Aroma 8:1-39

  • Umoyu kweniso kufwatulika kuporote mu mzimu (1-11)

  • Mzimu wo uchitiska kuti tije ŵana aku Chiuta utitichitiya ukaboni (12-17)

  • Chilengedu chilindizga wanangwa wa ŵana aku Chiuta (18-25)

  • “Mzimu uŵeyere mumalu mwaku isi” (26, 27)

  • Kusankhikiya limu ndi Chiuta (28-30)

  • Kuthereska kuporote mu chanju chaku Chiuta (31-39)

8  Mwaviyo, wo akoliyana ndi Khristu Yesu alivi mulandu.  Chifukwa dangu la mzimu lo lipereka umoyu mwakukoliyana ndi Khristu Yesu, lakufwatuwani ku dangu la ubudi ndi la nyifwa.  Vo Dangu* lingutondeka kuchita chifukwa chakuti lengavi nthazi kuporote mu liŵavu, Chiuta wakuvichita mwakutuma Mwana waki chayiyu yo wanguja ndi liŵavu lange liŵavu la ubudi kuti wathereski ubudi. Mwaviyo, wathereska ubudi wo we muliŵavu,  kuti fundu zaurunji za Dangu* zifiskiki mwaku isi titenda mwakukoliyana ndi liŵavu cha, kweni mwakukoliyana ndi mzimu.  Pakuti ŵanthu wo aja mwakukoliyana ndi liŵavu, aŵika maŵanaŵanu ngawu pa vinthu va liŵavu, kweni wo aja mwakukoliyana ndi mzimu aŵika maŵanaŵanu ngawu pa vinthu va mzimu.  Chifukwa kuŵika maŵanaŵanu pa vinthu va liŵavu kulongozge ku nyifwa, kweni kuŵika maŵanaŵanu pa vinthu va mzimu, kulongozge ku umoyu ndi chimangu,  pakuti kuŵika maŵanaŵanu pa vinthu va liŵavu nkhujiŵika pa urwani ndi Chiuta, chifukwa liŵavu litijithereska cha ku dangu laku Chiuta ndipu kukamba uneneska, lingathera cha.  Sonu ŵanthu wo akoliyana ndi liŵavu angamukondwesa cha Chiuta.  Kweni yimwi mwe akukoliyana ndi liŵavu cha, kweni mwe akukoliyana ndi mzimu asani mzimu waku Chiuta we mwaku yimwi nadi. Kweni munthu weyosi yo walivi mzimu waku Khristu, munthu mwenuyu ngwaku Khristu cha. 10  Kweni asani Khristu ngwakukoliyana ndi yimwi, liŵavu ndakufwa chifukwa cha ubudi, kweni mzimu upereka umoyu chifukwa cha urunji. 11  Asani sonu panu mzimu waku yo wakuyuska Yesu ku nyifwa we mwaku yimwi, ndikuti mweniyo wakuyuska Khristu Yesu ku nyifwa, wazamuchitiska so maliŵavu ngidu ngakufwa kuja ngamoyu kuporote mu mzimu waki wo uja mwaku yimwi. 12  Sonu abali, te ndi ngongoli, kweni ku liŵavu cha kuti tijengi mwakukoliyana ndi makhumbiru nga liŵavu; 13  pakuti asani muja mwakukoliyana ndi liŵavu, mufwengi nadi; kweni asani mubaya vakuchita va liŵavu mwakugwiriskiya ntchitu mzimu, mwazamuja ndi umoyu. 14  Pakuti wosi wo alongozgeka ndi mzimu waku Chiuta mbana aku Chiuta nadi. 15  Pakuti mukulonde mzimu wa ukapolu cha wo uchitiska so mantha, kweni mukulonde mzimu wakuti muje ŵana ŵaki, ndipu ndi mzimu weniwo tidaniriza kuti: “Aba,* Ada!” 16  Mzimu yiwu weneku, uchitiya ukaboni limoza ndi mzimu widu kuti te ŵana aku Chiuta. 17  Asani te ŵana, te so akuhara, akuhara nadi aku Chiuta, kweniso akuhariya limoza ndi Khristu asani tisuzgikiya nayu limoza ndi chilatu chakuti nasi tikankhuskikiyi nayu limoza. 18  Chifukwa ndiwona kuti masuzgu nga umoyu wunu nkhanthu cha pakungayeruzgiya ndi unkhankhu widu wo wazamuvumbulika. 19  Pakuti chilengedu chilindizga mwakunweka kuvumbulika kwa ŵana aku Chiuta. 20  Pakuti chilengedu chikuperekeka ku mijalidu yabwekabweka, mwakukhumba chija cha, kweni kuporote mwaku yo wakuchipereka, chifukwa cha chilindizga 21  chakuti chilengedu chenichi chazamufwatulika ku ukapolu wa kuvunda ndi kuja ndi wanangwa waunkhankhu wa ŵana aku Chiuta. 22  Chifukwa tiziŵa kuti chilengedu chosi chilutirizga kutamanthiya limoza ndipu chosi pamoza chituvwa urwirwi mpaka sonu. 23  Ntchenichi pe cha, taŵeni so isi te ndi vipasu vakwamba, kung’anamuwa mzimu, nasi so titamantha mumitima yidu, po tilindizga ndi mtima wosi kuja ŵana aku Chiuta kuti tifwatuliki ku maliŵavu ngidu mwakugwiriskiya ntchitu sembi yakuwombole. 24  Chifukwa tikutaskika mu chilindizga chenichi, kweni chilindizga chakuwoneka, ntchilindizga cha, pakuti asani munthu wawona chinthu, kumbi watichilindizga so kuti chizengi? 25  Kweni asani tilindizga chinthu cho titichiwona cha, tilutirizga kuchilindizga ndi mtima wosi mwakukunthiyapu. 26  Mwakuyanana ŵaka, mzimu nawu so utitiwovya asani talopwa; pakuti suzgu njakuti tiziŵa cha vo titenere kupempha nge mo tikhumbikiya, kweni madandawulu ngo* titondeka kukamba, mzimu uŵeyere mumalu mwaku isi. 27  Kweni mweniyo wafufuza mitima waziŵa vo mzimu ung’anamuwa, pakuti uŵeyere mwakukoliyana ndi khumbu laku Chiuta chifukwa cha akupaturika. 28  Tiziŵa kuti Chiuta wachitiska kuti ntchitu zaki zosi zikoliyani pamoza, kuti wawovyi wo atimuyanja, ŵeniwo adanika mwakukoliyana ndi khumbu laki, 29  chifukwa ŵeniwo wangudankha kuŵaziŵa, wanguŵasankhiya so limu kuti aje akuyanana ndi Mwana waki, kuti iyu waje wakwamba kuwaku pakati pa abali anandi. 30  Kweni wo wanguŵasankhiya limu ndiwu wakuŵadana so, ndipu wo wakuŵadana ndiwu wakuŵakamba so kuti mbarunji. Pakumaliya, wo wakuŵakamba kuti mbarunji ndiwu so wakuŵakankhuska. 31  Sonu tingakambanji pa vinthu venivi? Asani Chiuta we ndi isi, ndiyani yo walimbanengi nasi? 32  Pakuti wanguleka cha kutipaska Mwana waki chayiyu, kweni wangumupereka chifukwa chaku isi tosi, kumbi wangatondeka kutipaska ndi mtima wosi vinthu vinyaki vosi kusazgiyapu pa Mwana waki? 33  Kumbi ndiyani yo wajuliyengi mulandu akusankhika aku Chiuta? Chiuta ndiyu watiŵakamba kuti mbarunji. 34  Ndiyani yo waŵambengi mulandu? Khristu Yesu ndiyu wangufwa, ndipu chikulu ukongwa ntchakuti ndiyu wakuyuskika ndipuso we kujanja lamaryi laku Chiuta, kweniso ndiyu waŵeyere mumalu mwaku isi. 35  Kumbi ndiyani yo watipatuskengi ku chanju chaku Khristu? Ndi masuzgu, pamwenga maurwirwi, pamwenga kutombozgeka, pamwenga nja, pamwenga kusoŵa vakuvwala, pamwenga vakofya, pamwenga lipanga? 36  Nge mo vikulembeke kuti: “Chifukwa chaku yimwi, tibayika zuŵa losi, taja nge mbereri zo ziluta kuchibayika.” 37  Kweni vinthu vosi venivi titivithereska nadi kuporote mwaku mweniyo wakutiyanja. 38  Chifukwa ndasimikiza mtima kuti kwali ndi nyifwa kwali mbumoyu kwali mbangelu kwali ndi maboma kwali ndi vinthu vo vilipu sonu kwali ndi vinthu vo vituza kwali ndi nthazi 39  kwali mbutali wamuchanya kwali mbutali wapasi pamwenga chinthu chinyaki chechosi chakulengeka, chingatipatuska cha ku chanju chaku Chiuta cho che mwa Ambuyafwi, Khristu Yesu.

Mazu Ngam'mphata

Wonani Mazu ngo Ngakonkhoskeka.
Wonani Mazu ngo Ngakonkhoskeka.
Mazu nga Chiheberi pamwenga nga Chiaramu ngo ngang’anamuwa kuti, “Ada ŵangu!”
Pamwenga kuti, “mitamanthu yo.”