Julani

Lutani pa vo ve mukati

Aroma 5:1-21

NKHANI ZO ZE MUBUKU ILI

  • Kuyanjanisika ndi Chiuta kuporote mwaku Khristu (1-11)

  • Nyifwa kuporote mwaku Adamu, umoyu kuporote mwaku Khristu (12-21)

    • Ubudi ndi nyifwa vikusapaliya ku ŵanthu wosi (12)

    • Kuchita chinthu chimoza chaurunji (18)

5  Mwaviyo, pakuti sonu takambika kuti te arunji chifukwa cha chivwanu, tiyeni tije pa chimangu* ndi Chiuta kuporote mwa Ambuyafwi Yesu Khristu.  Pakuti kuziya mwaku iyu talonde wezi ukulu, wo tilimu chifukwa cha chivwanu, sonu tiyeni tikondwi* chifukwa cha chilindizga cha unkhankhu waku Chiuta.  Ndi venivi pe cha, kweni tiyeni tikondwengi* asani tisuzgika, chifukwa tiziŵa kuti masuzgu ngachitiska kuti tikunthiyepu,  kukunthiyapu kuchitiska kuti tije akuzomerezeka, kuja akuzomerezeka kuchitiska kuti tije ndi chilindizga,  ndipu chilindizga chiguŵiska cha chifukwa chanju chaku Chiuta chapungulikiya mumitima yidu mwakugwiriskiya ntchitu mzimu wakupaturika wo tikupaskika.  Chifukwa kukamba uneneska, po tenga teche akulopwa, Khristu wakufwiya ŵanthu ambula kopa Chiuta pa nyengu yakuŵikikiya limu.  Pakuti palivi munthu yo wangafwiya munthu murunji, kweni panyaki munthu wangachita chiganga kufwiya munthu wamampha.  Kweni Chiuta walongo chanju chaki kwaku isi mwakuti po tenga teche akubuda, Khristu wangutifwiya.  Chinthu chakukhumbika ukongwa ntchakuti tazamutaskika ku ukali kuporote mwaku iyu, pakuti takambika kuti te arunji chifukwa cha ndopa zaki. 10  Pakuti asani pa nyengu yo tenga arwani ŵaki ndipu tinguyanjanisika kwaku Chiuta chifukwa cha nyifwa ya Mwana waki, ndikuti sonu po tayanjanisika kwaku Chiuta ndipu wazakutichitiya vikulu. Tazamutaskika chifukwa cha umoyu waki. 11  Ndi venivi pe cha, kweni tikondwa so mwaku Chiuta chifukwa cha Ambuyafwi Yesu Khristu, mweniyo kuporote mwaku iyu tayanjanisika so kwaku Chiuta. 12  Ndichu chifukwa chaki nge mo ubudi ukuselere mucharu kuziya mwa munthu yumoza, ndi nyifwa chifukwa cha ubudi, ndipu nyifwa yikusapaliya ku ŵanthu wosi chifukwa wosi akubuda . . . 13  Chifukwa ubudi ndiwu ungudankha mucharu Dangu* lechendaŵeku, kweni asani palivi dangu, munthu wangayeruzgika cha kuti ngwakubuda. 14  Kweni nyifwa yawusanga nge fumu kutuliya mu nyengu yaku Adamu kuzifika mu nyengu yaku Mozesi. Yawusanga so pa ŵanthu wo anguchita ubudi nge mo Adamu wanguchitiya cha, yo walingana ndi mweniyo wazanga. 15  Kweni mphasu yilingana cha ndi ubudi, pakuti asani kuziya mu ubudi wa munthu yumoza ŵanthu anandi akufwa, ndikuti wezi ukulu waku Chiuta ndi mphasu yawezi vikusapaliya* ku ŵanthu anandi chifukwa cha wezi ukulu wa munthu yumoza, Yesu Khristu. 16  Ndipuso mphasu yawezi yeniyi, yilingana cha ndi mo vinthu vingwende munthu yumoza wati wachita ubudi. Chifukwa cha ubudi umoza, ŵanthu anguyeruzgika kuti mbakunanga, kweni mphasu yo yinguperekeka pavuli pa maubudi nganandi, yenga kukambika kuti mbarunji. 17  Asani chifukwa cha ubudi wa munthu yumoza nyifwa yinguwusa nge fumu kuporote mwaku iyu, kwe wuli ŵanthu wo azamulonde wezi ukulu ukongwa kweniso mphasu yawezi ya urunji! Yiwu azamuja ndi umoyu ndipu azamuwusa nge mafumu chifukwa cha munthu yumoza, Yesu Khristu. 18  Sonu nge mo ubudi umoza ukuchitiskiya kuti ŵanthu wosi ayeruzgiki kuti mbakunanga, ndimu so kuchita chinthu chimoza chaurunji kuchitiskiya kuti ŵanthu amitundu yosi akambiki kuti mbarunji kuti alonde umoyu. 19  Pakuti nge mo kuleka kuvwiya kwa munthu yumoza kukuchitiskiya kuti ŵanthu anandi aje akubuda, ndimu so kuvwiya kwa munthu yumoza kwazamuchitiskiya kuti ŵanthu anandi aje arunji. 20  Sonu Dangu* linguza kuti ubudi usazgikiyeku ukongwa. Kweni maubudi ngati ngaŵa nganandi, wezi ukulu ungusazgikiyaku so ukongwa. 21  Chifukwa wuli? Kuti nge mo ubudi unguwusiya nge fumu limoza ndi nyifwa, ndimu so wezi ukulu uwusiyengi nge fumu chifukwa cha urunji wo ulongozge ku umoyu wamuyaya kuporote mwaku Yesu Khristu, Ambuyafwi.

Mazu Ngam'mphata

Panyaki kuti, “te pa chimangu.”
Panyaki kuti, “sonu tikondwa.”
Panyaki kuti, “kweni tikondwa.”
Wonani Mazu ngo Ngakonkhoskeka.
Pamwenga kuti, “vikufwapukiya.”
Wonani Mazu ngo Ngakonkhoskeka.