Luka 12:1-59

  • Chakutupisa cha Afalisi (1-3)

  • Muwopengi Chiuta, ŵanthu cha (4-7)

  • Kuzomera ndi kukana Khristu pa masu pa ŵanthu (8-12)

  • Ntharika ya munthu wachuma wakupusa (13-21)

  • Lekani kufipa mtima (22-34)

    • Kamskambu kamana (32)

  • Kuja akunozgeka (35-40)

  • Mteŵeti wapanyumba wakugomezgeka ndipuso wambula kugomezgeka (41-48)

  • Chimangu cha kweni kupatuska (49-53)

  • Kuziŵa nyengu (54-56)

  • Kumaliska nkhani (57-59)

12  Pa nyengu yeniyo, chigulu cha ŵanthu masauzandi nganandi chinguwungana pamoza mwakuti ŵanthu akandanangakandananga ŵaka. Sonu Yesu wangwamba kukambiya dankha akusambira ŵaki kuti: “Tcheŵani ndi chakutupisa cha Afarisi, cho chimiya uryarya.  Kweni palivi chinthu chakubisika umampha cho chazamuleka kuvumbulika, ndipuso palivi chisisi cho chazamuleka kuziŵika.  Mwaviyo, chechosi cho mwazamukambiya kumphepeti chazamuvwika pakweru, ndipu cho mwazamutokotoska munyumba zinu, chazamupharazgika pachanya pa nyumba.  Kweni nditikukambiyani yimwi abwezi ŵangu, mungaŵawopanga cha wo abaya liŵavu pe kwambula kuchita chinthu chinyaki chechosi chakujumpha yapa.  Kweni ndikukambiyeningi yo mutenere kumuwopa: Muwopengi Mweniyo asani wabaya we ndi mazaza ngakuponya so mu Gehena.* Nditikuneneskiyani, Mwenuyu ndiyu mumuwopengi.  Asi mpheta zinkhondi zigulisika tindalama tiŵi timana ukongwa?* Kweni palivi yo Chiuta watiyiluwa.*  Kweni chinanga ndi sisi la kumutu winu watiliŵerenga. Mungawopanga cha, chifukwa mwe akuzirwa ukongwa kuluska mpheta zinandi.  “Nditikukambiyani kuti, weyosi yo watindizomera pa masu pa ŵanthu, Mwana wa munthu nayu wazakumuzomera pa masu pa angelu aku Chiuta.  Kweni weyosi yo watindikana pa masu pa ŵanthu, nani ndazakumukana pa masu pa angelu aku Chiuta. 10  Munthu weyosi yo wanyoza Mwana wa munthu wazamugowokereka, kweni yo wanyoza mzimu wakupaturika wazamugowokereka cha. 11  Asani azikutoliyani pa masu pa ŵanthu,* pa ŵaraŵara a boma, kweniso pa ŵanthu akuwusa, mungazifipanga mtima cha kuti mwamukamba wuli pamwenga mwamukambanji pakujivikiliya. 12  Chifukwa mzimu wakupaturika wazakukusambizani mu ora lenilo vakuti mukambi.” 13  Sonu munthu munyaki mugulu lo wangukambiya Yesu kuti: “Msambizi, mukambiyeni mubali wangu kuti tigaŵani chihara.” 14  Yesu wangumukambiya kuti: “Wamunthu yiwi, ndiyani yo wakundisankha kuja wakweruzga pamwenga wakugaŵa chihara chinu?” 15  Pavuli paki wanguŵakambiya kuti: “Jani masu ndipu phweriyani ndi mbunu yamtundu wewosi, chifukwa chinanga munthu wangaŵa ndi vinthu vinandi, umoyu waki utuliya mu vinthu vo wenavu cha.” 16  Wati wakamba venivi, wanguŵakambiya ntharika yakuti: “Munda wa munthu wachuma ungupasa umampha. 17  Sonu wangwamba kuŵanaŵana kuti, ‘Sonu ndichitenji pakuti ndilivi kwakusunga vo ndakolora?’ 18  Iyu wangukamba kuti, ‘Ndichitengi ivi: Ndiwisiyengi pasi nkhokwi zangu, ndizengengi zinyaki zikuluzikulu ndipu mwenimo ndimu ndisungengi vosi vo ndakolora kweniso vinthu vangu vosi. 19  Ndikambiyengi umoyu wangu kuti: “We ndi vinthu vinandi vamampha vo visungikengi kwa vyaka vinandi; ungasuzgikanga cha, yirya, yimwa ndipu ujikondwesi wamweni.”’ 20  Kweni Chiuta wangumukambiya kuti, ‘Wakupusa yiwi, usiku weniwunu umoyu waku awukhumbengi. Sonu ndiyani yo wajengi ndi vinthu vo wasunga?’ 21  Viyo ndimu so viŵiya ndi munthu yo watijisungiya chuma kweni ndi mukavu kwaku Chiuta.” 22  Yesu wangukambiya akusambira ŵaki kuti: “Ndichu chifukwa chaki nditikukambiyani kuti, lekani kufipiya mtima umoyu winu kuti muryengenji pamwenga liŵavu linu kuti muvwalengenji. 23  Chifukwa umoyu ngwakuzirwa ukongwa kuluska chakurya kweniso liŵavu ndakuzirwa ukongwa kuluska chakuvwala. 24  Ŵanaŵaniyani achaholi: Amija mbewu cha pamwenga kuvuna, alivi nyumba yakusungiyamu mbewu pamwenga nkhokwi; kweni Chiuta watiŵaryisa. Asi yimwi mwe akuzirwa ukongwa kuluska viyuni? 25  Kumbi ndiyani waku yimwi yo wangasazgiyaku utali wa umoyu waki chinanga nkhamanavi* chifukwa cha kufipa mtima? 26  Sonu asani mutondeka kuchita chinthu chimana nge ichi, ntchifukwa wuli mufipa mtima ndi vinthu vinyaki? 27  Ŵanaŵaniyani mo maluŵa ngamudondu ngakuliya. Ngagwira ntchitu cha pamwenga kuluka salu, kweni nditikukambiyani kuti chinanga ndi Solomoni mu unkhankhu waki wosi wakuvwalapu cha malaya ngakutowa nge maluŵa yanga. 28  Sonu asani viyo ndimu Chiuta wavwalikiya vakume vamudondu vo msanawale vilipu, mawa viponyeka pamotu, kumbi yimwi wangatondeka kukuvwalikani kuluska venivi? Ntchifukwa wuli mwe ndi chivwanu chimana? 29  Sonu lekani kufipa mtima kuti muryengenji kweniso mumwengenji, ndipuso lekani kusuzgika maŵanaŵanu. 30  Chifukwa vosi ivi ndivu ŵanthu amitundu kucharu uku ativipenja ukongwa. Kweni Awusemwi aziŵa kuti yimwi mukhumbika vinthu venivi. 31  Kweni lutirizgani kupenja Ufumu waki, ndipu vinthu venivi visazgikiyengeku kwaku yimwi. 32  “Yimwi a kamskambu kamana mungawopanga cha, pakuti Awusemwi akondwa kukupaskani Ufumu. 33  Gulisani vinthu vinu ndipu mupereki mphasu zalisungu.* Pangani vikwama vandalama vambula kunangika, chuma chambula kumala kuchanya, ko munkhungu wafikaku cha ndipuso ko nyenji zileka kunanga. 34  Chifukwa ko kwe chuma chinu ndiku so kwe mtima winu. 35  “Vwalani ndipu nozgekani* kweniso nyali zinu zimbulikengi. 36  Ndipuso mujengi nge anthulumi wo alindizga mweneku wa nyumba kuti waweku ku zowala. Wachiweku wagong’osa pachisasa ndipu nyengu yeniyo ŵanthu wo atimujuliya. 37  Mbakutumbikika akapolu wo mbuyawu wachiza watiŵasaniya ŵe masu. Nditikuneneskiyani kuti iyu wavwalengi* kuti waŵateŵete, ndipu wakambiyengi akapolu wo kuti aje pathebulu, pavuli paki wazengi pafupi ndi yiwu kuziŵateŵete. 38  Mbakutumbikika akapolu wo, chifukwa chinanga mweneku wa nyumba wangaza mu ulinda wachiŵi* pamwenga mu ulinda wachitatu,* watiŵasaniya mbakunozgeka. 39  Kweni ziŵani kuti asani mweneku wa nyumba waziŵanga ora lo munkhungu waziyengi, watingi wazomerezengi cha kuti munkhungu waswi munyumba yaki. 40  Yimwi namwi lutirizgani kuja akunozgeka, chifukwa Mwana wa munthu wazengi mu ora lo yimwi muleka kuŵanaŵanaku.” 41  Pavuli paki Peturo wangukamba kuti: “Ambuya kumbi ntharika iyi mukambiya isi pe pamwenga mukambiya so weyosi?” 42  Ambuya angukamba kuti: “Kumbi ndiyani yo ndi mteŵeti wapanyumba* wakugomezgeka kweniso wazeru, mweniyo mbuyaki wamuŵikengi kuti wawoneriyengi ateŵeti ŵaki wosi a panyumba, kuti waŵapaskengi chakurya chakukwana pa nyengu yakwenere? 43  Ngwakutumbikika kapolu yo mbuyaki wachiza watimusaniya wachichita venivi. 44  Nditikuneneskiyani kuti wazakumuŵika kuti wawoneriyengi vinthu vaki vosi. 45  Kweni asani kapolu yo wangayamba kukamba mumtima mwaki kuti, ‘Ambuya aswera kuza,’ ndipu wangayamba kupuma akapolu anthulumi ndi anthukazi ndipuso kurya ndi kumwa kweniso kuloŵe, 46  mbuya wa kapolu yo wazengi pa zuŵa lo watiliŵanaŵaniya cha kuti wangaza ndipuso pa ora lo watiliziŵa cha. Ndipu wazakumulanga ukongwa kweniso wazakumuŵika kuchigaŵa cha ŵanthu ambula kugomezgeka. 47  Sonu kapolu yo wavwisa vo mbuyaki wakhumba, kweni waja wakunozgeka cha pamwenga kuchita vo wakumukambiya,* wazamukwechulika vikoti vinandi. 48  Kweni kapolu yo wanguvwisa cha vo mbuyaki wangukamba ndipu wachita vinthu vakuti wangakwechulika navu, wazamukwechulika vikoti vimanavi. Mbuneneska kuti weyosi yo wapaskika vinandi, vinandi vipenjekengi kutuliya kwaku iyu, ndipu weyosi yo waŵikika kuti wawoneriyengi vinthu vinandi, vinandi ukongwa vipenjekengi kutuliya kwaku iyu. 49  “Ndikuza kuzibuska motu pacharu, sonu pakuti wabuka kali, nanga ndingakhumbanji so? 50  Kukamba uneneska nde ndi ubatizu wo ndibatizikengi, kweni ndisuzgika maŵanaŵanu mpaka po ufiskikiyengi. 51  Kumbi muŵanaŵana kuti ndikuziya kuzipereka chimangu pacharu? Awa, kweni kuzipatuska ŵanthu. 52  Pakuti kwamba sonu, mwazamukuŵa ŵanthu ankhondi munyumba yimoza ndipu atatu azamupatukana ndi ŵaŵi, kweniso ŵaŵi azamupatukana ndi atatu. 53  Yiwu azamupatukana, ada azamupatukana ndi mwana wawu munthulumi, mwana munthulumi wazamupatukana ndi awisi, ama azamupatukana ndi mwana wawu munthukazi, mwana munthukazi wazamupatukana ndi anyina, mpongozi wazamupatukana ndi mkumwana waki, mkumwana wazamupatukana ndi apongozi ŵaki.” 54  Pavuli paki wangukambiya so chigulu cha ŵanthu kuti: “Asani muwona mtambu ukwera kuzambwi, nyengu yeniyo mukamba kuti, ‘Kuŵengi chivuwa cha mphepu,’ ndipu chiŵaku nadi. 55  Asani muwona mphepu yakutuliya kumwera mukamba kuti, ‘Kufundengi ukongwa,’ ndipu vichitika nadi. 56  Akunyenga yimwi, muziŵa mo kucharu kuŵiyengi, kweni mutondeka kuziŵa kuti vo vichitika pa nyengu yinu, ving’anamuwanji. 57  Ntchifukwa wuli mutondeka kuyeruzga mwija cho ntchirunji? 58  Mwakuyeruzgiyapu, asani munthu yo watikumba mulandu waluta nawi kwa wakweruzga, yesesa kumaliska nkhani yo ndi iyu mweche munthowa, kuti waleki kukutole kwa wakweruzga ndipu wakweruzga kwa msilikali wa pakhoti, ndipu msilikali wa pakhoti wangakuponya mujeri. 59  Nditikukambiya kuti wazamutuwamu cha mpaka po walipiriya ndalama zosi”*

Mazu Ngam'mphata

Wonani Mazu ngo Ngakonkhoskeka.
Mazu ngaki chayingu, “maasariyoni ngaŵi.”
Pamwenga kuti, “waleka kuyiphwere.”
Pamwenga kuti, “azikutoliyani kumasinagogi.”
Mazu ngaki chayingu, “janja limoza.”
Pamwenga kuti, “mphasu zakupaska akavu.” Wonani Mazu ngo Ngakonkhoskeka.
Mazu ngaki chayingu, “mangani malamba muchiwunu mwinu”
Pamwenga kuti, “wamangengi lamba.”
Kwamba cha mu ma 9 koloku mazulu mpaka pakati pa usiku.
Kwamba pakati pa usiku mpaka cha mu ma 3 koloku matandakucha.
Pamwenga kuti, “ndiyani wakuwonere panyumba.”
Pamwenga kuti, “wakhumba.”
Mazu ngaki chayingu, “leputoni yakumaliya.”