Julani

Lutani pa vo ve mukati

Chivumbuzi 11:1-19

NKHANI ZO ZE MUBUKU ILI

  • Akaboni ŵaŵi (1-13)

    • Akamba uchimi kwa mazuŵa 1,260 avwala vigudulu (3)

    • Abayika ndipu alekeka ambula kuŵikika mumuwunda (7-10)

    • Aja so ndi umoyu pavuli pa mazuŵa ngatatu ndi hafu (11, 12)

  • Soka lachiŵi lajumphapu ndipu lachitatu lituza (14)

  • Mbata ya 7 (15-19)

    • Ufumu wa Ambuyafwi ndipuso waku Khristu wawu (15)

    • Wo ananga charu nawu azamunangika (18)

11  Ndingupaskika deti lange nthonga* ndipu ndingukambirika kuti: “Soka ndi kupima malu ngakupaturika nga munyumba yakusopiyamu yaku Chiuta, malu ngakuperekiyapu sembi* ndipuso ŵanthu wo asope munyumba yo.  Kweni balaza lakubwalu kwa malu ngakupaturika nga munyumba yakusopiyamu, ulileki, ungalipimanga cha, chifukwa laperekeka ku ŵanthu amitundu yinyaki, ndipu azamukandakanda tawuni yakupaturika kwa myezi 42.  Ndazamuchitiska kuti akaboni ŵangu ŵaŵi akambi uchimi kwa mazuŵa 1,260 avwala vigudulu.”  Akaboni ŵenaŵa ayeruzgikiya ndi vimiti viŵi va maolivi kweniso vakuŵikapu nyali viŵi, ndipu atuma panthazi pa Mbuya wa charu.  Asani munthu munyaki wakhumba kuŵapweteka, mumulomu mwawu mutuwa motu ndi kuwotcha arwani ŵawu. Viyo ndimu watenere kubayikiya munthu weyosi yo wakhumba kuŵapweteka.  Yiwu ŵe ndi mazaza ngakujala kuchanya* kuti vuwa yileki kuwa mu mazuŵa ngo akambiya uchimi, ndipuso ŵe ndi mazaza ngakusambuska maji kuja ndopa, kweniso kupweteka charu ndi milili yamtundu wosi kananandi ŵaka nge mo yiwu akhumbiya.  Asani amaliza kupereka ukaboni wawu, chinyama chakofya chakutuliya muchizenji, chazamuchita nawu nkhondu, chazakuŵathereska ndi kuŵabaya.  Ndipu mathupi ngawu ngazamuja mumisewu yikuluyikulu ya mutawuni yikulu, yo mwakuyeruzgiya yidanika kuti Sodomu ndi Ijipiti, kweniko Ambuyawu nawu akubayikiya pachimiti.  Ndipu wo atuliya mu ŵanthu akupambanapambana, mu mafuku, mu malilimi* ndipuso mu mitundu, azamulereska mathupi ngawu kwa mazuŵa ngatatu ndi hafu, ndipu azamuzomereza cha kuti mathupi ngawu ngaŵikiki mumuwunda. 10  Ndipu wo aja pacharu chapasi azamusekere chifukwa cha nyifwa zawu ndipu azamukondwa ukongwa kweniso azamutumiziyana mphasu, pakuti achimi ŵaŵi ŵenaŵa, asuzganga ŵanthu wo aja pacharu chapasi. 11  Mazuŵa ngatatu ndi hafu ngati ngamala, mzimu wa umoyu wakutuliya kwaku Chiuta ungusere mwaku yiwu, anguma wima ndipu ŵanthu wo aŵawonanga angutenthema ukongwa. 12  Anguvwa mazu ngakudaniriza kutuliya kuchanya ngachiŵakambiya kuti: “Zani kunu.” Yiwu angukwere kuchanya mumitambu, ndipu arwani ŵawu anguŵawona.* 13  Mu ora lenilo, kunguchitika chidilirisi chikulu ndipu chimoza mwa vigaŵa 10 va tawuni, chinguwa. Ŵanthu 7,000 angubayika ndi chidilirisi. Kweni anyaki wosi, anguchita mantha ndipu angupereka unkhankhu kwaku Chiuta wakuchanya. 14  Soka lachiŵi lajumphapu. Awonani! Soka lachitatu lituza mwaliŵi. 15  Mungelu wa 7 wangumba mbata yaki. Kuchanya kunguvwika mazu ngakudaniriza kuti: “Ufumu wa charu chapasi waja Ufumu wa Ambuyafwi ndipuso waku Khristu wawu, ndipu yiwu azamuwusa nge fumu muyaya mpaka muyaya.” 16  Ndipu ŵara 24 wo anguja panthazi paku Chiuta mumipandu yawu yaufumu, angugwada ndi kusindama mpaka visku pasi, ndipu angusopa Chiuta. 17  Yiwu akambanga kuti: “Titikuwongani Yehova Chiuta Wanthazizosi, yo waliku, ndipuso yo wengaku, chifukwa mwato nthazi zinu zikulu ndipu mwayamba kuwusa nge fumu. 18  Kweni mitundu yingukwiya, ndipu ukali winu unguza, ndipuso nyengu yakuŵikika yingukwana yakuti akufwa ayeruzgiki, kweniso nyengu yakupereke mphotu kwa akapolu ŵinu achimi, kwa akupaturika, kwaku wo atopa zina linu, amana ndi ŵara, kweniso nyengu yakunangiya wo ananga charu chapasi.” 19  Ndipu kuchanya, malu ngakupaturika nga munyumba yakusopiyamu ngaku Chiuta ngangujulika, bokosi laphanganu linguwoneka mumalu ngaki ngakupaturika nga munyumba yakusopiyamu. Ndipu kungung’anima malimphezi, kunguvwika mazu, kungugululusa, kunguchita chidilirisi ndipuso kwenga matalala ngakulu.

Mazu Ngam'mphata

Pamwenga kuti, “nthonga yakupimiya.”
Pamwenga kuti, “jotcheru.”
Pamwenga kuti, “mude.”
Pamwenga kuti, “mu vineneru.”
Pamwenga kuti, “awonanga.”