Luka 18:1-43

  • Ntharika ya choko chakupempha mwachitatata (1-8)

  • Mfarisi ndi wakusonkhesa msonkhu (9-14)

  • Yesu ndi ŵana (15-17)

  • Fumbu la mulongozgi wakukhupuka (18-30)

  • Nyifwa yaku Yesu yikambikiya so limu (31-34)

  • Wachibulumutiya wakupemphesa wayamba so kuwona (35-43)

18  Sonu Yesu wangulutirizga kuŵakambiya ntharika yakulongo kukhumbika kwa kupemphera nyengu zosi kweniso kwambula kuvuka.  Iyu wanguŵakambiya kuti: “Mutawuni yinyaki mwenga wakweruzga yo wawopanga Chiuta cha ndipuso watumbikanga munthu weyosi cha.  Mutawuni yeniyi mwenga so munthukazi yo wenga choko ndipu walutanga kaŵikaŵi kwa wakweruzga yo ndi kukamba kuti, ‘Muwonesesi kuti mwayeruzga mwaurunji pakati paku ini ndi munthu yo nde nayu ndi mulandu.’  Pakwamba wakweruzga yo wakhumbanga cha, kweni pavuli paki, mumtima mwaki wangukamba kuti, ‘Chinanga kuti nditopa Chiuta cha ndipuso nditumbika munthu weyosi cha,  kweni pakuti munthukazi uyu walutirizga kundisuzga, ndiwonesesengi kuti ndayeruzga mulandu waki mwaurunji kuti waleki kulutirizga kuza kwaku ini ndi kundisuzga* ndi vo wakhumba.’”  Sonu Ambuya angukamba kuti: “Wonani vo wakweruzga uyu wangukamba chinanga kuti wenga wambula urunji!  Sonu kumbi Chiuta wangatondeka kuwonesesa kuti urunji wachitikiya akusankhika ŵaki wo atimuliriya msana ndi usiku chinanga kuti waja wakuzizipizga kwaku yiwu?  Nditikuneneskiyani kuti wawonesesengi kuti urunji waŵachitikiya mwaliŵi. Kweni asani Mwana wa munthu waziza, kumbi wazamusaniya chivwanu* pacharu chapasi?”  Wangukamba so ntharika yinyaki ku ŵanthu wo agomezganga kuti mbarunji kweniso wo awonanga anyawu nge kuti mbanthu cha. 10  Yesu wanguŵakambiya kuti: “Ŵanthu ŵaŵi angukwere kunyumba yakusopiyamu kuchipemphera. Munyaki wenga Mfarisi ndipu munyaki wenga wakusonkhesa msonkhu. 11  Mfarisi wangusoka ndi kwamba kupemphera mumtima mwaki kuti, ‘Chiuta, nditikuwongani kuti ini ndiyanana cha ndi ŵanthu anyaki wosi wo mbakuphanga, ambula urunji, achigololu pamwenga nge wakusonkhesa msonkhu uyu. 12  Ini ndifunga kaŵi sabata yeyosi ndipuso ndipereka chatchumi pa vinthu vosi vo ndisaniya.’ 13  Kweni wakusonkhesa msonkhu wanguma chapataliku ndipu wakhumbanga cha chinanga nkhulereska kuchanya kweni wajipumanga pa chifuŵa ndi kukamba kuti, ‘Chiuta, ndichitiyeni lisungu, nde munthu wakubuda.’ 14  Nditikukambiyani kuti munthu uyu wachisikiya kunyumba kwaki wenga murunji kuluska Mfarisi. Chifukwa weyosi yo watijikuzga wayuyulikengi, ndipu weyosi yo watijiyuyuwa, wakwezekengi.” 15  Sonu ŵanthu azanga so ndi ŵana ŵawu anamana kuti waŵiki manja ngaki paku yiwu, kweni akusambira ŵaki ŵati awona venivi, anguŵakalipiya. 16  Kweni Yesu wangudana ŵana wo, ndipu wanguti: “Alekeni ŵana azi kwaku ini, mungaŵakanizanga cha, chifukwa Ufumu waku Chiuta ngwa ŵanthu ange ŵana ŵenaŵa. 17  Nditikuneneskiyani kuti weyosi yo watondeka kulonde Ufumu waku Chiuta nge mwanamana, wazamuserepu cha mu Ufumu wo.” 18  Ndipu yumoza wa alongozgi wangufumba Yesu kuti: “Msambizi wamampha, kumbi ndikhumbika kuchitanji kuti ndizilonde umoyu wamuyaya?” 19  Yesu wangumumuka kuti: “Ntchifukwa wuli utindidana kuti wamampha? Wamampha walipu yumoza pe, yo ndi Chiuta. 20  Asi utingaziŵa marangu ngakuti: ‘Ungachitanga chigololu cha, ungabayanga munthu cha, ungabanga cha, ungaperekanga ukaboni waboza cha ndipuso tumbika awusu ndi anyoku!’” 21  Sonu iyu wangumukambiya kuti: “Ndaja ndichisunga marangu ngosi ngenanga kwamba pa unamana wangu.” 22  Yesu wati wavwa venivi wangumukambiya kuti, “Pe chinthu chinyaki so chimoza cho ukhumbika kuchita. Ukagulisi vinthu vosi vo wenavu ndipu ndalama zaki ukapaski akavu. Asani wachita viyo, uŵengi ndi chuma kuchanya ndipu ukazi kuti uzije wakusambira wangu.” 23  Wati wavwa venivi, wanguchita chitima ukongwa chifukwa wenga wakukhupuka ukongwa. 24  Yesu wangumulereska ndi kumukambiya kuti: “Vazamukuŵa vakusuzga ukongwa kuti ŵanthu wo ŵe ndi ndalama azisere mu Ufumu waku Chiuta! 25  Ntchipusu kuti ngamila yisere pajisu la zingani, kuluska kuti munthu wachuma wasere mu Ufumu waku Chiuta.” 26  Ŵanthu wo anguvwa venivi angufumba kuti: “Sonu ndiyani yo wangataskika?” 27  Yesu wanguŵamuka kuti: “Vinthu vo ŵanthu angatondeka kuchita, Chiuta wangatondeka cha.” 28  Sonu Peturo wangumuka kuti: “Awonani! Taleka vinthu vidu vosi ndi kulondo yimwi.” 29  Iyu wanguŵakambiya kuti: “Nditikuneneskiyani kuti palivi munthu yo waleka nyumba, muwolu waki, avurwa ŵaki, aku ŵaki kweniso apapi ŵaki chifukwa cha Ufumu waku Chiuta, 30  yo wangatondeka kulonde vinthu vinandi mu nyengu yinu kweniso umoyu wamuyaya mu mugonezi wo utuza.”* 31  Pavuli paki Yesu wangutole akusambira ŵaki 12 pamphepeti ndi kwamba kuŵakambiya kuti: “Awonani! Tiluta ku Yerusalemu ndipu vinthu vosi vo vikulembeka ndi achimi vakukwaskana ndi Mwana wa munthu, vamufiskika. 32  Mwakuyeruzgiyapu, iyu wamuperekeka ku ŵanthu amitundu yinyaki, ndipu akumunyoza, akumuwayusa ndipuso akumufunyiya mata. 33  Ndipu pavuli pakuti amukwechuwa akumubaya, kweni pa zuŵa lachitatu wazamuyuskika.” 34  Kweni yiwu anguziŵa cha kuti vinthu venivi ving’anamuwanji, chifukwa mazu ngenanga ngangubisika kwaku yiwu ndipu anguvwisa cha vo Yesu wakambanga. 35  Sonu Yesu we pafupi kufika ku Yeriko, munthu wachibulumutiya wanguja mumphepeti mwa msewu kuti wapemphesengi. 36  Wati wavwa chigulu cha ŵanthu chichijumpha, wangwamba kufumba vo vachitikanga. 37  Ŵanthu wo, angamukambiya kuti: “Kujumpha Yesu wa ku Nazareti!” 38  Wati wavwa venivi, wangwamba kudaniriza kuti: “Yesu Mwana waku Davidi, ndichitiyeni lisungu!” 39  Ndipu ŵanthu wo ŵenga nayu pafupi angwamba kumukalipiya ndi kumukambiya kuti waje cheti, kweni ndipu wadanirizanga so ukongwa kuti: “Mwana waku Davidi, ndichitiyeni lisungu!” 40  Pavuli paki, Yesu wanguma ndipu wangulamula kuti azi nayu kwaku iyu. Wati waza pafupi, Yesu wangumufumba kuti: 41  “Ukhumba kuti ndikuchitiyenji?” Munthu yo wangumuka kuti: “Ambuya, ndikhumba kuti ndiyambi so kulereska.” 42  Sonu Yesu wangumukambiya kuti: “Yamba kulereska; chivwanu chaku chakuchizga.” 43  Nyengu yeniyo, wangulereska ndipu wangwamba kulondo Yesu ndi kukankhuska Chiuta. Ndipuso ŵanthu wosi ŵati awona venivi anguthamika Chiuta.

Mazu Ngam'mphata

Pamwenga kuti, “kundivukisa.”
Pamwenga kuti, “chivwanu cha nge ichi.”
Pamwenga kuti, “mu nyengu yo yituza.” Wonani Mazu ngo Ngakonkhoskeka.