Mariko 10:1-52

  • Nthengwa kweniso kupatana (1-12)

  • Yesu watumbika ŵana (13-16)

  • Fumbu la munthu wachuma (17-25)

  • Kujipereka chifukwa cha Ufumu (26-31)

  • Nyifwa yaku Yesu yikambikiya limu so (32-34)

  • Pemphu laku Yohane ndi Yakobe (35-45)

    • Yesu ndi sembi yakuwombole ŵanthu anandi (45)

  • Batimeyu wachibulumutiya wachizgika (46-52)

10  Wati watuwa kwenuku, wangufika kumphaka za Yudeya, kusirya linyaki la msinji wa Yorodani ndipu chigulu cha ŵanthu chinguwungana so kwaku iyu. Nge mo wachitiyanga nyengu zosi, wangwamba so kuŵasambiza.  Afarisi anguza kwaku iyu ndi chilatu chakuti amuyesi ndipu yiwu angumufumba asani marangu ngazomereza kuti munthulumi wapati muwolu waki.  Iyu wanguŵamuka kuti: “Kumbi Mozesi wakukulamulani kuti wuli?”  Yiwu angukamba kuti: “Mozesi wakuzomereza kupereka kalata yachipata ndi kumupata.”  Kweni Yesu wanguŵakambiya kuti: “Mozesi wangukulembiyani dangu ili chifukwa cha kunonopa kwa mitima yinu.  Kweni kutuliya pakwamba pa kulengeka kwa vinthu, ‘Chiuta wangulenga munthulumi ndi munthukazi.  Pa chifukwa chenichi, munthulumi wazamuleka awisi ndi anyina  ndipu wosi ŵaŵi azamuja liŵavu limoza,’ mwakuti mbaŵi so cha, kweni liŵavu limoza.  Mwaviyo, cho Chiuta wamanga pamoza, munthu wangapatuwanga cha.” 10  Pa nyengu yo ŵenga so munyumba, akusambira ŵaki angwamba kumufumba nkhani yeniyi. 11  Iyu wanguŵamuka kuti: “Weyosi yo wapata muwolu waki ndi kuto munthukazi munyaki, wamuchitiya chigololu, 12  kweniso asani munthukazi wapata mulumu waki ndipu watorana ndi munthulumi munyaki, ndikuti wachita chigololu.” 13  Sonu ŵanthu angwamba kuza ndi ŵana kuti waŵiki manja ngaki paku yiwu, kweni akusambira ŵaki anguŵakalipiya. 14  Yesu wati wawona venivi, wangukwiya ndipu wanguŵakambiya kuti: “Alekeni ŵana azi kwaku ini, mungaŵakanizanga cha, chifukwa Ufumu waku Chiuta ngwa ŵanthu ange ŵana ŵenaŵa. 15  Nditikuneneskiyani kuti weyosi yo watondeka kulonde Ufumu waku Chiuta nge mwanamana, wazamuserepu cha mu Ufumu wo.” 16  Sonu wangunyamuwa ŵana wo, ndipu wangwamba kuŵatumbika ndi kuŵika manja ngaki paku yiwu. 17  We munthowa, munthu munyaki wangumutchimbiriya ndi kumujikamiya panthazi paki, ndipu wangumufumba kuti: “Msambizi wamampha, kumbi ndikhumbika kuchitanji kuti ndizilonde umoyu wamuyaya?” 18  Yesu wangumufumba kuti: “Ntchifukwa wuli utindidana kuti wamampha? Wamampha walipu yumoza pe, yo ndi Chiuta. 19  Asi utingaziŵa marangu ngakuti: ‘Ungabayanga munthu cha, ungachitanga chigololu cha, ungabanga cha, ungaperekanga ukaboni waboza cha, ungalondanga vinthu va munyaku mwauryarya cha, ndipuso tumbika awusu ndi anyoku!’” 20  Munthu yo wangumukambiya kuti: “Msambizi, ndaja ndichisunga marangu ngosi ngenanga kwamba pa unamana wangu.” 21  Yesu wati wamulereseska wangumuyanja ukongwa ndipu wangumukambiya kuti, “Pe chinthu chimoza cho ukhumbika kuchita. Luta ukagulisi vinthu vosi vo wenavu ndipu ndalama zaki ukapaski akavu. Asani wachita viyo, uŵengi ndi chuma kuchanya ndipu ukazi kuti uzije wakusambira wangu.” 22  Iyu wanguguŵa ukongwa chifukwa cha vo Yesu wangumukambiya ndipu wangutuwapu we ndi chitima chifukwa wenga ndi katundu munandi. 23  Wati walereskalereska, Yesu wangukambiya akusambira ŵaki kuti: “Vazamukuŵa vakusuzga ukongwa kuti ŵanthu wo ŵe ndi ndalama azisere mu Ufumu waku Chiuta!” 24  Kweni akusambira ŵaki anguzizwa ndi vo wangukamba. Sonu Yesu wanguŵakambiya kuti: “Mwaŵana, ntchinthu chakusuzga ukongwa kuti munthu wasere mu Ufumu waku Chiuta! 25  Ntchipusu kuti ngamila yisere pajisu la zingani, kuluska kuti munthu wachuma wasere mu Ufumu waku Chiuta.” 26  Yiwu angulutirizga kuzizwa ndi vo wakambanga ndipu angumukambiya* kuti: “Sonu ndiyani yo wangataskika?” 27  Yesu wanguŵalereseska ndipu wangukamba kuti: “Ku ŵanthu vingachitika cha, kweni ve viyo cha ndi Chiuta, chifukwa palivi cho Chiuta watondeka kuchita.” 28  Peturo wangumukambiya kuti: “Awonani! Isi taleka vinthu vosi ndi kulondo yimwi.” 29  Yesu wangumuka kuti: “Nditikuneneskiyani kuti palivi munthu yo waleka nyumba, avurwa ŵaki, aku ŵaki, azichi ŵaki, anyina, awisi, ŵana pamwenga minda chifukwa chaku ini kweniso chifukwa cha uthenga wamampha 30  yo wangatondeka kulonde maulendu 100, nyumba, avurwa ŵaki, aku ŵaki, azichi ŵaki, anyina, ŵana pamwenga minda limoza ndi kutombozgeka mu nyengu yinu ndipuso umoyu wamuyaya mu mugonezi wo utuza.* 31  Kweni ŵanthu anandi wo ŵe kukwamba azamuja kukumaliya, ndipu wo ŵe kukumaliya azamuja kukwamba.” 32  Sonu yiwu alutanga ku Yerusalemu, Yesu ndiyu wenga panthazi pawu ndipu yiwu anguzizwa ukongwa, kweni wo amulondonga angwamba kuchita mantha. Wangutole so akusambira ŵaki 12 pamphepeti ndi kwamba kuŵakambiya vinthu vo vimuchitikiyengi. Iyu wangukamba kuti: 33  “Awonani! Tiluta ku Yerusalemu ndipu Mwana wa munthu wamuperekeka ku ŵara ŵa asembi ndi alembi. Yiwu akumuyeruzga kuti wabayiki, azakumupereka ku ŵanthu amitundu yinyaki, 34  azakumunyoza, azakumufunyiya mata, azakumukwechuwa kweniso azakumubaya, kweni pa zuŵa lachitatu* wazamuyuskika.” 35  Ŵana ŵaŵi aku Zebediya, Yakobe ndi Yohane, anguza kwaku Yesu ndipu angumukambiya kuti: “Msambizi, tikhumba kuti mutichitiyi chechosi cho tingakupemphani.” 36  Iyu wanguŵafumba kuti: “Mukhumba kuti ndikuchitiyeninji?” 37  Yiwu angumumuka kuti: “Tizomerezeni kuti mu Ufumu* winu, munyaki wakaje kujanja linu lamaryi, munyaki kujanja linu lamazge.” 38  Yesu wanguŵakambiya kuti: “Mutichiziŵa cha cho mupempha. Kumbi mungamwa kapu yo ini nditumwa pamwenga mungabatizika ndi ubatizu wo ini ndibatizika?” 39  Yiwu angumuka kuti: “Hinya tingamwa.” Yesu wati wavwa venivi wanguŵakambiya kuti: “Mumwengi nadi kapu yo nditumwa, ndipu ubatizu wo ndibatizika, namwi mubatizikengi weniwo. 40  Kweni nkhwaku ini cha kusankha kuti uyu wajengi kujanja langu lamaryi, uyu kujanja langu lamazge, kweni Ada ndiwu aziŵa wo aŵanozge kuti aŵapaski.” 41  Akusambira anyaki 10 ŵati avwa venivi, angukwiyiya Yakobe ndi Yohane. 42  Kweni Yesu wanguŵadana ndipu wanguŵakambiya kuti: “Yimwi muziŵa kuti ŵanthu wo awoneka* kuti awusa charu ichi achita ufumu pa ŵanthu ŵawu ndipu ŵanthu wo ŵe ndi mazaza akandirizga anyawu. 43  Kweni yimwi mungachitanga viyo cha. Weyosi yo wakhumba kuja mura pakati pinu, waje mteŵeti winu, 44  ndipu weyosi yo wakhumba kuja wakwamba pakati pinu, watenere kuja kapolu waku mosi. 45  Pakuti chinanga ndi Mwana wa munthu wakuza kuti ŵanthu amuteŵete cha, kweni kuziteŵete ndi kupereka umoyu waki sembi yakuwombole ŵanthu anandi.” 46  Sonu angufika ku Yeriko, kweni iyu ndi akusambira ŵaki kweniso gulu linyaki la ŵanthu achituwa ku Yeriko, Batimeyu (mwana waku Timeyu), wakupempheska wachibulumutiya, wanguja mumphepeti mwa msewu. 47  Wati wavwa kuti kujumpha Yesu wa ku Nazareti wangwamba kudaniriza kuti: “Yesu, Mwana waku Davidi, ndichitiyeni lisungu!” 48  Ŵanthu anandi ŵati avwa venivi, angwamba kumukalipiya kweniso kumukambiya kuti waje cheti, kweni ndipu iyu wadanirizanga ukongwa kuti: “Mwana waku Davidi, ndichitiyeni lisungu!” 49  Sonu Yesu wanguma ndipu wangukamba kuti: “Mudaniyeni kunu.” Yiwu angumudana ndipu angumukambiya kuti: “Khwima mtima! Soka; watikudana.” 50  Iyu wanguponya pasi malaya ngaki ngakubwalu, wangusoka mwaliŵiliŵi ndi kuluta kwaku Yesu. 51  Sonu Yesu wangumufumba kuti: “Ukhumba kuti ndikuchitiyenji?” Munthu yo wangumumuka kuti: “Raboni,* ndikhumba kuti ndiyambi so kulereska.” 52  Ndipu Yesu wangumukambiya kuti: “Lutanga. Chivwanu chaku chakuchizga.” Nyengu yeniyo, wangwamba so kulereska ndipu wangwamba kumulondo.

Mazu Ngam'mphata

Panyaki kuti, “akambiskananga.”
Pamwenga kuti, “mu nyengu yo yituza.” Wonani Mazu ngo Ngakonkhoskeka.
Mazu ngaki chayingu, “asani pajumpha mazuŵa ngatatu.”
Mazu ngaki chayingu, “mu unkhankhu.”
Pamwenga kuti, “wo aziŵika.”
Kung’anamuwa kuti, “Msambizi.”