Julani

Lutani pa vo ve mukati

Machitidu 24:1-27

NKHANI ZO ZE MUBUKU ILI

  • Milandu yaku Paulo (1-9)

  • Paulo watijivikiliya pa masu paku Felekisi (10-21)

  • Mulandu waku Paulo umikika kwa vyaka viŵi (22-27)

24  Pati pajumpha mazuŵa ngankhondi, wasembi mura Hananiya wanguza ndi anyaki mwa ŵara kweniso Teritulo, munthu wakuziŵa kulongoro pagulu* ndipu angukambiya nduna mulandu wo ambanga Paulo.  Wati wadanika, Teritulo wangwamba kumba mulandu Paulo ndipu wangukamba kuti: “Tija mwachimangu chifukwa chaku yimwi kweniso vinthu vinandi visintha mu mtundu widu chifukwa chakuti muwone limu patali.  Yimwi Wakutumbikika Felekisi, nyengu zosi kweniso kwekosi tiwona zeru zinu ndipu tiwonga ukongwa.  Kweni kuti ndileki kulutirizga kukumaliyani nyengu, ndipempha wezi winu ukulu kuti mundivwisiyi kwa nyengu yimanavi.  Pakuti tasaniya kuti munthu uyu ntchideru,* wachitiska kuti ŵanthu ayukiyengi boma pakati pa Ayuda mucharu chosi chapasi ndipu iyu ndiyu walongozga kagulu kakugaruka ka ŵanthu a ku Nazareti.  Iyu wakazuzanga so nyumba yakusopiyamu, sonu tingumuko.  *——  Asani mwamufumba mwaŵeni, musaniyengi kuti vinthu vosi vo takamba vakukwaskana ndi mulandu waki vauneneska.”  Wati wakamba venivi, Ayuda nawu angukoliyana ndi Teritulo kumuyukiya ndipu akambanga kuti vo wakamba vauneneska. 10  Nduna yo yati yakambiya Paulo mwakumukonozga ndi mutu, Paulo wangumuka kuti: “Ndiziŵa kuti mwaja muchiyeruzga mtundu uwu kwa vyaka vinandi, mwaviyo nde wakunozgeka kujivikiliya. 11  Asani mungafufuza, musimikizengi kuti mazuŵa 12 ngajumpha cha kutuliya po ndingulutiya ku Yerusalemu kuchisopa. 12  Ndipu angundisaniya ndichipindana ndi munthu weyosi cha munyumba yakusopiyamu, pamwenga kwambisa vivulupi mumasinagogi pamwenga mutawuni yosi. 13  Ndipuso palivi ukaboni wo angakupaskani pa vinthu vo atindimba navu mulandu sonu panu. 14  Kweni ndizomera kwaku yimwi kuti nge mo kagulu ko atikadana kuti kakugaruka kachitiya, nani ndichita uteŵeti wakupaturika kwaku Chiuta wa apapi ŵangu akali mwakukoliyana ndi nthowa yeniyi, pakuti ndigomezga vosi vakulembeka mu Dangu* ndi mu Vakulemba va Achimi. 15  Ndipu nde ndi chilindizga kwaku Chiuta nge cho ŵanthu yaŵa nawu ŵe nachu, kuti kwazamuja chiyuka cha ŵanthu arunji ndi ambula urunji. 16  Chifukwa cha venivi, nditesesa kuti ndije ndi njuŵi yamampha* pa masu paku Chiuta ndi ŵanthu. 17  Sonu pavuli pa vyaka vinandiku, ndinguluta kuchipereka mphasu zalisungu kweniso sembi ku mtundu wangu. 18  Ndichichita vinthu venivi, angundisaniya munyumba yakusopiyamu ndachita kali mwambu wakujitowesa, kweni ndenga ndi chigulu cha ŵanthu cha ndipuso ndayambisanga viwawa cha. Kweni penga Ayuda anyaki akutuliya muchigaŵa cha Asia 19  wo ŵenga akwenere kuza pa masu pinu kuzindimba mulandu asani ŵe nani ndi chifukwa. 20  Pamwenga ŵanthu wo ŵe panu akambi ŵija chinthu chiheni cho anguchisaniya mwaku ini po ndenga pa masu pa Mphara Yikulu ya Milandu. 21  Yiku angandisaniya ndi mulandu pa chinthu chimoza pe, chakuti nde pakati pawu ndingudaniriza kuti: ‘Ndiyeruzgika pa masu pinu msanawale chifukwa cha chilindizga chakuti akufwa azamuyuskika!’” 22  Kweni chifukwa chakuti Felekisi waziziŵanga umampha fundu zakukwaskana ndi Nthowa Yeniyi, wangumika mulandu ndipu wangukamba kuti: “Ndazamuyeruzga mulandu waku asani Lusiya, mura wa gulu la asilikali waza.” 23  Ndipu wangulamula mura wa asilikali kuti munthu uyu amumangi, kweni amupaskengeku wanangwa ndipuso kuti anyaki aŵazomerezengi kuzimuphwere. 24  Pati pajumpha mazuŵa, Felekisi wanguza limoza ndi Durusila muwolu waki yo wenga Myuda. Felekisi wangudanisa Paulo ndipu wamuvwisiyanga wachilongoro vakukwaskana ndi kugomezga Khristu Yesu. 25  Kweni Paulo wachilongoro vakukwaskana ndi urunji, kujiko ndipuso cheruzgu cho chituza, Felekisi wanguchita mantha ndipu wangumuka kuti: “Pasonu panu luta dankha, kweni asani ndazisaniya nyengu, ndazakukudana so.” 26  Ivi vichichitika, Felekisi wakhazanga kuti Paulo wamupaskengi ndalama. Mwaviyo wamudanisanga kaŵikaŵi ndipu wakambiskananga nayu. 27  Kweni pati pajumpha vyaka viŵi, Porokiyo Fesito wangusere mumalu mwaku Felekisi. Ndipuso chifukwa chakuti Felekisi wakhumbanga kukondwesa Ayuda, wangumufwatuwa cha Paulo.

Mazu Ngam'mphata

Pamwenga kuti, “loya.”
Pamwenga kuti, “ngwakusuzga ukongwa.”
Wonani mazu ngamumphata pa Mateyu 17:21.
Wonani Mazu ngo Ngakonkhoskeka.
Pamwenga kuti, “yambula kalema.”