Luka 21:1-38

  • Tindalama tiŵi ta choko chikavu (1-4)

  • CHISIMIKIZU CHA VINTHU VO VITUZA (5-36)

    • Nkhondu, vidilirisi vikuluvikulu, miliri, nja (10, 11)

    • Yerusalemu wazungulizgika ndi asilikali (20)

    • Nyengu yakuŵikika ya amitundu (24)

    • Kuza kwa Mwana wa munthu (27)

    • Ntharika ya chimiti cha mkuyu (29-33)

    • Lutirizgani kuja masu (34-36)

  • Yesu wasambiza munyumba yakusopiyamu (37, 38)

21  Sonu Yesu wachilereska wanguwona ŵanthu akukhupuka achiponya ndalama muvakuponyamu* ndalama.  Pavuli paki wanguwona choko chikavu chichiponyamu tindalama tiŵi takumaliyapu.*  Yesu wangukamba kuti: “Nditikuneneskiyani kuti choko ichi chaponyamu zinandi ukongwa kuluska wosi.  Chifukwa wosi aponyamu zo atapapu ŵaka pa ndalama zo ŵe nazu, kweni choko ichi chinanga kuti ntchikavu, chapereka zosi zo chathembanga pa umoyu waki.”  Pavuli paki, ŵanthu anyaki achikamba vakukwaskana ndi nyumba yakusopiyamu, mo anguyitowese ndi mya yamampha kweniso vinthu vakuperekeka kwaku Chiuta,  iyu wangukamba kuti: “Vinthu ivi vo muwona, mazuŵa ngatuza penipo pazamuŵavi mwa wakulekeka pachanya pa unyaki kwambula kuwisikiya pasi.”  Sonu ŵanthu angumufumba kuti: “Msambizi, kumbi vinthu venivi vazamuchitika zuŵanji, nanga chisimikizu chakuti vinthu venivi ve pafupi kuchitika ntchinthu wuli?”  Yesu wangumuka kuti: “Tcheŵani kuti muleki kulandizgika, chifukwa ŵanthu anandi azengi mu zina langu ndi kukamba kuti, ‘Ndini Khristu,’ ndipuso, ‘Nyengu yiya ye pafupi.’ Mungaziŵalondonga cha.  Kweniso asani mutuvwa viwawa vankhondu ndi vivulupi, mungachitanga mantha cha. Chifukwa vinthu venivi vitenere kuchitika dankha kweni umaliru wazamufika nyengu yeniyo cha.” 10  Pavuli paki wanguŵakambiya kuti: “Mtundu wazamuyukiyana ndi mtundu unyaki, kweniso ufumu ndi ufumu unyaki. 11  Kwazamuchitika vidilirisi vikuluvikulu ndipu mumalu ngakupambanapambana mwazamuja nja ndi milili. Kwazamuwoneka vinthu vakofya ndipu kuchanya kwazamukuŵa visimikizu vikulu. 12  “Kweni vinthu vosi venivi vechendachitiki, ŵanthu azakukukoni kweniso azakukutombozgani, azakukuperekani kumasinagogi ndipuso kujeri. Azamuluta namwi kwa mafumu ndi kwa ŵaraŵara a boma chifukwa cha zina langu. 13  Venivi vakukupaskani mpata wakuti muchitiyi ukaboni. 14  Mwaviyo, simikizani mumtima mwinu kuti mungayeseriyanga limu cha vo mwazamukamba pakujivikiliya, 15  chifukwa ndazakukupaskani mazu ndipuso zeru, mwakuti arwani ŵinu wosi azamutondeka kukana pamwenga kususka. 16  Kweniso chinanga mbapapi ŵinu, aku ŵinu ndi avurwa ŵinu, abali ŵinu ndipuso abwezi ŵinu azakukuperekani ndipu mwanyaki mwazamubayika. 17  Ndipu mwazamutinkhika ndi ŵanthu wosi chifukwa cha zina langu. 18  Kweni chinanga ndi sisi limoza la mumutu mwinu lazamunangika cha. 19  Asani mwazamukunthiyapu, mwazamutaska umoyu winu. 20  “Kweni asani mwawona kuti Yerusalemu wazungulizgika ndi asilikali, ndikuti muziziŵi kuti we pafupi kubwangandulika. 21  Wo ŵe mu Yudeya aziyambi kuthaŵiya kumapiri, wo ŵe mukati mwa tawuni yo azituwemu, ndipu wo ŵe kumizi yakubwalu kwa Yerusalemu angaziserengamu cha, 22  chifukwa yanga ndi mazuŵa ngakuti Chiuta wazilangiyi ŵanthu,* kuti vinthu vosi vo vikulembeka vifiskiki. 23  Soka kwa anthukazi anthumbu kweniso wo azamuja kuti atonkhesa ŵana mu mazuŵa ngo! Chifukwa pazamuja chisuzgu chikulu pacharu ndipuso Chiuta wazamulongo ukali waki pa ŵanthu a mucharu ichi. 24  Azamubayika ndi lipanga ndipu azamutoleke ku ukapolu ku mitundu yosi, ndipuso Yerusalemu wazamukandirizgika ndi ŵanthu amitundu yinyaki mpaka po nyengu yakuŵikika ya ŵanthu amitundu yinyaki yazifiskikiya. 25  “Kweniso kwazamukuŵa visimikizu ku lumwi, mwezi ndi nyenyezi, ndipu mitundu ya ŵanthu pacharu chapasi yazamusuzgika mwakuti ŵanthu azamusoŵa chakuchita chifukwa cha kuŵinduka kweniso kuwuluma kwa nyanja. 26  Ŵanthu azamukufwa chipoyu chifukwa cha mantha kweniso chifukwa chakulindizga vo vichitikengi pacharu chosi chapasi, pakuti nthazi zakuchanya zazamusukunyika. 27  Pavuli paki azamuwona Mwana wa munthu wachiza mumitambu ndi nthazi kweniso unkhankhu ukulu. 28  Kweni vinthu ivi vichiyamba kuchitika muzimi ndi kuyunuska mitu yinu chifukwa utaski winu we pafupi.” 29  Yesu wati wakamba venivi, wanguŵakambiya ntharika yakuti: “Wonesesani chimiti cha mkuyu kweniso vimiti vinyaki vosi. 30  Asani vachita liwondwi, namwi muwona ndipu muziŵa kuti chifuku che pafupi. 31  Mwakuyanana ŵaka, asani mwaziwona vinthu venivi vichichitika, muziziŵi kuti Ufumu waku Chiuta we pafupi. 32  Nditikuneneskiyani kuti mugonezi uwu umalengepu cha mpaka po vinthu vosi vachitikiya. 33  Kuchanya ndi charu chapasi vimalengi, kweni mazu ngangu ngamalengepu cha. 34  “Kweni phweriyani kuti mitima yinu yileki kuzitiskika ndi kurya ukongwa, kumwa ukongwa kweniso vinthu vakufipiska mtima pa umoyu, kuchitiya kuti zuŵa lo lingazikuziyani mwakubuchizga 35  nge chiŵana. Chifukwa zuŵa lo liziyengi ŵanthu wosi wo aja pachisku cha charu chosi chapasi. 36  Mwaviyo, jani masu ndipu nyengu zosi mupempherengi mwakuŵeyere kuti muzifiski kuthaŵa vinthu vosi vo vitenere kuchitika, kweniso kuti muzimi pa masu pa Mwana wa munthu.” 37  Sonu ndi msana Yesu wasambizanga munyumba yakusopiyamu, kweni ndi usiku watuwangamu ndi kuluta kuchigona ku Phiri la Maolivi. 38  Ndipu ŵanthu wosi azanga kwaku iyu ndi mlenjilenji kuzimuvwisiya munyumba yakusopiyamu.

Mazu Ngam'mphata

Pamwenga kuti, “muvakusungamu.”
Mazu ngaki chayingu, “maleputoni ngaŵi.”
Pamwenga kuti, “mu mazuŵa ngakuweze nduza.”