Luka 22:1-71

  • Asembi apangana kuti abayi Yesu (1-6)

  • Kunozgeke Pasika wakumaliya (7-13)

  • Yesu wajalikiska mwambu wa Chakurya Chamazulu cha Ambuya (14-20)

  • ‘Wakundipereka we nani penipanu pathebulu’ (21-23)

  • Akusambira asuskana kuti mura ndiyani (24-27)

  • Phanganu laku Yesu la Ufumu (28-30)

  • Wakambiya limu kuti Peturo wazakumukana (31-34)

  • Kunozgeke limu; malipanga ngaŵi (35-38)

  • Pempheru laku Yesu pa Phiri la Maolivi (39-46)

  • Yesu wamangika (47-53)

  • Peturo wakana Yesu (54-62)

  • Yesu wanyozeka (63-65)

  • Kumbika mulandu mu Mphara Yikulu ya Milandu (66-71)

22  Sonu Phwandu la Viŵandi Vambula Chakutupisa, lo lidanika kuti Pasika, lenga pafupi.  Ndipu ŵara ŵa asembi kweniso alembi apenjanga nthowa yamampha yakuti abayiyi Yesu, chifukwa awopanga ŵanthu.  Sonu Satana wangusere mwaku Yudasi yo waziŵikanga kuti wa ku Keriyoti, yo wenga yumoza wa akutumika 12.  Ndipu Yudasi wanguluta kuchikambiskana ndi ŵara ŵa asembi kweniso akapitawu a panyumba yakusopiyamu. Wanguchikambiskana nawu mo wangamupereke kwaku yiwu.  Yiwu ŵati avwa venivi angukondwa ukongwa ndipu angupangana nayu kuti amupaskengi ndalama zasiliva.  Iyu wanguzomera ndipu wangwamba kupenja mpata wamampha wakuti wamupereke kwaku yiwu kwambula chigulu cha ŵanthu.  Zuŵa la Viŵandi Vambula Chakutupisa lingufika, lenilo sembi ya Pasika yakhumbikanga kuperekeka.  Sonu Yesu wangutuma Peturo ndi Yohane kuti: “Lutani kuchitinozge Pasika kuti tiryi.”  Yiwu angumufumba kuti: “Mupenja kuti tikakunozgiyeni nunkhu?” 10  Iyu wanguŵakambiya kuti: “Awonani! Asani mwasere mutawuni, munthu yo wapinga msuku wa maji wamukumana namwi. Mukamulondo mpaka munyumba yo wamusere. 11  Ndipu mukafumbi mweneku wa nyumba kuti, ‘Msambizi wakamba kuti: “Kumbi chipinda cha alendu che pani kuti ndiryiyemu Pasika ndi akusambira ŵangu?”’ 12  Iyu wakukulongoni chipinda chamuchanya kweniso chikulu cho che ndi vosi vakukhumbika. Mwenimo ndimu mukatinozge Pasika.” 13  Sonu yiwu anguluta ndipu chipinda cho anguchisaniya nge mo wanguŵakambiya ndipu angunozgeke Pasika. 14  Ora lati lafika, wanguja pathebulu limoza ndi akutumika. 15  Iyu wanguŵakambiya kuti: “Ndaja ndichikhumbisiska kurya Pasika uyu limoza ndi yimwi ndechendayambi kusuzgika. 16  Chifukwa nditikukambiyani kuti ndazamuryapu so cha Pasika mpaka po wazifiskikiya mu Ufumu waku Chiuta.” 17  Wati walonde kapu, wanguwonga kwaku Chiuta ndipu wangukamba kuti: “Toni kapu iyi, weyosi wapaskiyi munyaki, 18  chifukwa nditikukambiyani kuti kwamba sonu mpaka po Ufumu waku Chiuta waziya, ndazamumwapu so cha chakumwa chakutuliya ku mphereska.” 19  Wanguto so chiŵandi, wanguwonga, wangumenya, wanguŵapaska ndipu wangukamba kuti: “Chiŵandi ichi chimiya liŵavu langu lo liperekekengi chifukwa chaku yimwi. Lutirizgani kuchita venivi pakundikumbuka.” 20  Wanguchita so venivi ndi kapu ŵati arya chakurya chamazulu ndipu wangukamba kuti: “Kapu iyi yimiya phanganu lifya lo lifiskikengi chifukwa cha ndopa zangu, zo zidirikengi chifukwa chaku yimwi. 21  “Kweni awonani! janja la wakundipereka le nani penipanu pathebulu. 22  Mbuneneska kuti Mwana wa munthu walutengi nge mo vikukambikiya limu. Kweni soka munthu yo Mwana wa munthu waperekeka kuporote mwaku iyu!” 23  Sonu angwamba kukambiskana ŵijaŵija kuti ndiyani yo wakhumba kuchita venivi. 24  Kweni yiwu angwamba so kususkana ukongwa kuti mura ukongwa ndiyani pakati pawu. 25  Iyu wanguŵakambiya kuti: “Mafumu nga charu ichi ngawusa pa ŵanthu ŵawu ndipu wo ŵe ndi mazaza paku yiwu, aziŵika kuti akovya ŵanthu. 26  Kweni yimwi mungachitanga viyo cha. Yo ndi mura ukongwa pakati pinu, waje nge ndi mumana ukongwa, ndipu yo watikulongozgani waje nge ndi mteŵeti. 27  Kumbi ndiyani yo ndi mura, yo waturya* pamwenga yo wateŵete?* Asi ndi mweniyo waturya?* Kweni ini nde nge mteŵeti* pakati pinu. 28  “Kweni yimwi ndimwi mwajaliya nani limoza mu mayeseru ngangu. 29  Sonu ndichita namwi phanganu la ufumu, nge mo Ada achitiya nani phanganu la ufumu, 30  kuti mukamwi ndi kurya pathebulu langu mu Ufumu wangu ndi kuja pamipandu yaufumu, kuyeruzga mafuku 12 nga Isirayeli. 31  “Simoni, Simoni, awona! Satana wakhumba kuti wakupepeteni nge tirigu. 32  Kweni ndakupemphere mwakuŵeyere kuti chivwanu chaku chileki kumala ndipu asani yiwi waziwerere, uzichiski abali ŵaku.” 33  Iyu wangumumuka kuti: “Ambuya, nde wakunozgeka kulutiya namwi limoza kujeri ndipuso kufwiya namwi limoza.” 34  Kweni wangumukambiya kuti: “Peturo, nditikukambiya kuti msanawale tambala wechendakokoliki, undikanengi katatu.” 35  Yesu wanguŵakambiya so kuti: “Pa nyengu yo ndakutumaningi kwambula chikwama cha ndalama, thumba la chakurya ndipuso sapatu, kumbi chilipu cho chakusoŵaningi?” Yiwu angumuka kuti: “Awa!” 36  Pavuli paki wanguŵakambiya kuti: “Kweni sonu weyosi yo we ndi chikwama chandalama wapingi, yo we ndi thumba lachakurya nayu so viyo, ndipu yo walivi lipanga wagulisi laya laki lakubwalu kuti wakaguli. 37  Chifukwa nditikukambiyani kuti vo vikulembeka vitenere kufiskika mwaku ini vakuti, ‘Angumuwona nge yumoza wa ŵanthu ambula kuvwiya marangu.’ Chifukwa mazu ngenanga ngakukwaskana ndi ini ngafiskika.” 38  Pavuli paki yiwu angukamba kuti: “Ambuya, awonani! te ndi malipanga ngaŵi.” Iyu wanguŵakambiya kuti: “Mbwenu ngakukwana.” 39  Yesu wangutuwaku kwenuku ndipu nge mo wachitiyanga nyengu zosi, wanguluta ku Phiri la Maolivi ndipu akusambira ŵaki nawu angumulondo. 40  Wati wafika paphiri lo, wanguŵakambiya kuti: “Lutirizgani kupemphera kuti muleki kuyeseka.” 41  Ndipu iyu wanguŵaleka ndi kuluta pamtunda wakuti pangafika mwa asani munthu wawuponya, wangugwada ndi kwamba kupemphera. 42  Iyu wanguti: “Ada, asani mukhumba, mundituzgiyepu kapu iyi. Mwakukhumba kwangu cha, kweni khumbu linu lichitiki.” 43  Pavuli paki, mungelu wakutuliya kuchanya wanguza kwaku iyu kuzimuchiska. 44  Kweni wangusuzgika maŵanaŵanu ukongwa mwakuti wangulutirizga kupemphera kutuliya pasi pa mtima ndipu vuchi laki lachitanga kunthonya nge ndopa. 45  Wati wasoka po wapempheriyanga ndi kuluta po penga akusambira ŵaki, wangusaniya kuti ŵe mutulu pakuti ŵenga ndi chitima ukongwa. 46  Iyu wanguŵakambiya kuti: “Ntchifukwa wuli mugona? Yukani, ndipu lutirizgani kupemphera kuti muleki kuyeseka.” 47  Weche kulongoro, kunguza chigulu cha ŵanthu limoza ndi Yudasi yo wenga yumoza wa akusambira 12. Iyu ndiyu waŵalongozganga ndipu wanguza po penga Yesu kuzimufyofyontha. 48  Kweni Yesu wangumukambiya kuti: “Yudasi, upereka Mwana wa munthu mwakuchita kumufyofyontha?” 49  Wo ŵenga ndi Yesu ŵati awona vo vachitikanga, angukamba kuti: “Ambuya, kumbi tiŵakhati ndi lipanga?” 50  Yumoza wa akusambira aku Yesu, wangukhata kapolu wa wasembi mura ndipu wangudumuliya limu gutu laki lakumaryi. 51  Kweni Yesu wangukamba kuti: “Mbwenu lekani.” Ndipu wangukwaska gutu lo ndi kumuchizga. 52  Sonu Yesu wangukambiya ŵara ŵa asembi, akapitawu a nyumba yakusopiyamu kweniso ŵara wo anguza kwaku iyu kuti: “Kumbi mwachita kupinga malipanga ndi nduku pakuzindimanga nge kuti mwazamuko munkhungu? 53  Zuŵa ndi zuŵa pa nyengu yo ndaŵanga namwi munyumba yakusopiyamu, mwandikonga cha. Kweni ili ndi ora linu kweniso la mazaza nga ŵanthu a mdima.” 54  Pavuli paki angumumanga ndi kuluta nayu, angufika nayu kunyumba ya wasembi mura, kweni Peturo walondonga chapataliku. 55  Ŵati apemba motu pakati pa balaza la nyumba ya wasembi mura, anguja pasi ndipu Peturo wanguja nawu penipo. 56  Kweni mteŵeti munthukazi wati wamuwona wachiwotha motu, wangumulereseska ndipu wangukamba kuti: “Munthu uyu nayu wenga ndi Yesu.” 57  Kweni wangukana ndipu wangukamba kuti: “Wamunthukazi yiwi, nditimuziŵa cha ini.” 58  Pati pajumpha so nyengu yimanavi, munthulumi munyaki wangumuwona ndipu wangukamba kuti: “Yiwi nawi ndiwi yumoza waku yiwu.” Kweni Peturo wangukamba kuti: “Ndini cha.” 59  Pati pajumpha pafufupi ora limoza munthulumi munyaki so wangwamba kumusimikiza kuti: “Nadi panu, munthu uyu nayu wenga limoza ndi Yesu, chifukwa ndi Mgalileya!” 60  Kweni Peturo wangukamba kuti: “Wamunthu yiwi, nditiviziŵa cha vo ukamba.” Ndipu nyengu yeniyo weche kulongoro, tambala wangukokolika. 61  Pavuli paki, Ambuya angung’anamuka ndi kulereska Peturo ndipu iyu wangukumbuka mazu nga Ambuya ngakuti: “Msanawale, tambala wechendakokoliki, undikanengi katatu.” 62  Ndipu wanguluta kubwalu ndi kuliya mwakupwetekeka mtima. 63  Sonu ŵanthu wo anguko Yesu angwamba kumuchitiya chipongu ndipuso kumupuma. 64  Yiwu amujalanga kumasu ndipu amufumbanga kuti: “Loska, ndiyani yo wakupuma?” 65  Ndipu angukamba vinthu vinyaki vinandi vakumunyoza. 66  Kwati kwacha, ŵara, alembi ndipuso ŵara ŵa asembi, anguwungana pamoza ndipu anguluta nayu kuholu ko Mphara Yikulu ya Milandu yakumananga. Yiwu angumukambiya kuti: 67  “Utikambiyi asani ndiwi Khristu.” Kweni iyu wanguŵakambiya kuti: “Chinanga ndingakukambiyani, mungagomezga cha. 68  Ndipuso asani ndingakufumbani, mungandimuka cha. 69  Kweni kwamba sonu, Mwana wa munthu wajengi kujanja lamaryi lanthazi laku Chiuta.” 70  Ŵati avwa venivi, wosi angufumba kuti: “Kweni kumbi ndiwi Mwana waku Chiuta?” Iyu wanguŵamuka kuti: “Mwakamba mwija kuti ndini Mwana waku Chiuta.” 71  Yiwu angukamba kuti: “Tikhumbiyenji so ukaboni unyaki? Tajivwiya tija kutuliya pamulomu paki.”

Mazu Ngam'mphata

Pamwenga kuti, “wayegeme pathebulu.”
Pamwenga kuti, “wapereke chakurya.”
Pamwenga kuti, “wayegeme pathebulu.”
Pamwenga kuti, “wakupereke chakurya.”