Mateyu 27:1-66

  • Yesu waperekeka kwaku Pilato (1, 2)

  • Yudasi watijimangiriya ((3-10)

  • Yesu pa masu paku Pilato (11-26)

  • Wanyozeka pa masu pa ŵanthu wosi (27-31)

  • Wakhomeka pachimiti ku Gologota (32-44)

  • Nyifwa yaku Yesu (45-56)

  • Yesu waŵikika mumuwunda (57-61)

  • Avikiliya muwunda ((62-66)

27  Kwati kwacha, ŵara ndi ŵara ŵa asembi wosi angukumana ndipu angupangana kuti abayi Yesu.  Ŵati amumanga, anguluta kuchimupereka kwaku Pilato, nduna ya chigaŵa cha Yudeya.  Sonu Yudasi yo wangumupereka wati wawona kuti Yesu wayeruzgika kuti wabayiki, wangusuzgika maŵanaŵanu ndipu wanguluta kuchiweza ndalama 30 zasiliva kwa ŵara ndi ŵara ŵa asembi.  Iyu wanguŵakambiya kuti: “Ndingunanga kupereka ndopa zambula kunanga.” Yiwu angumuka kuti: “Sonu isi vititikwaska? Vaku vo!”  Mwaviyo, wanguponya ndalama zasiliva zo munyumba yakusopiyamu ndi kutuwamu. Ndipu wanguluta kuchijimangiriya.  Kweni ŵara ŵa asembi anguto ndalama zasiliva zo ndi kukamba kuti: “Nkhwakwenere cha kuziŵika mumalu ngakupaturika ngakusungiyamu ndalama chifukwa ndi ndalama za ndopa.”  Ŵati akambiskana, anguto ndalama zo ndi kugula munda wa wakuwumba viŵiya kuti uje masanu ngakuŵikaku alendu.  Mwaviyo, munda wo udanika kuti Munda wa Ndopa mpaka msanawale.  Ivi vingufiska vo Chiuta wangukambiya limu kuporote mwa mchimi Yeremiya kuti: “Ndipu anguto ndalama 30 zasiliva, zo zenga mtengu wakuguliya munthu, wo ŵana aku Isirayeli anyaki angulanga, 10  ndipu anguguliya munda wa wakuwumba viŵiya, mwakukoliyana ndi vo Yehova wangundilamula.” 11  Sonu Yesu wanguma pa masu pa nduna, ndipu nduna yo yingumufumba kuti: “Kumbi ndiwi Fumu ya Ayuda?” Yesu wangumuka kuti: “Mwakamba mwija.” 12  Kweni wangumuka kanthu cha ŵara ndi ŵara ŵa asembi achimumba mulandu. 13  Sonu Pilato wangumufumba kuti: “Kumbi utuvwa cha vinthu vosi vo ŵanthu yaŵa atikusimikiza?” 14  Kweni iyu wanguja ŵaka cheti ndipu wangumuka kanthu cha mwakuti nduna yo yinguzizwa ukongwa. 15  Chaka ndi chaka pa phwandu la pasika, nduna iyi yafwatuliyanga ŵanthu mukayidi yumoza yo akhumba. 16  Pa nyengu yeniyi, ŵenga ndi mukayidi munyaki wakofya yo wadanikanga kuti Baraba. 17  Sonu ŵanthu wo ŵati awungana, Pilato wanguŵafumba kuti: “Kumbi mukhumba kuti ndikufwatuliyeni yani, Baraba pamwenga Yesu yo atimudana kuti Khristu?” 18  Pilato wanguziŵa kuti amupereka kwaku iyu chifukwa cha sanji. 19  Kweniso po wanguja pampandu wakuyeruzgiyapu milandu, muwolu waki wangumutumiziya uthenga wakuti: “Mumuleki munthu murunji yo pakuti ndasuzgika ukongwa ndi malotu msanawale chifukwa chaku iyu.” 20  Kweni ŵara ndi ŵara ŵa asembi anguchichizga chigulu cha ŵanthu kuti chipemphi kuti Baraba ndiyu wafwatuliki, kweni Yesu wabayiki. 21  Pakumuka, nduna yo yinguŵafumba kuti: “Pa ŵanthu ŵaŵi yaŵa, mupenja kuti ndikufwatuliyeni yani?” Yiwu angumuka kuti: “Baraba!” 22  Pilato wangufumba kuti: “Sonu ndichitenji nayu Yesu yo atimudana kuti Khristu?” Wosi angumuka kuti: “Wapayikiki* pachimiti!” 23  Iyu wanguŵafumba so kuti: “Chifukwa wuli? Wananganji?” Kweni ndipu yiwu alutirizganga kudaniriza kuti: “Wapayikiki pachimiti!” 24  Wati wawona kuti ŵanthu wo asintha cha kweni alutirizga kuchita chiwawa, Pilato wanguto maji ndi kusamba mumanja pa masu pa chigulu cha ŵanthu ndi kukamba kuti: “Ndilivi mulandu wa ndopa za munthu uyu. Muviwonengi mwija.” 25  Wati wakamba viyo, ŵanthu wosi angumuka kuti: “Mulandu wa ndopa zaki uje paku isi ndi ŵana ŵidu.” 26  Pavuli paki, Pilato wanguŵafwatuliya Baraba ndipu wangulamula kuti Yesu wakwechuliki ndipu wangumupereka kuti wakapayikiki pachimiti. 27  Sonu asilikali a nduna anguto Yesu ndi kuluta nayu kunyumba ya nduna yo, ndipu anguwunganiska gulu losi la asilikali kwaku iyu. 28  Ŵati amuzuwa malaya ngaki ngakubwalu, angumuvwalika chisalu chiyera, 29  anguluka chisoti chaufumu cha minga ndi kumuvwalika kumutu ndipu angumupaska deti kujanja laki lamaryi. Angumugwadiya ndipuso angumunyoza mwakukamba kuti: “Timoneni, Fumu ya Ayuda!” 30  Angumufunyiya mata, anguto deti ndi kwamba kumupuma nalu pamutu. 31  Pakumaliya paki, ŵati amunyoza, angumuzuwa chisalu ndipu angumuvwalika malaya ngaki ngakubwalu ndi kuluta nayu kuti wakakhomeki pachimiti. 32  Achituwa angusaniya munthu munyaki wa ku Kureni yo wadanika kuti Simoni. Yiwu angumuchichizga kuti wapingi chimiti chakutombozgekiyapu* chaku Yesu. 33  Ŵati afika pamalu ngo ngadanika kuti Gologota kung’anamuwa kuti Malu nga Bwaza, 34  angumupaska vinyu wakusazgaku vinthu vakuŵaŵa* kuti wamwi, kweni wati wamuyesa wangukana kumwa. 35  Ŵati amukhoma pachimiti, angugaŵana malaya ngaki ngakubwalu mwakuchita mayeri, 36  ndipu anguja penipo kuti achiti ulonda. 37  Kweniso pachanya pa mutu waki angukhomapu chikwangwani cho angulembapu mulandu wo amumbanga kuti: “Uyu ndi Yesu, Fumu ya Ayuda.” 38  Ndipu ankhungu ŵaŵi angupayikikiya nayu limoza pavimiti, munyaki kujanja laki lamaryi ndipu munyaki kujanja laki lamazge. 39  Ŵanthu wo ajumphanga nthowa amunyozanga, apukunyanga mitu yawu 40  ndi kukamba kuti: “Asi yiwi watingi ungabwanganduwa nyumba yakusopiyamu ndi kuyizenga so mu mazuŵa ngatatu, jitaski na! Asani ndiwi mwana waku Chiuta, sika pachimiti chakutombozgekiyapu!”* 41  Ŵara ŵa asembi, alembi kweniso ŵara, nawu so amunyozanga kuti: 42  “Ŵanthu anyaki waŵataskanga; kweni mweneku watondeka kujitaska! Iyu ndi Fumu ya Ayisirayeli, wasiki pachimiti chakutombozgekiyapu* kuti timugomezgi. 43  Asi wathemba Chiuta; wamutaski cha yo Chiuta asani watimuyanja, chifukwa wangukamba kuti, ‘Nde Mwana waku Chiuta.’” 44  Ankhungu wo angukhomeke nayu limoza, nawu so amunyozanga. 45  Kutuliya mu ora la 6* mpaka mu ora la 9,* charu chosi chinguchita mdima. 46  Mu ora la 9, Yesu wangudaniriza kuti: “Eli, Eli, lama sabakatani?” kung’anamuwa kuti, “Chiuta wangu, Chiuta wangu, ntchifukwa wuli mwandisiya?” 47  Ŵanthu anyaki wo anguma penipo ŵati avwa venivi, angwamba kukamba kuti: “Munthu uyu wadana Eliya.” 48  Nyengu yeniyo, munthu munyaki wangutchimbiya ndi kuchito buwula, wangumubizga muvinyu wakunthyanthyama, wanguŵika kudeti ndipu wangumupaska kuti wamwi. 49  Kweni ŵanthu anyaki wosi angukamba kuti: “Mulekeni! Tiwoni asani Eliya wazengi kuzimutaska.” 50  Sonu Yesu wangudaniriza so ukongwa ndipu wangumalizika.* 51  Ndipu awonani! Ketani ya munyumba yakusopiyamu* yinguperuka pakati kutuwa pachanya mpaka pasi, charu chingundengandenga ndipu mya yingusweka. 52  Miwunda* yingujulika ndipu mathupi nganandi nga ŵanthu akupaturika wo akufwa kali ngangutuliya kubwalu 53  ndipu ŵanthu anandi angungawona. (Yesu wati wayuskika, ŵanthu anandi wo angutuwa kumasanu angusere mutawuni yakupaturika.) 54  Kweni mura wa asilikali ndi anyaki wo walindiyanga nawu limoza Yesu, ŵati awona chidilirisi ndi vo vachitikanga, anguchita mantha ukongwa ndipu angukamba kuti; “Munthu uyu wenga nadi Mwana waku Chiuta.” 55  Ndipu anthukazi anandi awoniyanga chapataliku. Yiwu angulondo Yesu kutuliya ku Galileya kuti amuphweriyengi; 56  pa gulu lawu penga Mariya wa ku Magadala, Mariya anyina aku Yakobe ndi Yose kweniso anyina aku Yakobe ndi Yohane.* 57  Sonu kwenga kuti kwafipa, kunguza munthu munyaki wakukhupuka wa ku Arimatiya yo wadanika kuti Yosefi kweniso yo wanguja wakusambira waku Yesu. 58  Munthu uyu wanguluta kwaku Pilato kuchipempha thupi laku Yesu ndipu Pilato wangulamula kuti amupaski. 59  Yosefi wanguto thupi laku Yesu ndi kulikulunga musalu yakutowa, yamampha ukongwa, 60  ndipu wanguliŵika mumuwunda* wufya wo wanguwujoba mujalawi. Wati wakunkhuziyapu chimwa chikulu pakhomu la muwunda* wo, wangutuwaku. 61  Kweni Mariya wa ku Magadala ndi Mariya munyaki, angulutirizga kuja kweniko, pafupi ndi masanu. 62  Mawa laki, pavuli pa Zuŵa Lakunozgeke, ŵara ŵa asembi ndi Afarisi anguwungana kwaku Pilato. 63  Yiwu angukamba kuti: “Bwana, takumbuka kuti munthu waboza yuwa weche ndi umoyu wangukamba kuti, ‘Ndazamuyuskika asani pajumpha mazuŵa ngatatu.’ 64  Sonu lamulani kuti masanu ngakavikiliriki mpaka pa zuŵa lachitatu kuti akusambira ŵaki aleki kuzimuba ndi kukambiya ŵanthu kuti, ‘Wakuyuskika ku nyifwa!’ Asani vingaŵa viyo, boza lachiŵi ili liŵengi lakofya ukongwa kuluska lakwamba.” 65  Pilato wanguŵakambiya kuti: “Mungato asilikali. Lutani, mukangavikiliyi mo mungafiskiya.” 66  Mwaviyo, anguluta kuchivikiliya muwunda wo mwakumatiliya chimwa cho kweniso anguŵikapu asilikali.

Mazu Ngam'mphata

Pamwenga kuti, “Wabayikiyi.”
Wonani Mazu ngo Ngakonkhoskeka.
Vinthu vakuŵaŵa ivi avipanganga kutuliya ku vakume.
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Cha mu ma 12 koloku msana.
Cha mu ma 3 koloku mazulu.
Mazu ngaki chayingu, “wangupereka mzimu waki.”
Ketani iyi yapatuwanga Malu Ngakupaturika Ukongwa ku Malu Ngakupaturika.
Pamwenga kuti, “Miwunda yachikumbusu.”
Mazu ngaki chayingu, “anyinawu a ŵana aku Zebediya.”
Pamwenga kuti, “mumuwunda wachikumbusu.”
Pamwenga kuti, “muwunda wachikumbusu.”