Machitidu 25:1-27

  • Paulo wafumbika pa masu paku Fesito (1-12)

    • “Ndipempha kuti mulandu uwu wakawuwoni so Kayisara!” (11)

  • Fesito wakumana ndi Fumu Agiripa (13-22)

  • Paulo pa masu paku Agiripa (23-27)

25  Sonu Fesito wangufika muchigaŵa cho ndi kwamba kuwusa ndipu pati pajumpha mazuŵa ngatatu, wangutuwa ku Kayisareya kuluta ku Yerusalemu.  Ŵara ŵa asembi kweniso Ayuda wo ŵenga akuzirwa angumukonkhoske mulandu waku Paulo. Yiwu angwamba kupempha Fesito  kuti waŵakondwesi* mwakudanisa Paulo kuti wazi ku Yerusalemu. Kweni yiwu akhumbanga kuti amukhazi ndi kumubayiya munthowa.  Kweni Fesito wangumuka kuti Paulo watenere kusungika ku Kayisareya ndipuso kuti iyu wenga pafupi kuwere kweniko.  Iyu wanguŵakambiya kuti: “Ŵanthu amaudindu pakati pinu alutiyi nani limoza kuti akamumbi mulandu asani munthu uyu ngwakunanga nadi.”  Sonu wati waja nawu kwa mazuŵa ngambula kujumpha 8 pamwenga 10, wanguluta ku Kayisareya ndipu mawa laki wanguja pampandu wakuyeruzgiyapu milandu ndi kulamula kuti Paulo azi nayu.  Paulo wati waza, Ayuda wo angutuwa ku Yerusalemu anguma mwakumuzunguliya ndipu angwamba kumumba milandu yinandi yakofya yo angutondeka kumusimikiza.  Kweni Paulo pakujivikiliya wangukamba kuti: “Ndikuchitapu chinthu chechosi cha chakunangiya Dangu* la Ayuda, nyumba yakusopiyamu pamwenga Kayisara.”  Pakuti Fesito wakhumbanga kukondwesa Ayuda, wangufumba Paulo kuti: “Kumbi ukhumba kuluta ku Yerusalemu kuti milandu yeniyi yikayeruzgiki kweniko pa masu paku ini?” 10  Kweni Paulo wangukamba kuti: “Ndama panthazi pa mpandu wakuyeruzgiyapu milandu waku Kayisara penipo nditenere kuyeruzgikiya. Ayuda ndaŵanangiya chechosi cha, ndipu yimwi namwi muziŵa umampha venivi. 11  Asani nde wakunanga nadi, ndipu ndachita chechosi chakwenere kubayikiya, ndikana cha kubayika. Kweni asani pa vinthu vo ŵanthu yaŵa atindimba navu mulandu palivi chifukwa chaviyo, mbwenu palivi munthu yo we ndi wanangwa wakundipereka kwaku yiwu chifukwa chakukhumba kuŵakondwesa. Ndipempha kuti mulandu uwu wakawuwoni so Kayisara!” 12  Sonu Fesito wati wakambiskana ndi wupu wa ŵanthu wo amulunguchizganga wangumuka kuti: “Pakuti wapempha kuti uluti kwaku Kayisara, ulutengi nadi kwaku Kayisara.” 13  Mazuŵa nganandiku ngati ngajumphapu, Fumu Agiripa limoza ndi Berenike anguza ku Kayisareya pa ulendu waboma kuzipereka ulemu kwaku Fesito. 14  Pakuti angujaku mazuŵa nganandiku, Fesito wangukonkhoske fumu yo mulandu waku Paulo kuti: “Pe munthu munyaki yo Felekisi wangumusiya pa ukayidi. 15  Pa nyengu yo ndenga ku Yerusalemu, ŵara ŵa asembi ndi ŵara ŵa Ayuda angundikambiya vakukwaskana ndi iyu, ndipu angundipempha kuti wayeruzgiki kuti ngwakunanga. 16  Kweni ndinguŵakambiya kuti dangu la Aroma lizomereza cha kuti munthu waperekeki chifukwa chakukhumba kukondwesa ŵanthu, wechendakumani ndi ŵanthu wo atimumba mulandu pa masu ndi pa masu, kuti waŵi ndi mwaŵi wakujivikiliya pa mulandu wo. 17  Sonu ŵati ŵaza kunu, ndinguswera cha, kweni mawa laki ndinguja pampandu wakuyeruzgiyapu milandu ndipu ndingulamula kuti azi ndi munthu yo. 18  Ŵanthu wo amumbanga mulandu ŵati asoka kuti alongoro, angukonkhoskapu cha vinthu viheni vo ndaŵanaŵananga kuti panyaki ndivu wakuchita. 19  Mumalu mwaki asuskananga nayu nkhani zakukwaskana ndi chisopa chawu* kweniso zakukwaskana ndi munthu munyaki yo wadanika kuti Yesu mweniyo wakufwa, kweni Paulo wasimikiza kuti ngwamoyu. 20  Pakuti ndingusoŵa chakuchita ndi suskanu yeniyi, ndingumufumba asani wangayanja kuluta ku Yerusalemu kuti nkhani zenizi zikayeruzgikiyi kweniko. 21  Kweni Paulo wati wapempha kuti alutirizgi kumusunga wakumangika kuti nkhani yeniyi wakayiwoni so Wakutumbikika, ndingulamula kuti amusungi mpaka po ndazimutumiya kwaku Kayisara.” 22  Sonu Agiripa wangukambiya Fesito kuti: “Ndikhumba ndimuvwi ndija munthu mweniyo.” Fesito wangukamba kuti: “Mawa mumuvwengi.” 23  Sonu mawa laki, fumu Agiripa limoza ndi Berenike anguza mwathenthi ndipu angusere mumphara ya milandu limoza ndi ŵaraŵara a magulu nga asilikali kweniso ŵanthu akutchuka a mutawuni yo. Fesito wati walamula, angusere nayu Paulo. 24  Ndipu Fesito wangukamba kuti: “Fumu Agiripa kweniso mwaŵanthu mosi yimwi mwe nasi panu, munthu uyu ndiyu Ayuda wosi andipempha kunu kweniso ku Yerusalemu ndipu adanirizanga kuti watenere cha kuja ndi umoyu. 25  Kweni ndawona kuti palivi chiheni chechosi cho wakuchita chakuti wafwiyi. Sonu munthu uyu mweneku wangupempha kuti Wakutumbikika wakayiwoni so nkhani iyi. Mwaviyo ndawona kuti ndimutumizi kweniko. 26  Kweni ndilivi chifukwa cheneku chakuti ndingalembe Fumu yangu vakukwaskana ndi munthu uyu. Sonu ndaza nayu pa masu paku yimwi mosi, ukongwa pa masu pinu Fumu Agiripa, kuti asani mwamufumbafumba, ndisaniyi chakuti ndilembi. 27  Chifukwa ini ndiwona kuti mphakwenere cha kuti nditumizi mukayidi kwambula kulemba milandu yaki.”

Mazu Ngam'mphata

Mazu ngaki chayingu, “waŵayanjiyi.”
Wonani Mazu ngo Ngakonkhoskeka.
Pamwenga kuti, “zakukwaskana ndi kusopa chiuta wawu.”