Mateyu 11:1-30

  • Yesu wathamika Yohane Mubatizi (1-15)

  • Wasuska mugonezi wambula kuvwiya (16-24)

  • Yesu wathamika Awisi chifukwa atanja akujiyuyuwa (25-27)

  • Goli laku Yesu ndakusisipuwa (28-30)

11  Yesu wati wamaliza kuŵakambiya vakuchita akusambira ŵaki 12, wangutuwaku kweniko ndipu wangwamba kusambiza ndi kupharazga mumatawuni nganyaki.  Po Yohane wenga mujeri, wanguvwa vakukwaskana ndi ntchitu zo Khristu wachitanga ndipu wangutuma akusambira ŵaki  kuchimufumba kuti: “Kumbi ndimwi Yo taja tichilindizga, pamwenga kuzengi munyaki?”  Yesu wanguŵamuka kuti: “Lutani, mukamukambiyi Yohane vo mwavwa ndi kuwona:  Achibulumutiya awona sonu, akupunduka atenda, amakhati atoweseka, ambula kuvwa atuvwa, akufwa ayuskika ndipu akavu atuvwa uthenga wamampha.  Ngwakutumbikika yo waleka kuguŵa chifukwa chaku ini.”  Akusambira aku Yohane achiluta, Yesu wangwamba kukambiya chigulu cha ŵanthu vakukwaskana ndi Yohane kuti: “Kumbi munguluta kuchipululu kuchiwonanji? Kuchiwona deti lo lisukunyika ndi mphepu?  Sonu nanga munguluta kuchiwonanji? Munthu wakuvwala malaya ngakulimbwitika?* Wo avwala malaya ngakulimbwitika asanirika munyumba za mafumu.  Nanga mungulutiyanji? Kuchiwona mchimi? Nditikuneneskiyani, iyu ndi mchimi ŵaka cha, kweni waluska achimi. 10  Mwenuyu ndiyu Malemba ngakamba kuti: ‘Wonani! Nditumiza muthenga wangu panthazi paku,* yo wazakukunozge nthowa!’ 11  Nditikuneneskiyani, pa ŵanthu wosi wo akubalika ndi anthukazi, palivi munthu mura kuluska Yohane Mubatizi, kweni munthu yo we ndi udindu umana ukongwa mu Ufumu wakuchanya ndi mura kuluska iyu. 12  Kutuliya mu nyengu yaku Yohane Mubatizi kufika sonu, ŵanthu atesesa kupenja Ufumu wakuchanya ndipu wo atiwupenja mwaphamphu, atiwusaniya. 13  Chifukwa kuzifika mu nyengu yaku Yohane, Vakulemba va Achimi ndi Dangu* losi, vingukambiya limu vo vatingi vichitikengi. 14  Ndipu kwali muzomereza pamwenga cha, fundu njakuti iyu ndi ‘Eliya yo achimi angukambiya limu kuti watuza.’ 15  Yo we ndi makutu, wavwi. 16  “Kumbi mugonezi uwu ndingawuyeruzgiya ndi yani? We nge ŵana anamana wo aja mumisika ndipu akambiya anyawu mwakudaniriza, 17  kuti: ‘Tingukumbiyani fyoliru, kweni yimwi munguvina cha; tingubongo, kweni yimwi mungujipuma cha pachifuŵa chifukwa cha chitima.’ 18  Mwakuyanana ŵaka, Yohane wanguza ndipu waryanga cha pamwenga kumwa, kweni ŵanthu akamba kuti: ‘We ndi chiŵanda.’ 19  Mwana wa munthu wakuza ndipu waturya ndi kumwa kweni ŵanthu akamba kuti: ‘Awonani! Munthu uyu ndi munkharyi ndipu watanja kumwa vinyu, ndi munyawu wa akusonkhesa msonkhu ndi akubuda.’ Mwemosi mo vingaŵiya, zeru yiziŵika kuti njirunji* chifukwa cha ntchitu zaki.”* 20  Pavuli paki, wangwamba kuchenya matawuni ngo wanguchitaku ntchitu zaki zinandi zanthazi chifukwa ŵanthu a mumatawuni ngo angulapa cha. 21  Iyu wangukamba kuti: “Soka yiwi Korazini! Soka yiwi Betisayida! chifukwa asani ntchitu zanthazi zo zinguchitika mwaku yimwi, zinguchitikiya mu Turo ndi mu Sidoni, mphanyi ŵanthu a kweniko akulapa kali mwakuvwala vigudulu ndi kuja muvyotu. 22  Kweni nditikukambiyani kuti pa Zuŵa la Cheruzgu, cheruzgu chinu chazamukuŵa chikulu kuluska cha Turo ndi Sidoni. 23  Ndipuso yiwi Kaperenao, kumbi ukwezekengi mpaka kuchanya? Ku Masanu* ndiku wazamusikiya chifukwa asani ntchitu zanthazi zo zinguchitika mwaku yiwi zinguchitika mu Sodomu mphanyi tawuni yo yiliku mpaka sonu. 24  Kweni nditikukambiya, pa Zuŵa la Cheruzgu, cheruzgu chaku chazamukuŵa chikulu kuluska cha Sodomu.” 25  Pa nyengu yeniyo, Yesu wangukamba kuti: “Ada, Ambuya akuchanya ndi charu chapasi, nditikuthamikani pa masu pa ŵanthu, chifukwa mwabisiya vinthu ivi ŵanthu azeru ndi akusambira ndipu mwavumbuliya ŵana anamana. 26  Hinya Ada, chifukwa mwazomereza kuti vije viyo. 27  Vinthu vosi, Ada avipereka kwaku ini ndipu palivi yo watimuziŵa umampha Mwana kweni Ada pe. Ndipuso palivi yo watiŵaziŵa umampha Ada kweni Mwana pe ndi munthu weyosi yo Mwana wakhumba kumuvumbuliya Awisi. 28  Zani kwaku ini mosi yimwi akulakatuka ndi ntchitu ndipuso akufyoka ndi katundu muzitu, ndipu ini ndazakukusisipuwani. 29  Pingani goli langu ndipu sambirani kwaku ini chifukwa nde wakuzika kweniso wakujiyuyuwa ndipu mwazamusisipulika.* 30  Chifukwa goli langu ndipusu* kweniso katundu wangu ndimupepu.”

Mazu Ngam'mphata

Pamwenga kuti, “ngakudula?”
Mazu ngaki chayingu, “panthazi pa chisku chaku.”
Wonani Mazu ngo Ngakonkhoskeka.
Pamwenga kuti, “njauneneska.”
Pamwenga kuti, “chifukwa cha vo vichitika pavuli paki.”
Pamwenga kuti, “Hade.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
Pamwenga kuti, “mwazamusisipuwa umoyu winu.”
Pamwenga kuti, “ndambula kusuzga kupinga.”