Mariko 4:1-41

  • NTHARIKA ZA UFUMU (1-34)

    • Wakumija (1-9)

    • Chifukwa cho Yesu wagwiriskiyanga ntchitu ntharika (10-12)

    • Vo ntharika ya wakumija ying’anamuwa (13-20)

    • Nyali atiyibenekere ndi sokora cha (21-23)

    • Mwesu wo mupimiya anyinu (24, 25)

    • Wakumija yo wagona (26-29)

    • Kanje ka kamuganji (30-32)

    • Kugwiriskiya ntchitu ntharika (33, 34)

  • Yesu wachetamiska mphepu (35-41)

4  Yesu wangwamba so kusambiza mumphepeti mwa nyanja, ndipu chigulu chikulu cha ŵanthu chinguwungana kwaku iyu. Sonu iyu wangukwera boti ndi kuja mwenimo, pataliku ndi likumba, ndipu chigulu chosi chenga mulikumba.  Iyu wangwamba kuŵasambiza vinthu vinandi mwakugwiriskiya ntchitu ntharika. Wachiŵasambiza wangukamba kuti:  “Avwani! Wakumija mbewu wanguluta kuchimija.  Wachimija, mbewu yinyaki yinguwa mumphepeti mwa msewu ndipu tiyuni tinguza ndi kurya.  Yinyaki yinguwa pajalawi po pengavi dongu linandi ndipu yingubuka liŵi chifukwa dongu laki lenga ŵaka pachanyapachanya.  Kweni lumwi lati lakwera, yinguŵawuka ndi kufota chifukwa yengavi misisi.  Yinyaki yinguwa muminga ndipu minga yo yingukuwa ndi kuyifinyikiza, ndipu yingupasa vipasu cha.  Kweni yinyaki yinguwa padongu lamampha, ndipu yingukuwa ukongwa ndi kwamba kupasa vipasu, yinyaki 30, yinyaki 60 ndipu yinyaki 100.”  Wangukamba so kuti: “Yo we ndi makutu kuti wavwi, wavwi.” 10  Sonu wati waja kwakuyija, ŵanthu wo wenga nawu kweniso akusambira ŵaki 12 angwamba kumufumba vakukwaskana ndi ntharika yo wangukamba. 11  Iyu wanguŵakambiya kuti: “Yimwi mwapaskika chisisi chakupaturika cha Ufumu waku Chiuta, kweni ku ŵanthu anyaki wosi vinthu vosi vichitika mwantharika, 12  kuti chinanga kuti kulereska angalereska, kweni angawona cha, chinanga kuti kuvwa angavwa kweni angawamu cha; ndipu azamusintha cha kuti agowokereki.” 13  Wanguŵakambiya so kuti: “Asani muleka kuvwisa ntharika iyi, sonu nanga zinyaki zosi muzivwisengi wuli? 14  “Wakumija wamija mazu. 15  Mbewu yo yinguwa mumphepeti mwa msewu, ndi mazu ngo ngamijika mu ŵanthu wo asani avwa ŵaka mazu, Satana watuza ndi kutuzgamu mazu ngo ngamijika mwaku yiwu. 16  Penipo mbewu yakumijika pajalawi, ndi mazu ngo ngamijika mu ŵanthu wo asani avwa ŵaka mazu atingalonde mwalikondwa. 17  Yiwu aŵavi misisi ndipu alutirizga kwa kanyengu kamanavi kweni asani ateseka pamwenga atombozgeka chifukwa cha mazu, aswera cha kuguŵa. 18  Mbewu yinyaki yo yingumijika muminga, mbanthu wo atuvwa mazu, 19  kweni kufipa mtima ndi vinthu va mugonezi wunu* ndipuso chinyengu chanthazi cha chuma, ndi kukhumbira vinthu vinyaki vevosi, visere mumtima mwawu ndi kufinyikiza mazu ndipu apasa vipasu cha. 20  Ndipu mbewu yo yinguwa padongu lamampha ndi mazu ngo ngamijika mu ŵanthu wo atuvwa mazu ndi kungalonde umampha ndipu apasa vipasu, 30, 60 ndipuso 100.” 21  Yesu wanguŵakambiya so kuti: “Nyali atiyibenekere ndi sokola cha pamwenga kuyiŵika kusi kwa bedi. Asi atiyiŵika pachakuŵikapu nyali? 22  Pakuti palivi chinthu chakubisika cho chazamuleka kuziŵika, ndipu palivi chinthu chakubisika umampha cho chazamuleka kuvumbulika. 23  Yo we ndi makutu kuti wavwi, wavwi.” 24  Iyu wanguŵakambiya so kuti: “Muvwisiyengi mwakuphwere. Chifukwa mwesu wo mupimiya anyinu, namwi mwazamupimikiya weniwo, ndipu azakukusazgiyanipu vinandi. 25  Chifukwa weyosi yo wenavu, wapaskikengi vinandi, ndipu yo walivi, chinanga ndi vo wenavu walondekengi.” 26  Wangulutirizga kukamba kuti: “Mu nthowa yeniyi, Ufumu waku Chiuta uyanana ŵaka ndi munthu yo wamija mbewu padongu. 27  Ndi usiku, iyu wagona, asani kwacha wayuka, ndipu mbewu yime ndi kukuwa, kweni waziŵa cha mo yikuliya. 28  Dongu lipasa vipasu pakulija kamanakamana, chakwamba mbewu yime, pavuli paki yilapuka, ndipu pakumaliya yitucha. 29  Kweni asani mbewu yo yacha, watiyivuna ndi chisenga, chifukwa nyengu yakuvuniya yakwana.” 30  Yesu wangulutirizga so kukamba kuti: “Kumbi Ufumu waku Chiuta tingawuyeruzgiya ndi chinthu wuli, pamwenga tingawukonkhoska mwakugwiriskiya ntchitu ntharika niyi? 31  We nge kanje ka kamganji ko pa nyengu yo kapandika, kaja kamana ukongwa kuluska nje zosi za pacharu. 32  Kweni asani kapandika, kakuwa ukongwa kuluska mphangwi zosi ndipu kaja ndi mphanda zikuluzikulu mwakuti tiyuni tamude tisaniya malu ngakujamu mumduzi waki.” 33  Iyu wanguŵakambiya mazu mwakugwiriskiya ntchitu ntharika zinandi zange zenizi, mwakulingana ndi vo angafiska kuvwa. 34  Kukamba uneneska, waŵasambizanga cha kwambula ntharika, kweni akusambira ŵaki waŵakonkhoskiyanga vinthu vosi kwakuŵija. 35  Ndipu ndi mazulu pa zuŵa lenilo, wanguŵakambiya kuti: “Tiyeni tiyambukiyi kusirya linyaki.” 36  Sonu ŵati akambiya chigulu cha ŵanthu kuti chikengi, akusambira ŵaki angumupinga muboti nyengu yeniyo, kweni anguluta so ndi maboti nganyaki. 37  Sonu kungwamba chimphepu chikulu ndipu mayiŵa ngapumanga boti lo, mwakuti linguja kamanavi kubila. 38  Kweni Yesu wenga kuvuli kwa boti ndipu wangugona papilu. Sonu yiwu angumuyuska ndi kukamba kuti: “Msambizi, muwona cha kuti titufwa?” 39  Nyengu yeniyo wanguyuka ndi kuchenya mphepu yo kuti: “Leka! Ja cheti!” Mphepu yinguleka ndipu nyanja yingugona. 40  Sonu iyu wanguŵakambiya kuti: “Ntchifukwa wuli muchita mantha? Kumbi mulivi nkhani chivwanu mpaka sonu?” 41  Kweni yiwu anguchita mantha ukongwa ndipu akambiskananga kuti: “Ndi munthu wamtundu wuli uyu? Chinanga ndi mphepu kweniso nyanja vitimuvwiya.”

Mazu Ngam'mphata

Pamwenga kuti, “va nyengu yinu.” Wonani Mazu ngo Ngakonkhoskeka.