthu (16-20)

28  Zuŵa la Sabata lati lajumpha, ndi mlenjilenji pa zuŵa lakwamba la mu sabata, Mariya wa ku Magadala ndi Mariya munyaki anguza kuziwona kumasanu.  Awonani! kunguchita chidilirisi chikulu, chifukwa mungelu waku Yehova wangusika kutuliya kuchanya, wanguza ndi kugadabuwa chimwa pamuwunda ndipu wanguja pachimwa cho.  Iyu wawonekanga nge limphezi ndipu vakuvwala vaki venga vituŵa ukongwa.  Ndipu alonda anguchita mantha ukongwa ŵati awona mungelu yo, mwakuti angumbwambwanthiya ndipu angumila nge ŵanthu akufwa.  Kweni mungelu yo wangukambiya anthukazi wo kuti: “Mungawopanga cha chifukwa ndaziŵa kuti mupenja Yesu yo wangupayikika pachimiti.  Iyu we kunu cha, chifukwa wayuskika nge mo wangukambiya. Zani kunu kuti muwoni po wangugona.  Sonu yimwi lutani mwaliŵi ndipu mukakambiyi akusambira ŵaki kuti: ‘Wakuyuskika ku nyifwa, wadanjiyapu kuluta ku Galileya. Mwakumuwona kweniko.’ Awonani! Ndakukambiyani.”  Sonu yiwu angutuwaku mwaliŵi kumuwunda wachikumbusu ŵe ndi mantha kweniso likondwa likulu ndipu angutchimbiya kuchikambiya akusambira ŵaki.  Ndipu Yesu wangukumana nawu ndi kuŵakambiya kuti: “Timoneni!” Anguza kwaku iyu ndi kuko maphazi ngaki ndipu angumugwadiya. 10  Sonu Yesu wanguŵakambiya kuti: “Mungawopanga cha! Lutani mukakambiyi abali ŵangu kuti aluti ku Galileya, kweniko ndiku akundiwona.” 11  Ŵeche munthowa, anyaki mwa alonda anguluta mutawuni kuchikambiya ŵara ŵa asembi vosi vo vinguchitika. 12  Ndipu ŵati awungana ndi ŵara ndipuso ŵati akambiskana, angupereka ndalama zasiliva zinandi kwa asilikali 13  ndipu anguŵakambiya kuti: “Mukambengi kuti, ‘Akusambira ŵaki anguza usiku kuzimuba isi te mu tulu.’ 14  Ndipu asani nduna yavwa nkhani yeniyi, tamukonkhoska ndisi vosi vo vachitika,* mungafipanga mtima cha.” 15  Mwaviyo, anguto ndalama zasiliva ndipu anguchita nge mo anguŵakambiya. Nkhani iyi njakuwanda ukongwa pakati pa Ayuda mpaka sonu. 16  Kweni akusambira 11, anguluta ku Galileya kuphiri ko Yesu wanguŵakambiya kuti akakumani. 17  Ŵati amuwona angumugwadiya kweni anyaki angumukayikiya. 18  Yesu wanguza pafupi ndi yiwu ndipu wanguŵakambiya kuti: “Mazaza ngosi ngapaskika kwaku ini, kuchanya ndi pacharu chapasi. 19  Mwaviyo, lutani mukasambizengi ŵanthu amitundu yosi kuti aje akusambira ŵangu, mukaŵabatizengi mu zina la Ada, la Mwana, ndipuso la mzimu wakupaturika. 20  Mukaŵasambizengi kuti asungengi vinthu vosi vo ndikukulamulani. Ndipu awonani! ndiŵengi namwi limoza mazuŵa ngosi mpaka pakumaliya pa mugonezi.”*

Mazu Ngam'mphata

Mazu ngaki chayingu, “takuyinyengere ndisi.”
Pamwenga kuti, “nyengu.” Wonani Mazu ngo Ngakonkhoskeka.