Machitidu 5:1-42

  • Hananiya ndi Safira (1-11)

  • Akutumika achita visimikizu vinandi (12-16)

  • Amangika ndi kufwatulika (17-21a)

  • Atoleke so pa masu pa Mphara Yikulu ya Milandu (21b-32)

    • ‘Kuvwiya Chiuta kuluska ŵanthu’ (29)

  • Ulongozgi waku Gamaliyeli (33-40)

  • Kupharazga kunyumba ndi nyumba (41, 42)

5  Ndipu munthu munyaki yo wadanikanga kuti Hananiya limoza ndi muwolu waki Safira, angugulisa munda.  Kweni iyu wangubisaku ndalama zinyaki ndipu muwolu waki wanguziŵa venivi. Sonu wanguto ndalama zinyaki ndi kuchizipereka kwa akutumika.  Kweni Peturo wangukamba kuti: “Hananiya, ntchifukwa wuli Satana wamizga mtima waku kuti upusiki mzimu wakupaturika ndi kubisa ndalama zinyaki zo wagulisa munda waku?  Wechendawugulisi, asi munda wo wenga waku? Ndipu wati wawugulisa, asi ndalama zenga mumanja mwaku? Ntchifukwa wuli waŵanaŵana kuchita chinthu chaviyo mumtima mwaku? Wapusika munthu cha, kweni Chiuta.”  Hananiya wati wavwa ivi, wanguwa pasi ndi kufwa. Ndipu ŵanthu wosi wo anguvwa nkhani yeniyi anguchita mantha ukongwa.  Sonu anyamata angusoka ndi kumukulunga musalu, angumutuzgiya kubwalu ndi kuchimuŵika.  Sonu pati pajumpha pafufupi maora ngatatu, muwolu waki wanguza ndipu wanguziŵa cha cho chinguchitika.  Peturo wangumukambiya kuti: “Ndikambiyi, kumbi mosi mwaŵaŵi mwagulisa munda winu pa mtengu wenuwu?” Iyu wangumuka kuti: “Hinya, tagulisa zenizo.”  Sonu Peturo wangumukambiya kuti: “Ntchifukwa wuli mosi mwakoliyana kuti muyesi mzimu waku Yehova? Awona! Ŵanthu wo anguluta kuchiŵika mulumu waku ŵe pakhomu ndipu akunyamuliyengi kubwalu.” 10  Nyengu yeniyo, wanguwa pamaphazi ngaku Peturo ndipu wangufwa. Anyamata ŵati asere, angusaniya kuti wafwa ndipu angumunyamuliya kubwalu ndi kuchimuŵika mumuwunda pafupi ndi mulumu waki. 11  Sonu mpingu wosi kweniso ŵanthu wosi wo avwanga vo vinguchitika achitanga mantha ukongwa. 12  Ndipuso akutumika angulutirizga kuchita vakuziziswa kweniso visimikizu vinandi pakati pa ŵanthu ndipu wosi awungananga mu Khondi Lavipilala Laku Solomoni. 13  Kukamba uneneska, anyaki ŵengavi chiganga chakuti asere mugulu lawu, kweni ŵanthu aŵalumbanga ukongwa. 14  Ndipuso chiŵerengeru cha anthulumi ndi anthukazi wo agomezganga mwa Ambuya, chingulutirizga kusazgikiyaku. 15  Ŵanthu apinganga wo atamanga ndi kuluta nawu mumisewu yikuluyikulu ndipu aŵagonekanga patimabedi ndi pamphasa kuti Peturo wachijumpha, chithuthuzi chaki chikwaski anyaki mwa ŵanthu wo. 16  Ndipuso chigulu cha ŵanthu chakutuliya mumatawuni nga kufupi ndi Yerusalemu, chazanga ndipu chapinganga ŵanthu wo atamanga ndipuso wo asuzgikanga ndi mizimu yiheni, ndipu wosi achiranga. 17  Kweni wasembi mura wangusoka limoza ndi ŵanthu wo ŵenga nayu, wo ŵenga a mu kagulu ka Asaduki, ndipu anguchita sanji ukongwa. 18  Yiwu anguko* akutumika ndi kuŵaŵika mujeri. 19  Kweni ndi usiku, mungelu waku Yehova wangujula visasa va jeri, wanguŵatuzga ndipu wangukamba kuti: 20  “Lutani, mukami munyumba yakusopiyamu ndipu mukalutirizgi kukambiya ŵanthu vosi vakukwaskana ndi umoyu wenuwu.” 21  Ŵati avwa venivi, angusere munyumba yakusopiyamu ndipu ndi mlenjilenji angwamba kusambiza. Sonu wasembi mura ndi ŵanthu wo ŵenga nayu ŵati afika, angudanisa Mphara Yikulu ya Milandu ndipuso ŵaraŵara wosi a mu Isirayeli, ndipu angutuma ŵanthu kuti akato akutumika mujeri kuti azi nawu kwaku yiwu. 22  Kweni asilikali ŵati afika, anguŵasaniyamu cha. Sonu anguweku ndipu angukonkhoska mo ayende. 23  Yiwu angukamba kuti: “Tasaniya kuti jeri ndakujala ndipuso chechosi che umamphaumampha ndipu alonda ama mumakhomu, kweni tati tajula, tasaniya kuti mulivi weyosi.” 24  Sonu kapitawu wa nyumba yakusopiyamu ndi ŵara ŵa asembi ŵati avwa venivi, angumala zeru kuti ntchinthu wuli cho chichitikengi. 25  Kweni munthu munyaki wanguza ndi kuŵakambiya kuti: “Awonani! Ŵanthu ŵa munguŵaŵika mujeri, ŵe munyumba yakusopiyamu, ŵama mwenimo ndipu asambiza ŵanthu.” 26  Sonu kapitawu limoza ndi asilikali ŵaki anguluta kuchiŵato ndipu anguza nawu. Yiwu anguŵato kwambula kulimbana nawu chifukwa awopanga kuti ŵanthu angaŵaponya ndi mya. 27  Ŵati aza nawu, anguŵamika pa masu pa Mphara Yikulu ya Milandu. Pavuli paki wasembi mura wanguŵafumba 28  ndipu wanguŵakambiya kuti: “Tingukulamulani mwanthazi kuti mungalutirizganga cha kusambiza mu zina lenili, kweni awonani! mwazaza Yerusalemu yosi ndi chisambizu chinu ndipu mwasimikiza kuti mulandu wa ndopa za munthu uyu uje paku isi.” 29  Peturo ndi akutumika anyaki angumuka kuti: “Titenere kuvwiya Chiuta nge wakuwusa kuluska ŵanthu. 30  Chiuta wa apapi ŵidu akali wakuyuska Yesu, yo yimwi mungumubaya mwakumupayika pachimiti. 31  Chiuta wakumukweza kujanja laki lamaryi nge Mulongozgi Mura kweniso Mtaski kuti Ayisirayeli alapi ndi kugowokereka maubudi. 32  Isi limoza ndi mzimu wakupaturika wo Chiuta wakuwupereka ku ŵanthu wo atimuvwiya nge wakuwusa, te akaboni a vinthu venivi.” 33  Ŵati avwa venivi, angukwiya* ukongwa ndipu apenjanga kuŵabaya. 34  Kweni Mfarisi munyaki yo wadanikanga kuti Gamaliyeli wangusoka mu Mphara Yikulu ya Milandu. Iyu wenga msambizi wa Dangu* yo ŵanthu wosi amupaskanga ulemu ndipu wangulamula kuti ŵanthu wo aŵatuzgiyi dankha kubwalu kwa kanyengu kamanavi. 35  Iyu wangukambiya Mphara yo kuti: “Mwaŵanthu a ku Isirayeli, phweriyani ndi vo mukhumba kuchita ndi ŵanthu yaŵa. 36  Mwakuyeruzgiyapu, kuvuli uku kwenga Teuda mweniyo wajiŵikangamu ndipu anthulumi pafufupi 400 angusere mu chipani chaki. Kweni iyu wakubayika, ŵanthu wo amulondonga akumbininika ndipu aziŵika so cha. 37  Pavuli paki kunguziza Yudasi waku Galileya mu mazuŵa nga chilembesa ndipu wenga ndi ŵanthu anandi wo amulondonga. Mwenuyu nayu wakufwa ndipu ŵanthu wosi wo amulondonga akujimbininikiya. 38  Mo viliri yapa napu, ini nditikukambiyani kuti mungalimbananga nawu cha ŵanthu yaŵa, alekeni. Chifukwa asani vo achita pamwenga kuti ntchitu iyi njakutuliya ku ŵanthu, yimalengi. 39  Kweni asani njakutuliya kwaku Chiuta, mumalanengi nawu cha, mumalu mwaki musanirikengi ŵaka kuti mulimbana ndi Chiuta.” 40  Mwaviyo yiwu anguvwiya vo wanguŵakambiya, angudana akutumika wo ndipu anguŵakwechuwa ndi kuŵalamula kuti aleki kukamba so mu zina laku Yesu. Pavuli paki, anguŵakambiya kuti akengi. 41  Sonu angutuwapu pa masu pa Mphara Yikulu ya Milandu ndipu angutuwapu achikondwa pakuti anguwona kuti ntchakwenere kuti yiwu alengeseki chifukwa cha zina laku Yesu. 42  Ndipuso zuŵa lelosi alutirizganga mbwenu ndipu alekezanga cha kusambiza ndi kupharazga uthenga wamampha wakukwaskana ndi Khristu Yesu, munyumba yakusopiyamu ndipuso kunyumba ndi nyumba.

Mazu Ngam'mphata

Pamwenga kuti, “angumanga.”
Pamwenga kuti, “angumwazika.”
Wonani Mazu ngo Ngakonkhoskeka.