Chivumbuzi 5:1-14

  • Mpukutu wakumatika ndi vidindu 7 (1-5)

  • Mwanawambereri wato mpukutu (6-8)

  • Mwanawambereri ngwakwenere kulamatuwa vidindu (9-14)

5  Ndipu ndinguwona mpukutu wakulembeka mukati ndi kubwalu, we kujanja lamaryi laku Yo wanguja pampandu waufumu, ndipu mpukutu wo ungumatika ukongwa ndi vidindu 7.  Ndipu ndinguwona mungelu wanthazi ukongwa wachipharazga mwakudaniriza kuti: “Kumbi ndiyani yo ngwakwenere kujula mpukutu ndi kulamatuwa vidindu vaki?”  Kweni pengavi yo wangufiska kujula mpukutu wo ndi kuwonamu, kwali nkhuchanya pamwenga pacharu chapasi pamwenga kusi kwa charu chapasi.  Ndinguliya ukongwa chifukwa pengavi yo wenga wakwenere kujula pamwenga kuwonamu mumpukutu wo.  Kweni yumoza wa ŵara wangundikambiya kuti: “Leka kuliya. Awona! Nkharamu ya fuku laku Yuda, yo ndi msisi waku Davidi, yapunda kuti yijuli mpukutu wo ndipuso kuti yilamatuwi vidindu vaki 7.”  Ndipu ndinguwona Mwanawambereri wama pakati pa mpandu waufumu, pakati pa vamoyu vinayi ndipuso pakati pa ŵara. Mwanawambereri yo, wawonekanga nge kuti wabayika ndipu wenga ndi masengwi 7 ndi masu 7, ndipu masu ngamiya mizimu 7 yaku Chiuta yo yatumika mucharu chosi chapasi.  Nyengu yeniyo, wanguza panthazi ndipu wanguto mpukutu wo wenga kujanja lamaryi laku Yo wanguja pampandu waufumu.  Wati wato mpukutu wo, vamoyu vinayi ndipuso ŵara 24 angugwadiya Mwanawambereri ndipu weyosi waku yiwu wenga ndi bangu ndipuso mbali yagolidi yo yinguzaza ndi vakununkhira. (Vakununkhira vimiya mapempheru nga akupaturika.)  Ndipu yiwu ambanga sumu yifya, kuti: “Ndimwi akwenere kuto mpukutu ndi kulamatuwa vidindu vaki pakuti mungubayika ndipu ndi ndopa zinu mukuguliya Chiuta ŵanthu akutuliya mu fuku lelosi, lilimi lelosi,* mtundu wewosi ndipuso charu chechosi, 10  mukuŵapanga kuja ufumu ndi asembi kwaku Chiuta widu ndipu azamuwusa charu chapasi nge mafumu.” 11  Ndipu ndinguwona ndi kuvwa mazu nga angelu anandi wo anguzunguliya mpandu waufumu, vamoyu ndipuso ŵara, ndipu chiŵerengeru chawu chenga chikulu ukongwa* kweniso masawuzandimasawuzandi, 12  ndipu akambanga mwakudaniriza kuti: “Mwanawambereri yo wangubayika ngwakwenere kulonde mazaza, chuma, zeru, nthazi, ulemu, unkhankhu ndi vitumbiku.” 13  Ndipu ndinguvwa chakulengeka chechosi chakuchanya, chapacharu chapasi, chakusi kwa charu chapasi, chamunyanja, ndi vinthu vosi va mwenimo vichikamba kuti: “Kwaku Yo waja pampandu waufumu ndi Mwanawambereri, kuŵi vitumbiku, ulemu, unkhankhu ndi nthazi muyaya mpaka muyaya.” 14  Vamoyu vinayi vo, vakambanga kuti: “Ame!” ndipu ŵara angugwada ndi kusopa.

Mazu Ngam'mphata

Pamwenga kuti, “chineneru chechosi.”
Pamwenga kuti, “chenga masawuzandi tayimuzi masawuzandi.”