Aroma 9:1-33

  • Paulo wachitiya chitima mtundu wa Ayisirayeli (1-5)

  • Mphapu chayiyu yaku Abrahamu (6-13)

  • Palivi yo wangasuska vo Chiuta wasankha (14-26)

    • Viyaŵi va ukali ndi va lisungu (22, 23)

  • Akujaku pe ndiwu azamutaskika (27-29)

  • Ayisirayeli aguŵa (30-33)

9  Ndikamba uneneska mwaku Khristu; ndipusika cha, nge mo njuŵi yangu yitindichitiya ukaboni mwakukoliyana ndi mzimu wakupaturika,  kuti nde ndi chitima chikulu ndipuso urwirwi wambula kumala mumtima.  Pakuti ndingayanja kuti ndipaturiki kwaku Khristu nge munthu wakutembeka chifukwa cha abali ŵangu, ŵeniwo mbanthu amtundu wangu,  Ayisirayeli. Chiuta wanguŵasankha kuti aje ŵana ŵaki ndipu wanguŵapaska unkhankhu, mapanganu, Dangu,* uteŵeti wakupaturika kweniso layizgu.  Yiwu akutuwa kwa apapi ŵidu akali, ndipu Khristu nayu so wakutuwa mwaku yiwu. Wathamikiki mpaka muyaya Chiuta mweniyo ngwapachanya kuluska vosi. Ame.  Kweni, ving’anamuwa kuti mazu ngaku Chiuta ngawa paŵaka cha. Chifukwa ndi wosi cha wo atuliya kwaku Isirayeli wo “Mbayisirayeli” nadi.  Ndipuso ndi wosi cha ŵeniwo mbana aku Chiuta chifukwa chakuti ndi mphapu* yaku Abrahamu, kweni kukulembeka kuti: “Yo yazamudanika kuti mphapu* yaku, yazamutuliya mwaku Isaki.”  Ivi ving’anamuwa kuti ŵana akuliŵavu mbana aku Chiuta chayiwu cha, kweni ŵana a layizgu ndiwu watiŵakamba kuti mphapu.*  Pakuti mazu nga layizgu ngenga ngakuti: “Ndazamukuza pa nyengu yeniyinu ndipu Sara wazamuja ndi mwana munthulumi.” 10  Mphanyengu yeniyi pe cha, kweni pa nyengu so yo Rabeka wanguja ndi nthumbu ya ŵana amuwoli, kutuliya kwaku Isaki, mpapi widu wakali. 11  Pakuti ŵechendaweku ndipuso ŵechendachitepu chinthu chechosi, chamampha pamwenga chiheni, kuti khumbu laku Chiuta la kusankha lilutiriyi kwambula kuthemba ntchitu, kweni kuthemba Yo wadana, 12  iyu wangukambiya Rabeka kuti: “Mura wazamukuŵa kapolu wa mumana.” 13  Ivi viyanana ndi vo vikulembeka kuti: “Ndingwanja Yakobe, kweni Esawu ndingumutinkha.” 14  Sonu tingakambanji? Kumbi Chiuta ngwambula urunji? Awa! 15  Chifukwa iyu wangukambiya Mozesi kuti: “Ndazamulongo lisungu munthu weyosi yo ndingamulongo lisungu ndipuso ndazamuchitiya chitima munthu weyosi yo ndingamuchitiya chitima.” 16  Mwaviyo, vithemba kukhumba kwa munthu cha pamwenga phamphu laki,* kweni Chiuta mweniyo we ndi lisungu. 17  Pakuti lemba likambiya Farawo kuti: “Ndakuleka wamoyu pa chifukwa ichi pe: kuti ndilongo nthazi zangu chifukwa chaku yiwi, kweniso kuti zina langu lipharazgiki ku ŵanthu wosi pacharu.” 18  Mwaviyo, iyu wachitiya lisungu munthu weyosi yo wakhumba, kweni wazomereza munthu weyosi yo wakhumba kuti wanonopi mtima. 19  Yiwi wazakundikambiya kuti: “Ntchifukwa wuli iyu weche kusaniriya vifukwa ŵanthu? Pakuti ndiyani wangasuskana ndi khumbu laki?” 20  Kweni wamunthu yiwi, ndiwi yani kuti umukengi Chiuta? Kumbi chinthu chakuwumbika chingakambiya wakuwumba kuti: “Ntchifukwa wuli ukundiwumba viyo?” 21  Kumbi asi wakuwumba ndiyu we ndi wanangwa wakuwumba chiyaŵi chakuzirwa ndi chambula kuzirwa kutuliya ku bulunga limoza ladongu? 22  Sonu wuli asani Chiuta wangulekere mwakuzizipizga viyaŵi va ukali vakwenere kunangika, chinanga kuti wangakhumba kulongo ukali waki ndi nthazi zaki? 23  Ndipu asani wanguchita venivi kuti walongo chuma cha unkhankhu waki pa viyaŵi va lisungu vo wakuvinozge limu kuti vije vaunkhankhu, 24  kung’anamuwa isi wakutidana mu mtundu wa Ayuda pe cha, kweni mumitundu yakupambanapambana, vingaŵa wuli? 25  Ve nge mo iyu wangukambiya kuporote mwaku Hoseya kuti: “Ŵanthu wo mbangu cha, ndazakuŵadana kuti ‘ŵanthu ŵangu,’ ndipu munthukazi yo ndamuyanjana cha ndazakumudana kuti, ‘wakwanjiwa’; 26  ndipu mumalu mo yiwu angukambikiya kuti, ‘Ndimwi ŵanthu ŵangu cha,’ mwenimo ndimu azamudanikiya kuti, ‘ŵana aku Chiuta wamoyu.’” 27  Kweniso Yesaya wadaniriza vakukwaskana ndi Ayisirayeli kuti: “Chinanga kuti ŵana aku Isirayeli angaŵa anandi nge mchenga wakunyanja, kweni mbakujaku pe wo azamutaskika. 28  Pakuti Yehova wazakuchimba mulandu charu, wazakuchiyeruzga ndipu wazamuswera cha.”* 29  Nge mo Yesaya wangukambiya so limu kuti: “Asani Yehova wa mizinda wanguleka kutisiliya mphapu,* mphanyi sonu te nge Sodomu ndipuso tatingi tiyananengi ndi Gomora.” 30  Sonu tingakambanji? Tingakamba kuti ŵanthu amitundu yinyaki chinanga kuti alondo urunji cha, kweni asaniya urunji ndipu atiwusaniya chifukwa cha chivwanu. 31  Kweni Ayisirayeli chinanga kuti alondonga dangu laurunji, angulisaniya cha dangu lo. 32  Chifukwa wuli? Ntchifukwa chakuti angulilondo ndi chivwanu cha, kweni ndi ntchitu. Anguguŵa pa “mwa wakuguŵiska”; 33  nge mo vikulembeke kuti: “Awonani ndiŵika mwa wakuguŵiska mu Ziyoni ndipuso jalawi lakuwisa, kweni munthu yo chivwanu chaki che pajalawi lo, wazamuguŵa cha.”

Mazu Ngam'mphata

Wonani Mazu ngo Ngakonkhoskeka.
Mazu ngaki chayingu, “mbewu.”
Mazu ngaki chayingu, “mbewu.”
Mazu ngaki chayingu, “mbewu.”
Mazu ngaki chayingu, “vithemba munthu yo wakhumba cha pamwenga munthu yo watchimbiya.”
Mazu ngaki chayingu, “wazakuchimaliza ndipu wazakuchifupikisa.”
Mazu ngaki chayingu, “mbewu.”