Machitidu 4:1-37

  • Peturo ndi Yohane amangika (1-4)

    • Chiŵerengeru cha anthulumi chifika 5,000 (4)

  • Afumbika mu Mphara Yikulu ya Milandu (5-22)

    • “Tilekengepu cha kulongoro” (20)

  • Apemphera kuti aje ndi chiganga (23-31)

  • Akusambira agaŵana vinthu vawu (32-37)

4  Peturo ndi Yohane achilongoro ndi ŵanthu, kunguza asembi, kapitawu wa nyumba yakusopiyamu ndi Asaduki.  Yiwu angukwiya ukongwa chifukwa chakuti akutumika asambizanga ŵanthu ndipuso apharazganga pakweru va kuyuskika kwaku Yesu.  Mwaviyo anguŵako* ndi kuchiŵaŵika mujeri mpaka mawa laki chifukwa ndipu kwafipa kali.  Kweni ŵanthu anandi wo anguvwisiya vo akambanga angugomezga ndipu chiŵerengeru cha anthulumi chingukuwa mpaka kufika pafufupi 5,000.  Mawa laki, alongozgi ŵawu, ŵara ndi alembi anguwungana pamoza ku Yerusalemu.  Pa gulu lawu penga so mura wa asembi Anasi, Kayafa, Yohane, Alekizanda kweniso ŵanthu wosi wo ŵenga abali a mura wa asembi.  Sonu angumika Peturo ndi Yohane pakati pawu ndi kwamba kuŵafumba kuti: “Kumbi muchita venivi mu nthazi zaku yani pamwenga mu zina laku yani?”  Pavuli paki, Peturo yo wanguzazika ndi mzimu wakupaturika wanguŵakambiya kuti: “Mwaŵalongozgi a ŵanthu kweniso mwaŵaraŵara,  asani msanawale mutitifufuza chifukwa chakuti tachitiya vinthu vamampha munthu wakupunduka uyu ndipu mukhumba kuziŵa kuti ndiyani yo wamuchizga, 10  ziŵani mosi kweniso mwaŵanthu a ku Isirayeli mosi kuti munthu uyu wama panthazi pinu, wachizgika mu zina laku Yesu Khristu wa ku Nazareti yo mungumubayiya pachimiti, kweniso yo Chiuta wakumuyuska. 11  Mwenuyu ndiyu ‘mwa wo yimwi akuzenga munguwuwona kuti ngwambula ntchitu, wenuwu waja mwa wapakona.’* 12  Ndipuso utaski utuliya ku munthu munyaki weyosi cha, pakuti palivi zina linyaki pacharu chapasi lo likuperekeka ku ŵanthu kuti titaskiki nalu.” 13  Sonu ŵati awona kuti Peturo ndi Yohane alongoro vinthu mwambula kubisa* kweniso chifukwa chakuti anguziŵa kuti ŵenga ambula kusambira* ndipuso ambula kutchuka, anguzizwa ukongwa. Ndipu angwamba kuŵaŵanika kuti ayendanga ndi Yesu. 14  Achiwona munthu yo wanguchizgika wama limoza ndi Peturo kweniso Yohane, angusoŵa chakumukapu pa nkhani iyi. 15  Sonu anguŵalamula kuti atuliyi kubwalu kwa holu ya Mphara Yikulu ya Milandu ndipu angwamba kufumbana 16  kuti: “Kumbi tichitenji nawu ŵanthu yaŵa? Chifukwa kukamba uneneska, yiwu achita chisimikizu chakuwoneke limu cho chapereka ukaboni ku ŵanthu wosi wo aja mu Yerusalemu, ndipu isi tingachisuska cha. 17  Kuti nkhani iyi yileki kulutirizga kuwanda, tiŵawofyi ŵanthu yaŵa ndipuso tiŵakambiyi kuti angakambanga chechosi cha ndi munthu weyosi mu zina lenili.” 18  Ŵati akambiskana venivi, anguŵadana ndi kuŵalamula kuti angakambanga so chechosi cha pamwenga kusambiza mu zina laku Yesu. 19  Kweni Peturo ndi Yohane anguŵamuka kuti: “Yeruzgani mwija asani ntchakwenere pa masu paku Chiuta, kuvwiya yimwi pamwenga kuvwiya Chiuta. 20  Kweni isi tilekengepu cha kulongoro vinthu vo tikuwona ndi kuvwa.” 21  Ŵati aŵawofya ukongwa anguŵafwatuwa chifukwa anguŵasaniya ndi mulandu wewosi cha wakuŵalangiya kweniso chifukwa cha kopa ŵanthu, pakuti ŵanthu wosi akankhuskanga Chiuta chifukwa cha vo vinguchitika. 22  Munthu yo wanguchizgika kuporote mu chakuziziswa* chenichi wenga ndi vyaka vakujumpha 40. 23  Ŵati afwatulika anguluta kwa anyawu ndipu anguŵakonkhoske vo ŵara ŵa asembi kweniso ŵara anguŵakambiya. 24  Ŵati avwa venivi, wosi pamoza angudaniriza kwaku Chiuta kuti: “Ambuya Fumu Yikulu, yimwi Ndimwi mukupanga kuchanya, charu chapasi, nyanja ndipuso vinthu vosi vo ve mwenimo, 25  ndipuso ndimwi mungukamba mwa mzimu wakupaturika kuporote mwa wusefwi Davidi, mteŵeti winu kuti: ‘Ntchifukwa wuli mitundu ya ŵanthu yakwiya ndipuso ŵanthu alunguruka pa vinthu vaŵaka? 26  Mafumu nga charu nganozgeka ndipuso akuwusa awungana pamoza kuti alimbani ndi Yehova kweniso wakusankhika* waki.’ 27  Chifukwa kukamba uneneska, Herodi ndi Pontiyo Pilato, ŵanthu amitundu yinyaki ndipuso Ayisirayeli anguwungana pamoza mutawuni yeniyinu kuti alimbani ndi Yesu, mteŵeti winu wakupaturika yo mukumusankha. 28  Yiwu awungana pamoza kuti achiti vo mukukambiya limu ndipu mukuchita venivi ndi janja linu kweniso mwakukoliyana ndi khumbu linu. 29  Ndipu sonu Yehova, vwani mo atitiwofye, ndipu zomerezani akapolu ŵinu kuti alutirizgi kukamba mazu nginu mwachiganga, 30  muchitambasuwa janja linu kuti muchizgi ndipuso muchichitiska visimikizu ndi vakuziziswa mu zina laku Yesu mteŵeti winu wakupaturika.” 31  Ŵati apemphera mwakuŵeyere,* pamalu po anguwungana pangusukunyika, weyosi wanguzazika ndi mzimu wakupaturika, ndipu alongoronga mazu ngaku Chiuta mwachiganga. 32  Kweniso anandi mwa ŵanthu wo angugomezga ŵenga ndi mtima umoza kweniso maŵanaŵanu ngamoza ndipu pengavi munthu yo wakambanga kuti chinthu chechosi cho we nachu ntchaki, kweni vinthu vawu vosi venga vaku wosi. 33  Ndipu akutumika wo, angulutirizga kupereka mwanthazi ukaboni wakukwaskana ndi kuyuskika kwa Ambuya Yesu ndipuso wosi Chiuta wanguŵalongo wezi waki ukulu ukongwa. 34  Kukamba uneneska, pakati pawu pengavi munthu mukavu, pakuti wosi wo ŵenga ndi minda pamwenga nyumba agulisanga ndipu ndalama zaki azanga nazu 35  ndi kuzipereka kwa akutumika. Ndipu azigaŵanga kwaku weyosi mwakukoliyana ndi vo wakhumbikanga. 36  Sonu Yosefi yo akutumika angumupaska zina lakuti Baranaba (lo ling’anamuwa kuti, “Mwana Wakupembuzga”), yo so wenga Mlevi wa ku Kupuro, 37  wenga ndi malu, ndipu wangungagulisa. Ndalama zaki wanguzipereka kwa akutumika.

Mazu Ngam'mphata

Pamwenga kuti, “anguŵamanga.”
Mazu ngaki chayingu, “mutu wapakona.”
Pamwenga kuti, “mwachiganga.”
Mazu yanga ngang’anamuwa ŵanthu abulu cha, kweni ŵanthu ambula kuluta kumasukulu nga arabi.
Pamwenga kuti, “chisimikizu.”
Pamwenga kuti, “Khristu.”
Pamwenga kuti, “ndi mtima wosi.”