Aroma 13:1-14

  • Kujithereska ku ŵanthu amazaza (1-7)

    • Kupereka msonkhu (6, 7)

  • Chanju chifiska Dangu (8-10)

  • Tiyendengi nge ndi msana (11-14)

13  Munthu weyosi wajithereski ku ŵaraŵara amazaza, pakuti palivi wamazaza yo walipu kwambula kuzomerezeka ndi Chiuta. Amazaza wosi ŵe mumalu mwawu chifukwa akuzomerezeka ndi Chiuta.  Mwaviyo, munthu weyosi yo wasuskana ndi wamazaza, wasuska ndondomeku yaku Chiuta; ndipu wo asuskana ndi ndondomeku yeniyi, atijidaniya cheruzgu.  Akuwusa mbakofya cha ku ŵanthu wo achita vamampha, kweni mbakofya ku ŵanthu wo achita viheni. Asani ukhumba kuleka kopa akuwusa, chita cho ntchamampha, ndipu ulumbikengi chifukwa chakuchita viyo.  Pakuti yiwu mbateŵeti aku Chiuta kuti yiwi vikuyende umampha, kweni asani uchita chinthu chiheni, chita mantha. Pakuti atiliko ŵaka cha lipanga. Yiwu mbateŵeti aku Chiuta, ndipu aweze ukali ku munthu* yo wachita vinthu viheni.  Mwaviyo, pe chifukwa chakuvwika chakuti mujithereski. Ntchifukwa cha ukali pe cha, kweni ntchifukwa so cha njuŵi yinu.  Ndichu chifukwa chaki mupereka so msonkhu; pakuti yiwu mbateŵeti aku Chiuta akuteŵete ŵanthu, ndipu nyengu zosi afiska chilatu chenichi.  Perekani ku ŵanthu wosi vo akhumba: wo akhumba msonkhu, apaskeni msonkhu; wo akhumba kulipirika, alipireni; wo akhumba kuwopeka, awopeni; wo akhumba kutumbikika, atumbikeni.  Mungajanga ndi ngongoli cha ku munthu weyosi. Kweni muyanjanengi, chifukwa weyosi yo watanja munyaki, wafiska dangu.  Pakuti marangu ngakuti, “Ungachitanga chigololu cha, ungabayanga munthu cha, ungabanga cha, ungakhumbiranga mwasanji cha,” ndipuso dangu linyaki lelosi lo liliku, ngakambika mwakudumuwa kuti: “Uyanjengi munyaku nge mo utijiyanjiya wamweni.” 10  Chanju chichitiya munyaki vinthu viheni cha. Mwaviyo, chanju chifiska Dangu.* 11  Ndipu muchitengi venivi chifukwa chakuti mutiyiziŵa nyengu iyi, kuti ili ndi ora lakuti yimwi muyuki ku tulu. Pakuti sonu utaski widu we pafupi ukongwa kuluska pa nyengu yo tingwambiya kugomezga. 12  Usiku we pafupi kumala ndipu msana we pafupi. Sonu tiyeni titayi ntchitu za mdima ndipu tivwali vidya vankhondu va ukweru. 13  Tiyeni tiyendengi mwakwenere nge ndi msana, mu maphwandu ngaviwawa cha pamwenga mu uloŵevu; kugonana kwambula kwenere cha pamwenga kuchita jalidu liheni mwambula soni;* mu ndewu cha pamwenga mu sanji. 14  Kweni vwalani Ambuya Yesu Khristu, ndipu mungachitanga kunozgeke cha kuti mukachiti makhumbiru nga liŵavu.

Mazu Ngam'mphata

Pamwenga kuti, “ndipu alanga munthu.”
Wonani Mazu ngo Ngakonkhoskeka.
Mu Chigiriki, a·selʹgei·a. Wonani Mazu ngo Ngakonkhoskeka.