Aroma 15:1-33

  • Londiyanani nge mo Khristu wakukulondiyani (1-13)

  • Paulo, mteŵeti wa ŵanthu amitundu yinyaki (14-21)

  • Mo Paulo wayendiyengi (22-33)

15  Kweni isi anthazi, titenere kunyamuwa masuzgu nga ŵanthu wo alivi nthazi, ndipuso tingajikondwesanga tija cha.  Weyosi waku isi wakondwesi munyaki mwakumuchitiya vamampha kuti wamuchiski.  Pakuti chinanga ndi Khristu nayu wangujikondwesa yija cha, kweni vingumuchitikiya nge mo vikulembeke kuti: “Kunyoza kwa ŵanthu wo atikunyozani kwawiya ini.”  Pakuti vinthu vo vikulembeka kali, vikulembeke kuti vitisambizi, ndi chilatu chakuti tije ndi chilindizga chifukwa cha kukunthiyapu ndipuso kupembuzgika ndi Malemba.  Chiuta yo watitiwovya kuti tikunthiyengepu kweniso yo watitipembuzga, wakupaskeni maŵanaŵanu ngakuyanana ndi ngo Khristu Yesu wenga nangu,  kuti mwakukoliyana kweniso ndi mazu ngamoza,* mukankhuski Chiuta, Wisewu wa Ambuyafwi Yesu Khristu.  Mwaviyo londiyanani nge mo Khristu nayu wakulonde yimwi, kuti unkhankhu uluti kwaku Chiuta.  Chifukwa nditikukambiyani kuti Khristu wanguja mteŵeti wa ŵanthu akudumulika pakuti Chiuta ngwakugomezgeka. Iyu wanguchita ivi kuti wasimikizi vo Chiuta wangulayizga apapi ŵawu akali,  ndipuso kuti mitundu yinyaki yikankhuski Chiuta chifukwa cha lisungu laki. Nge mo vikulembeke kuti: “Ndichu chifukwa chaki ndikuzomereningi pakweru pakati pa mitundu ya ŵanthu kweniso ndazamukumba sumu zakuthamika zina linu.” 10  Ndipu wakamba so kuti: “Kondwani mitundu yimwi limoza ndi ŵanthu ŵaki.” 11  Ndipuso kuti: “Thamikani Yehova, yimwi mitundu yosi, ndipu mitundu yosi ya ŵanthu yimuthamiki.” 12  Ndipuso Yesaya wakamba kuti: “Kwazamuja musisi waku Jese, munthu yo wazamuyuka kuti wawusi mitundu ndipu mitundu yo yazakumulindizga.” 13  Chiuta yo wapereka chilindizga, wakuzazeni ndi likondwa likulu kweniso chimangu chifukwa chakuti mutimuthemba, ndi chilatu chakuti muzaziki ndi chilindizga kuziya mu nthazi ya mzimu wakupaturika. 14  Sonu, ini ndisimikiza vakukwaskana ndi yimwi abali ŵangu kuti muchita vinthu vinandi vamampha, muziŵa vinthu vinandi ndipuso kuti mulunguchizgana.* 15  Kweni ndakulembiyani fundu zinyaki mwambula kubisa, kuti ndikukumbuseni so chifukwa cha wezi ukulu wo ndikupaskika ndi Chiuta 16  kuti ndije mteŵeti waku Khristu Yesu ku mitundu. Ndigwira ntchitu yakupaturika ya uthenga wamampha waku Chiuta, kuti mitundu yeniyi yije chakupereka chakuzomerezeka kweniso chakutoweseka ndi mzimu wakupaturika. 17  Mwaviyo, nde ndi chifukwa chakukondwe mwaku Khristu Yesu chifukwa cha vinthu vakukwaskana ndi Chiuta. 18  Pakuti ndingayese dala cha, kukamba kanthu kekosi kupatuwaku vinthu vija vo Khristu wachita kuporote mwaku ini, kuti mitundu yije yakuvwiya kuziya mu mazu ngangu ndipuso mu vakuchita vangu, 19  mu nthazi ya visimikizu ndi vakuziziswa, kweniso mu nthazi ya mzimu waku Chiuta, ndipu ivi vachitiska kuti ndipharazgi mwakukwana uthenga wamampha wakukwaskana ndi Khristu kutuliya ku Yerusalemu ndi vigaŵa vakuzunguliya mpaka kuchifika ku Iluriko. 20  Mwaviyo, ndingusimikiza kuti ndileki kupharazga uthenga wamampha muvigaŵa vo zina laku Khristu laziŵikanga kali, kuti ndileki kuzenga pafawundeshoni ya munthu munyaki. 21  Kweni ndinguchita mwakukoliyana ndi mo vikulembeke kuti: “Wo ŵechendalondiyepu chipharazgu chakukwaskana ndi iyu, azamuwona ndipu wo akuvwapu cha, azamuvwisa.” 22  Chenichi so ndichu chifukwa chaki nyengu zinandi ndatondekanga kuza kwaku yimwi. 23  Kweni sonu palivi malu ngo ndaleka kukwaskaku muvigaŵa ivi, ndipu kwa vyaka vinandi* ndaja ndichikhumbisiska kuza kwaku yimwi. 24  Mwaviyo, ndichiluta ku Sipeni ndikhumba kuti ndizikuwoneni ndipu asani ndazichezapu namwi kwa kanyengu, mwazakundiperekeza panthowa. 25  Kweni sonu nde pafupi kuluta ku Yerusalemu kuti ndikateŵete akupaturika. 26  Pakuti abali a ku Makedoniya ndi ku Akaya angukhumbisiska kupereka vinthu vawu kwa akupaturika akavu a ku Yerusalemu. 27  Angukhumbisiska nadi kuŵachitiya viyo ndipu kukamba uneneska ŵenga ndi ngongoli kwa akupaturika; chifukwa asani ŵanthu amitundu yinyaki alondiyaku vinthu vauzimu va akupaturika, ndikuti yiwu nawu akhumbika kuweza mwakuŵateŵete ndi vinthu vo ŵenavu. 28  Asani ndamaliza kuchita venivi ndipuso asani ndachiŵapaska mphasu zenizi,* ndazamupitiya kwinu ndichiluta ku Sipeni. 29  Kweniso ndiziŵa kuti po ndiziyengi kwaku yimwi, ndizengi ndi vitumbiku vosi vakutuliya kwaku Khristu. 30  Sonu nditikuŵeyeriyani abali kuporote mwaku Yesu Khristu Ambuyafwi, kweniso kuporote mu chanju cha mzimu kuti mufwiyepu kundipemphere kwaku Chiuta nge mo ndichitiya ndamweni, 31  kuti nditaskiki ku ŵanthu ambula kugomezga a ku Yudeya ndipuso kuti uteŵeti wangu wo ndichita mumalu mwa akupaturika a ku Yerusalemu, uzomerezeki kwaku yiwu, 32  kuti mwa khumbu laku Chiuta ndizizi kwaku yimwi mwalikondwa kweniso kuti tosi tizisisipuliki. 33  Chiuta yo wapereka chimangu waje namwi mosi. Ame.

Mazu Ngam'mphata

Mazu ngaki chayingu, “ndi mulomu umoza.”
Pamwenga kuti, “mutcheŵeskana.”
Panyaki kuti, “kwa vyaka vinandiku.”
Mazu ngaki chayingu, “chipasu chenichi.”