Julani

Lutani pa vo ve mukati

Mateyu 21:1-46

NKHANI ZO ZE MUBUKU ILI

  • Yesu wasere mu Yerusalemu mwaunkhankhu (1-11)

  • Yesu watowesa nyumba yakusopiyamu (12-17)

  • Chimiti cha mkuyu chitembeka (18-22)

  • Afumba ko Yesu wato mazaza (23-27)

  • Ntharika ya ŵana anthulumi ŵaŵi (28-32)

  • Ntharika ya alimi akubaya (33-46)

    • Mwa wapakona wo anguwukana (42)

21  Ŵati afika kufupi ndi Yerusalemu, anguma ku Betifage pa Phiri la Maolivi, ndipu Yesu wangutuma akusambira ŵaŵi.  Iyu wanguŵakambiya kuti: “Lutani mumuzi wo we panthazi po ndipu mwamusaniya bulu yo amumangiriya kweniso mwana waki. Kaŵafwatuweni ndi kuza nawu kwaku ini.  Asani munthu munyaki wachikufumbani mukakambi kuti, ‘Ambuya atiŵakhumba.’ Asani mwachikamba ŵaka viyo, wakukupaskani nyengu yeniyo.”  Ivi vinguchitika kuti vifiski vo vingukambikiya limu kuporote mwa mchimi kuti:  “Kambiyani mwana munthukazi waku Ziyoni kuti: ‘Awona! Fumu yaku yituza kwaku yiwi, njakuzika ndipu yakwera pabulu, pakabulu, pamwana wa nyama yakunyamuwa katundu.’”  Mwaviyo, akusambira anguluta ndipu anguchita nge mo Yesu wanguŵakambiya.  Anguza nayu bulu pamoza ndi mwana waki, angutandikapu malaya ngawu ngakubwalu pachanya paku yiwu ndipu iyu wangukwerapu.  Ŵanthu anandi angutandika malaya ngawu ngakubwalu mumsewu ndipu anyaki afyonga vivwati ndi kuvitandika mumsewu.  Ndipuso chigulu cha ŵanthu cho chenga panthazi paku Yesu ndi cho chenga pavuli paki chadanirizanga kuti: “Mutaskeni chondi,* Mwana waku Davidi! Wakutumbikika ndiyu yo watuza mu zina laku Yehova! Mutaskeni chondi, yimwi mwe kuchanya!” 10  Wati wasere mu Yerusalemu, tawuni yosi yinguyaŵayika ndipu ŵanthu atingi: “Ndiyani mwenuyu?” 11  Chigulu cha ŵanthu chingulutirizga kukamba kuti: “Uyu ndi mchimi Yesu wa ku Nazareti, ku Galileya!” 12  Yesu wangusere munyumba yakusopiyamu, wangudikisa wo agulanga ndi kugulisa vinthu munyumba yakusopiyamu ndipu wangugudubuwa mathebulu nga akusintha ndalama kweniso mipandu ya akugulisa nkhunda. 13  Iyu wanguŵakambiya kuti: “Malemba ngatiti, ‘Nyumba yangu yazamudanika kuti nyumba yakupempheriyamu,’ kweni yimwi mwayisambuska mphanji* ya ankhungu.” 14  Kusazgiyapu pa venivi, ŵanthu achibulumutiya ndi akupunduka anguza kwaku iyu munyumba yakusopiyamu ndipu wanguŵachizga. 15  Ŵara ŵa asembi ndi alembi angukwiya ukongwa ŵati awona vakuziziswa vo iyu wanguchita ndipuso anyamata wo adanirizanga munyumba yakusopiyamu kuti, “Mutaskeni chondi, Mwana waku Davidi!” 16  ndipu angumufumba kuti: “Kumbi utuvwa vo yaŵa akamba?” Yesu wanguŵamuka kuti: “Hinya. Kumbi mukuŵerenga cha venivi kuti, ‘Mumulomu mwa ŵana mutuwengi mazu ngakuthamika’?” 17  Iyu wanguŵasiya ku Yerusalemu ndi kuluta ku Betaniya ndipu wanguchigona kweniko. 18  Ndi mlenjilenji wachiwere ku Yerusalemu, Yesu wanguvwa nja. 19  Iyu wanguwona chimiti cha mkuyu mumphepeti mwa msewu ndipu wanguluta pafupi, wangusaniyamu chipasu chechosi cha kweni mani pe, ndipu wanguchikambiya kuti: “Kwamba msanawale upasengi so cha.” Ndipu chimiti cha mkuyu cho chingufota nyengu yeniyo. 20  Akusambira ŵaki ŵati awona venivi, anguzizwa ukongwa ndipu anguti: “Vachitika wuli kuti chimiti cha mkuyu chifoti nyengu yeniyo?” 21  Yesu wanguŵamuka kuti: “Nditikuneneskiyani, asani mungaŵa ndi chivwanu ndipuso mungaleka kukayika, mwazamuchita ivi pe cha, kweni asani mwazikambiya phiri ili kuti, ‘Soka panu, ukajiponyi munyanja,’ vazamuchitika nadi. 22  Ndipu vinthu vosi vo mwazamupempha mwachivwanu, mwazamupaskika.” 23  Wati wasere munyumba yakusopiyamu, ŵara ŵa asembi ndi ŵara anguza kwaku iyu wachisambiza ndipu angumufumba kuti: “Kumbi mazaza ngakuchitiya ivi utuwa nangu pani? Ndipu ndiyani yo wakukupaska mazaza ngenanga?” 24  Yesu wanguŵamuka kuti: “Nani ndikufumbeni fumbu limoza. Asani mwandimuka, ndikukambiyeningi ko kutuwa mazaza ngo ndichitiya ivi: 25  Kumbi ubatizu waku Yohane ukutuliya nunkhu? Kuchanya pamwenga ku ŵanthu?” Yiwu angwamba kukambiskana kuti: “Asani takamba kuti, ‘Ukutuliya kuchanya,’ watikambiyengi kuti, ‘Ntchifukwa wuli munguleka kumugomezga?’ 26  Kweni asani takamba kuti, ‘Ukutuliya ku ŵanthu,’ chigulu cha ŵanthu chitiyukiyengi chifukwa wosi awona kuti Yohane ndi mchimi.” 27  Sonu angumumuka kuti: “Tiziŵa cha.” Ndipu Yesu nayu wanguŵamuka kuti: “Nani ndikukambiyeningi cha ko kutuwa mazaza ngo ndichitiya ivi. 28  “Kumbi muŵanaŵana wuli? Munthu munyaki wenga ndi ŵana anthulumi ŵaŵi. Wanguluta ku mwana wakwamba ndi kumukambiya kuti, ‘Wamwana luta ukagwiri ntchitu mumunda wa mphereska.’ 29  Mwana yo wangumuka kuti, ‘Ndilutengeku cha,’ kweni pavuli paki wangujisuska ndipu wanguluta. 30  Wanguluta so ku mwana waki wachiŵi ndipu wangumukambiya mazu ngakuyanana. Iyu wangumuka kuti, ‘Ndilutengi Ada,’ kweni wangulutaku cha. 31  Kumbi ndi mwana nuyu yo wanguchita khumbu la awisi?” Yiwu angumuka kuti: “Wakwamba.” Yesu wanguŵakambiya kuti: “Nadi nditikukambiyani, akusonkhesa msonkhu ndi mahuli atikudanjiriyani kusere mu Ufumu waku Chiuta. 32  Chifukwa Yohane wanguza mu urunji, kweni mungumugomezga cha. Kweni akusonkhesa msonkhu ndi mahuli angumugomezga, chinanga kuti munguviwona ivi kweni pavuli paki mungujisuska cha kuti mumugomezgi. 33  “Avwani ntharika yinyaki: Penga munthu munyaki yo wenga ndi munda. Iyu wangupandamu mphereska ndipu wanguwuzungulizga ndi mpanda, wangukumba chakukandiyamu mphereska ndi kuzenga chigongwi, pavuli paki wanguwupereka kwa alimi ndipu wanguluta ku ulendu. 34  Nyengu yakuvuniya vipasu yati yakwana, wangutuma akapolu ŵaki kuti akato vipasu kwa alimi. 35  Kweni alimi wo anguko akapolu wo, munyaki angumupuma, munyaki angumubaya ndipu munyaki angumuponya ndi mya mpaka kufwa. 36  Wangutuma so akapolu anyaki anandi kuphara gulu lakwamba kweni anguchita so nawu nge mo anguchitiya ndi akwamba. 37  Pakumaliya wangutuma mwana waki, ndipu wanguti: ‘Mwana wangu pe akumutumbika.’ 38  Alimi ŵati awona mwana waki angukamba kuti, ‘Mwenuyu ndiyu waharengi. Tiyeni timubayi kuti tihari chihara chaki!’ 39  Mwaviyo, angumuto ndi kumuponya kubwalu kwa munda wa mphereska ndipu angumubaya. 40  Sonu asani mweneku wa munda wa mphereska wawe, kumbi wazamuchitanji nawu alimi ŵenaŵa?” 41  Yiwu angumumuka kuti: “Chifukwa chakuti mbaheni, wazakuŵabaya ndipu wazamupereka munda wa mphereska wo kwa alimi anyaki, wo azakumupaska vipasu pa nyengu yaki.” 42  Yesu wanguŵakambiya kuti: “Kumbi mukuŵerenga cha m’Malemba kuti, ‘Mwa wo akuzenga anguwukana ndiwu waja mwa wapakona,* mwa wenuwu watuliya kwaku Yehova ndipu ngwakuziziswa mu masu ngidu’? 43  Ndichu chifukwa chaki nditikukambiyani kuti Ufumu waku Chiuta ulondekengi kwaku yimwi ndipu uperekekengi ku mtundu wo ungapasa vipasu vakwenere Ufumu. 44  Ndipuso munthu yo wawengi pa mwa wenuwu watimbinyukengi. Ndipu yo umuwiyengi, umusilengi.” 45  Ŵara ŵa asembi ndi Afarisi ŵati avwa ntharika zaki, anguziŵa kuti wakambanga yiwu. 46  Chinanga kuti akhumbanga kumuko,* angopa chigulu cha ŵanthu chifukwa ŵanthu wo awonanga kuti Yesu ndi mchimi.

Mazu Ngam'mphata

Mu Chigiriki, “Hosana.”
Wonani mazu ngamumphata pa Mateyu 8:20.
Mazu ngaki chayingu, “waja mutu wapakona.”
Pamwenga kuti, “kumumanga.”