Chivumbuzi 19:1-21

  • Thamikani Ya chifukwa cha vyeruzgu vaki (1-10)

    • Zowala za Mwanawambereri (7-9)

  • Wakukwera pahachi yituŵa (11-16)

  • Phwandu likulu la chakurya chamazulu chaku Chiuta (17, 18)

  • Chinyama chakofya chathereskeka (19-21)

19  Pavuli paki ndinguvwa nge mazu ngakulu nga chigulu cha ŵanthu kutuliya kuchanya. Yiwu akambanga kuti: “Thamikani Ya!* Utaski, unkhankhu ndi nthazi, vaku Chiuta widu,  chifukwa vyeruzgu vaki vauneneska kweniso virunji. Pakuti wapereka cheruzgu pa huli likulu lo likunanga charu ndi malusu ngaki ngaheni ngakugonana,* kweniso iyu waweze ndopa za akapolu ŵaki zo ze mu manja mwa munthukazi yo.”*  Ndipu nyengu yeniyo, angukamba kachiŵi kuti: “Thamikani Ya!* Josi lakutuliya mu munthukazi yo lilutirizga kukwera muyaya mpaka muyaya.”  Ndipu ŵara 24 ndi vamoyu vinayi anguwa pasi ndi kusopa Chiuta mweniyo waja pampandu waufumu. Yiwu angukamba kuti: “Ame! Thamikani Ya!”*  Ndipuso mazu ngangutuliya kumpandu waufumu ngakuti: “Lutirizgani kuthamika Chiuta widu, yimwi mosi akapolu ŵaki, yimwi mutimuwopa, mwaŵara ndi amana.”  Ndipu ndinguvwa nge mazu nga chigulu chikulu, nge kupoma kwa maji nganandi kweniso nge mazu ngakugululusa kwa kuchanya. Yiwu angukamba kuti: “Thamikani Ya!* chifukwa Yehova Chiuta widu Wanthazizosi wayamba kuwusa nge fumu!  Tiyeni tikondwi ndi kusekere ukongwa ndipuso timukankhuski chifukwa zowala za Mwanawambereri zafika kweniso muwolu waki wajinozgekeresa kali.  Ndipu munthukazi yo, wanguzomerezeka kuvwala malaya ngakuŵala, ngakutowa kweniso ngamampha ukongwa chifukwa malaya ngamampha ngamiya ntchitu zirunji za akupaturika.”  Ndipu wangundikambiya kuti, “Lemba kuti: Mbakutumbikika wo adanika ku chakurya chamazulu cha zowala za Mwanawambereri.” Wangundikambiya so kuti: “Yanga ndi mazu ngauneneska ngaku Chiuta.” 10  Wati wakamba venivi, ndinguwa panthazi pamaphazi ngaki kuti ndimusopi. Kweni iyu wangundikambiya kuti: “Phwere! Ungachitanga viyo cha! Nani nde kapolu munyaku ŵaka ndipuso nde kapolu munyawu wa abali ŵaku ŵeniwo ŵe ndi ntchitu yakupereka ukaboni waku Yesu. Sopa Chiuta! Pakuti uchimi ukukambirika chifukwa cha ukaboni wakukwaskana ndi Yesu.” 11  Ndingulereska ndipu ndinguwona hachi yituŵa. Ndipu mweniyo wangukwera pahachi yo, wadanika kuti Wakugomezgeka kweniso Muneneska, ndipu wayeruzga ndi kuchita nkhondu mwaurunji. 12  Masu ngaki nga nge mulipu wa motu, ndipu pamutu waki pe visoti vaufumu vinandi. We ndi zina lakulembeka, lenilo palivi yo watiliziŵa kupatuwaku iyu mweneku pe. 13  Iyu wavwala malaya ngakubwalu ngo nganthonyezeka* ndopa, ndipu wadanika zina lakuti Mazu Ngaku Chiuta. 14  Magulu ngakuchanya nangu ngamulondonga pamahachi ngatuŵa, ndipu nganguvwala vakuvwala vituŵa, vakutowa kweniso vamampha ukongwa. 15  Ndipuso mumulomu mwaki mulolopoka lipanga lakuthwa, litali lo wakhumba kubayiya mitundu, ndipu wazakuŵakhwema ndi nthonga yachisulu. Kweniso, wakandakanda malu ngakukandiyamu mphereska nga ukali waku Chiuta Wanthazizosi. 16  Pa malaya ngaki ngakubwalu, pachiŵa chaki, we ndi zina lakulembeka, lakuti Fumu ya mafumu kweniso Mbuya wa ambuya. 17  Ndinguwona so mungelu wama mulumwi, ndipu wangudaniriza ndi mazu nganthazi ndi kukambiya viyuni vosi vo viphululuka mude kuti: “Zani kunu, wunganani pamoza ku phwandu likulu la chakurya chamazulu chaku Chiuta, 18  kuti muziryi minofu ya mafumu, minofu ya ŵara ŵa asilikali, minofu ya ŵanthu anthazi, minofu ya mahachi ndi ya akukwera pamahachi ngo, minofu yaku wosi, ya anangwa ndi ya akapolu ndipuso ya amana ndi ŵara.” 19  Ndipu ndinguwona chinyama chakofya, mafumu nga charu ndi magulu nga asilikali ŵawu, awungana pamoza kuti achiti nkhondu ndi yo wakwera pahachi, limoza ndi gulu la asilikali ŵaki. 20  Chinyama chakofya chingukoleka limoza ndi mchimi waboza mweniyo wachitanga vakuziziswa pa masu paki, venivo wakulandizga navu wosi wo akulonde chidindu cha chinyama chakofya kweniso wosi wo asopa chikozgu chaki. Chinyama chakofya ndi mchimi waboza, vinguponyeka munyanja yamotu yakunyeka ndi sulufule, veche vamoyu. 21  Kweni anyaki wosi angubayika ndi lipanga lo lingulolopoka mumulomu mwaku yo wangukwera pahachi. Ndipu viyuni vosi vinguguta minofu yawu.

Mazu Ngam'mphata

Pamwenga kuti, “Aleluya!” “Ya” ndi mazu ngakudumuwa nga zina lakuti Yehova.
Malusu ngaheni ngakugonana. Mu Chigiriki, por·neiʹa. Wonani Mazu ngo Ngakonkhoskeka.
Mazu ngaki chayingu, “kutuliya mu manja ngaki.”
Pamwenga kuti, “Aleluya!” “Ya” ndi mazu ngakudumuwa nga zina lakuti Yehova.
Pamwenga kuti, “Aleluya!” “Ya” ndi mazu ngakudumuwa nga zina lakuti Yehova.
Pamwenga kuti, “Aleluya!” “Ya” ndi mazu ngakudumuwa nga zina lakuti Yehova.
Panyaki kuti, “ngawazika.”