Chivumbuzi 21:1-27

  • Kuchanya kufya kweniso charu chapasi chifya (1-8)

    • Kwazamuŵavi nyifwa (4)

    • Vinthu vosi vipangika kuja vifya (5)

  • Kukonkhoska Yerusalemu mufya (9-27)

21  Ndinguwona kuchanya kufya ndi charu chapasi chifya; pakuti kuchanya kwakali ndi charu chapasi chakali valutapu, ndipu kulivi so.  Ndinguwona so tawuni yakupaturika yo ndi Yerusalemu Mufya, yichisika kutuwa kuchanya kwaku Chiuta, ndipu yingunozgeka nge mwali yo wadyoŵeka chifukwa cha mulumu waki.  Pavuli paki ndinguvwa mazu nganthazi kutuliya kumpandu waufumu ngakuti: “Awonani! Chihema chaku Chiuta che pakati pa ŵanthu. Iyu wajengi nawu ndipu yiwu aŵengi ŵanthu ŵaki. Ndipu Chiuta iyu mweneku waŵengi nawu.  Ndipu waleskengi masozi ngosi mumasu mwawu, nyifwa yiŵengepu so cha, chinanga nkhuliya pamwenga kukuta pamwenga urwirwi viŵengepu so cha. Vinthu vakali vajumphapu.”  Ndipu Mweniyo waja pampandu waufumu wangukamba kuti: “Awonani! Ndipanga vinthu vosi kuja vifya.” Wangukamba so kuti: “Lemba, pakuti mazu yanga ngakugomezgeka* ndipuso ngauneneska.”  Ndipu wangundikambiya kuti: “Ngafiskika! Ini ndini Alefa ndi Omega* ndipuso chiyambi ndi umaliru. Weyosi yo we ndi nyota ndimupaskengi maji ngaumoyu nga mukasupi kwawezi.  Munthu weyosi yo wapunda, waharengi vinthu venivi, ini ndiŵengi Chiuta waki, ndipu iyu waŵengi mwana wangu.  Kweni ŵanthu amantha, ambula chivwanu, akufipiskika chifukwa cha vakuchita vawu vaunyakazi, akubaya ŵanthu, akuchita malusu ngaheni ngakugonana,* akuchita vamizimu, akusopa angoza kweniso aboza wosi, chigaŵa chawu chazamuja munyanja yakunyeka motu ndi sulufule. Yeniyi ndi nyifwa yachiŵi.”  Yumoza mwa angelu 7 wo ŵenga ndi mbali 7 zakuzaza ndi milili 7 yakumaliya, wanguza ndi kukamba kuti: “Iza kunu, ndikulongongi mwali, yo ndi muwolu wa Mwanawambereri.” 10  Sonu mu nthazi ya mzimu, wangundipingiya paphiri likulu kweniso litali, ndipu wangundilongo tawuni yakupaturika ya Yerusalemu yichisika kutuwa kuchanya kwaku Chiuta, 11  ndipu yenga ndi unkhankhu waku Chiuta. Kujeduka kwaki kwenga nge kwa mwa wakuzirwa ukongwa, nge mwa wa jaspa wakuŵala ukongwa nge gilasi lakulangala. 12  Yenga ndi mpanda ukulu kweniso utali, ndipuso yenga ndi mageti 12 ndipu pamageti ngo penga angelu 12. Pamageti ngo pangulembeka mazina nga mafuku 12 nga ŵana aku Isirayeli. 13  Kuvuma kwaki kwenga mageti ngatatu, kumpotu ngatatu, kumwera ngatatu ndipu kuzambwi kwenga so ngatatu. 14  Mpanda wa tawuni yo, wenga so ndi mya 12 ya pafawundeshoni. Pa mya yeniyi, pangulembeka mazina 12 nga akutumika 12 a Mwanawambereri. 15  Sonu yo walongoronga nani wangukoleze deti lagolidi nge mwesu, kuti wapimiyi tawuni ndi mageti ngaki kweniso mpanda waki. 16  Tawuni yo, njakuyanana vigaŵa vosi vinayi, ndipu mu utali ndi mu ufupi njakuyanana. Wangupima tawuni ndi deti lo ndipu utali waki wenga makilomita pafufupi 2,220;* yenga so yakuyanana mu utali, mu ufupi ndi mu msinkhu. 17  Wangupima so mpanda ndipu wenga pafufupi mamita 64* mwakukoliyana ndi mwesu wa munthu, wo uyanana so ndi mwesu wa mungelu. 18  Mpanda waki ungupangika ndi mwa wa jaspa, ndipu tawuni yo yenga yagolidi chayiyu wakuŵala nge gilasi. 19  Mafawundeshoni nga mpanda wa tawuni yo, ngangudyoŵeka ndi mya yakuzirwa ya mitundu yakupambanapambana. Fawundeshoni yakwamba yenga ya jaspa, yachiŵi safaya, yachitatu kasedone, yachinayi emeradi, 20  yachinkhondi sadonekisi, ya 6 sadiyasi, ya 7 kurusolayiti, ya 8 berilo, ya 9 topazi, ya 10 kurusopurezi, ya 11 hayasifi ndipu ya 12 amefisiti. 21  Ndipuso mageti 12 ngangupangika ndi ngali* 12; geti lelosi lingupangika ndi ngali yimoza. Msewu ukulu wa mutawuni yo, wenga wagolidi chayiyu, wakulangala nge gilasi. 22  Mutawuni yeniyi ndinguwonamu nyumba yakusopiyamu cha, chifukwa Yehova Chiuta Wanthazizosi ndipuso Mwanawambereri ndiwu nyumba yakusopiyamu ya tawuni yo. 23  Ndipu mutawuni iyi mwakhumbikanga lumwi cha pamwenga mwezi kuti viyiŵaliyi, chifukwa unkhankhu waku Chiuta unguyimbulikiya ndipu Mwanawambereri ndiyu wenga nyali yaki. 24  Ndipu mitundu ya ŵanthu yazamukwenda mwakugwiriskiya ntchitu ukweru wa tawuni yo, kweniso mafumu nga charu ngazamukuza mwenumu ndi unkhankhu wawu. 25  Mageti ngaki ngazamujalika cha ndi msana chifukwa kwazamuŵavi usiku. 26  Pakuti azamukuza ndi unkhankhu ndipuso ulemu wa mitundu ya ŵanthu mutawuni yeniyi. 27  Kweni chechosi chakufipiskika ndipuso munthu weyosi yo wachita vinthu vaunyakazi kweniso vachinyengu, wazamuseremu cha mutawuni iyi. Ŵanthu ŵija wo akulembeka mumpukutu waumoyu wa Mwanawambereri, ndiwu azamuseremu.

Mazu Ngam'mphata

Pamwenga kuti, “ngakuthembeka.”
Pamwenga kuti, “A ndi Z.” Alefa ndi Omega, ntchilembu chakwamba ndi chakumaliya mu alifabeti ya Chigiriki.
Wonani Mazu ngo Ngakonkhoskeka.
Mazu ngaki chayingu, “masitadiya 12,000.” Sitadiya yimoza yiyanana ndi mamita 185 (Mafiti 606.95).
Mazu ngaki chayingu, “manja 144.” (Mafiti 210).
Wonani mazu ngamumphata pa Mateyu 7:6.