Aroma 6:1-23

  • Umoyu wufya chifukwa cha kubatizika mwaku Khristu (1-11)

  • Mungazomerezanga cha kuti ubudi uchitengi ufumu pa maliŵavu nginu (12-14)

  • Kuleka kuja kapolu wa ubudi ndi kuja kapolu waku Chiuta (15-23)

    • Malipiru nga ubudi ndi nyifwa; mphasu yaku Chiuta mbumoyu (23)

6  Sonu tingakambanji? Kumbi tilutirizgi kuchita ubudi kuti wezi ukulu usazgikiyengeku?  Awa! Sonu pakuti tafwatulika ku ubudi, tikhumbiyenji so kulutirizga kuja mu ubudi?  Pamwenga kumbi muziŵa cha kuti tosi isi tikubatizika mwaku Khristu Yesu, tikubatizika so mu nyifwa yaki?  Mwaviyo, tikuwundikiya limoza ndi iyu chifukwa tikubatizika mu nyifwa yaki, kuti nge mo Khristu wanguyuskikiya ku nyifwa kuporote mu unkhankhu wa Awisi, nasi so tiyendi mu umoyu wufya.  Asani te akukoliyana ndi iyu chifukwa titufwa nge mo iyu wangufwiya, ndikuti te akukoliyana so nayu chifukwa tiyuskika nge mo iyu wakuyuskikiya.  Chifukwa tiziŵa kuti umunthu widu wakali ukukhomeke nayu limoza pachimiti kuti maliŵavu ngidu ngakubuda ngaje ngambula nthazi, ndi chilatu chakuti tileki kulutirizga kuja akapolu a ubudi.  Chifukwa munthu yo wafwa, wafwatulika ku* ubudi waki.  Kweniso asani tafwa ndi Khristu, tigomezga kuti tazamuja so amoyu ndi iyu.  Pakuti sonu tiziŵa kuti Khristu wakuyuskika ku nyifwa ndipu wafwengi so cha, nyifwa yilivi mazaza paku iyu. 10  Chifukwa nyifwa yo wangufwa, wangufwa kamoza pe mbwenu mpaka muyaya kuti watuzgepu ubudi, kweni umoyu wo waja, wajaliya kuti wachiti khumbu laku Chiuta. 11  Namwi so jiwoneni kuti mwe akufwatulika ku ubudi, ndipu jani ndi umoyu wakuchita khumbu laku Chiuta kuporote mwaku Khristu Yesu. 12  Mwaviyo, lekani kuzomereza kuti ubudi ulutirizgi kuchita ufumu pa maliŵavu nginu ngakufwa kuti muvwiyengi makhumbiru nga maliŵavu nginu. 13  Ndipuso muleki kupereka maliŵavu nginu* nge vidya vakuchitiya vinthu vambula urunji, kweni jiperekeni kwaku Chiuta nge ŵanthu akuyuka ku nyifwa, kweniso perekani maliŵavu nginu* kwaku Chiuta nge vidya vakuchitiya urunji. 14  Pakuti mwe pasi pa dangu cha, kweni mwe pasi pa wezi ukulu, ubudi ungaŵanga ndi mazaza cha paku yimwi. 15  Sonu asani vaŵa viyo? Kumbi tichitengi ubudi chifukwa chakuti te pasi pa dangu cha kweni te pasi pa wezi ukulu? Awa! 16  Kumbi muziŵa cha kuti asani mutijipereka ku munthu weyosi nge akapolu akuvwiya, ndikuti mwe akapolu aku mweniyo muvwiya, kwali ungaŵa ubudi wo ulongozge ku nyifwa pamwenga kuvwiya ko kulongozge ku urunji? 17  Kweni wawongeki Chiuta chifukwa munguvwiya ndi mtima wosi mtundu wa chisambizu chenicho mungupaskika, chinanga kuti nyengu yinyaki mwenga akapolu a ubudi. 18  Ndipu pakuti mukufwatulika ku ubudi, mukuja akapolu a urunji. 19  Ndilongoro nge mo ŵanthu alongorore chifukwa cha kulopwa kwa maliŵavu nginu. Pakuti nge mo mwaperekiyanga viŵalu va maliŵavu nginu kuti vije akapolu a vinthu vaunyakazi ndipuso kuleka kuvwiya marangu ko kulongozge ku kuleka kuvwiya marangu, sonu perekani viŵalu va maliŵavu nginu kuti vije akapolu a urunji wo ulongozge ku kupaturika. 20  Chifukwa pa nyengu yo mwenga akapolu a ubudi, mwenga akufwatuka ku urunji. 21  Kumbi ndi vipasu wuli vo mwapasanga pa nyengu yo? Venga vinthu venivo sonu muchita navu soni. Chifukwa umaliru wa vinthu venivo ndi nyifwa. 22  Kweni sonu chifukwa mukufwatulika ku ubudi ndipu mwe akapolu aku Chiuta, mupasa vipasu mu nthowa yakupaturika ndipu umaliru waki ndi umoyu wamuyaya. 23  Pakuti malipiru nga ubudi ndi nyifwa, kweni mphasu yo Chiuta wapereka mbumoyu wamuyaya kuporote mwa Ambuyafwi Khristu Yesu.

Mazu Ngam'mphata

Pamwenga kuti, “wagowokereka.”
Mazu ngaki chayingu, “viŵalu vinu.”
Mazu ngaki chayingu, “viŵalu vinu.”