Julani

Lutani pa vo ve mukati

Mateyu 22:1-46

NKHANI ZO ZE MUBUKU ILI

  • Ntharika ya phwandu la nthengwa (1-14)

  • Vaku Chiuta ndi vaku Kayisara (15-22)

  • Fumbu lakukwaskana ndi chiyuka (23-33)

  • Marangu ngaŵi ngakulungakulu (34-40)

  • Kumbi Khristu ndi mwana waku Davidi? (41-46)

22  Yesu wangulutirizga kukambiskana nawu mwantharika ndipu wanguti:  “Ufumu wakuchanya tingawuyeruzgiya ndi phwandu lanthengwa lo fumu yingunozge mwana waki munthulumi.  Ndipu fumu yo yingutuma akapolu ŵaki kuti akadaniyi ŵanthu ku phwandu lanthengwa, kweni akudanika wo angukana kuza.  Yingutuma so akapolu anyaki ndipu yinguti, ‘Kaŵakambiyeni akudanika wo kuti: “Awonani! Ndanozga kali chakurya chamsana, ndabaya nkhuzi zangu ndipuso nyama zakututuŵa ndipu chechosi chanozgeka kali. Zani kunu ku phwandu lanthengwa.”’  Kweni yiwu angutoliyaku kanthu cha ndipu angutuwapu, anyaki anguluta kuminda yawu, penipo anyaki anguluta kumalonda ngawu,  kweni anyaki anguko akapolu wo, anguŵachitiya phuzu ndi kuŵabaya.  “Fumu yingukwiya ukongwa ndipu yingutuma asilikali ŵaki kuchibaya ŵanthu wo angubaya akapolu ŵaki ndi kuwotcha tawuni yawu.  Pavuli paki, fumu yingukambiya akapolu ŵaki kuti, ‘Phwandu lanthengwa lanozgeka kweni wo angudanika mbambula kwenere.  Mwaviyo, lutani mumisewu ya mutawuni ndipu mukadani weyosi yo mwakumusaniya kuti wazi kuphwandu lanthengwa.’ 10  Akapolu wo anguluta mumisewu nge mo angutumikiya ndipu angudana wosi wo angusaniya, aheni ndi amampha viyo. Ndipu holu yakuchitiyamu zowala yinguzaza ndi ŵanthu akudanika.* 11  “Fumu yati yaza kuziyendere alendu, yinguwona munthu munyaki yo wanguleka kuvwala chakuvwala chanthengwa. 12  Sonu yingumufumba kuti, ‘Ayimwi, mwasere wuli munu kwambula chakuvwala chanthengwa?’ Munthu yo wangusoŵa chakukamba. 13  Pavuli paki, fumu yingukambiya ateŵeti ŵaki kuti, ‘Mumangeni manja ndi malundi ndipu mumuponyi kubwalu ku mdima. Ndipu kweniko wamuliyanga ndi kukukuta minyu.’ 14  “Pakuti akudanika mbanandi, kweni akusankhika mbamanavi.” 15  Pavuli paki, Afarisi angumupangiya wupu kuti akamusaniyi vifukwa pa vo wakambengi. 16  Mwaviyo, angutuma akusambira ŵawu pamoza ndi gulu laku Herodi kuchimukambiya kuti: “Msambizi, tiziŵa kuti mukamba vinthu mwauneneska ndipu musambiza nthowa yaku Chiuta mwauneneska kweniso muchita vinthu kuti ŵanthu akuyanjiyeningi cha, chifukwa muchita vinthu mwakutole mo munthu wawoneke cha. 17  Sonu atikambiyeni, muwona wuli? Kumbi nkhwakwenere* kupereka msonkhu kwaku Kayisara pamwenga cha?” 18  Kweni Yesu wanguziŵa maŵanaŵanu ngawu ngaheni ndipu wangukamba kuti: “Akunyenga yimwi, mutindiyesiyanji? 19  Ndilongoni ndalama ya msonkhu.” Angumupaska dinari. 20  Iyu wanguŵakambiya kuti: “Kumbi chikozgu ichi ndi mazu yanga vaku yani?” 21  Yiwu anguti: “Vaku Kayisara.” Iyu wanguŵakambiya kuti: “Mwaviyo, perekani vinthu vaku Kayisara kwaku Kayisara, vaku Chiuta kwaku Chiuta.” 22  Ŵati avwa venivi, anguzizwa ukongwa ndipu angumuleka ndi kutuwapu. 23  Pa zuŵa lo, Asaduki, wo akambanga kuti kulivi chiyuka, anguza kwaku iyu ndi kumufumba kuti: 24  “Msambizi, Mozesi wangukamba kuti: ‘Asani munthulumi wakuto wafwa kwambula kusiya mwana, mubali waki waharengi choko kuti wamuyuskiyi mbewu mubali waki.’ 25  Sonu tenga ndi anthulumi 7 a nyumba yimoza. Wakwamba wanguto kweni wangufwa kwambula mwana, ndipu mubali waki wanguhara choko. 26  Venivi vinguchitikiya so wachiŵi ndi wachitatu, mpaka wosi 7. 27  Pakumaliya paki, munthukazi yo nayu wangufwa. 28  Sonu pa chiyuka, kumbi munthukazi yo wazamuja muwolu waku yani pa anthulumi 7 yaŵa? Chifukwa wosi angutoranapu nayu.” 29  Yesu wanguŵamuka kuti: “Munangisa, chifukwa mutingaziŵa cha Malemba pamwenga nthazi yaku Chiuta. 30  Pakuti pa chiyuka, anthulumi ato cha, anthukazi ayirwa cha, kweni ŵe nge angelu kuchanya. 31  Pa nkhani ya kuyuskika kwa ŵanthu akufwa, kumbi mukuŵerenga cha vo Chiuta wakukukambiyani kuti: 32  ‘Ini ndini Chiuta waku Abrahamu, Chiuta waku Isaki ndipuso Chiuta waku Yakobe’? Iyu ndi Chiuta wa ŵanthu akufwa cha, kweni wa ŵanthu amoyu.” 33  Chigulu cha ŵanthu chati chavwa venivi chinguzizwa ukongwa ndi vo iyu wasambizanga. 34  Afarisi ŵati avwa kuti wasoŵesa chakukamba Asaduki, yiwu ndi asaduki angupanga wupu. 35  Yumoza waku yiwu wakuziŵa Dangu,* wanguyesa Yesu mwakumufumba kuti: 36  “Msambizi, kumbi dangu likulu ukongwa mu Dangu* ndi nili?” 37  Wangumumuka kuti: “‘Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi.’ 38  Lenili ndilu dangu likulu kweniso lakwamba. 39  Lachiŵi lakuyanana nalu ndakuti: ‘Uyanjengi munyaku nge mo utijiyanjiya wamweni.’ 40  Pa marangu ngaŵi ngenanga ndipu pagona Dangu* losi ndi Vakulemba va Achimi.” 41  Sonu Afarisi ŵati awungana, Yesu wanguŵafumba kuti: 42  “Kumbi muŵanaŵana kuti Khristu ndiyani? Kumbi ndi mwana waku yani?” Yiwu angumumuka kuti: “Ndi mwana waku Davidi.” 43  Iyu wanguŵafumba kuti: “Nanga ntchifukwa wuli, Davidi mwakulongozgeka ndi mzimu wangumudana kuti Ambuya po wanguti, 44  ‘Yehova wangukambiya Ambuya kuti: “Ja kujanja langu lamaryi mpaka po ndaŵikiya arwani ŵaku kusi kwa maphazi ngaku”’? 45  Sonu asani Davidi wangudana Khristu kuti Ambuya, nanga waŵa wuli mwana waki?” 46  Pengavi yo wangwesa kumumuka ndipu kutuliya pa zuŵa lo, pengavi yo wangulutirizga kumufumbiya dala mafumbu.

Mazu Ngam'mphata

Pamwenga kuti, “ŵanthu wo anguza kuzirya chakurya.”
Pamwenga kuti, “dangu lizomereza.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Wonani Mazu ngo Ngakonkhoskeka.