Aroma 1:1-32

  • Moni (1-7)

  • Paulo wakhumba kuluta ku Roma (8-15)

  • Murunji wazamuja ndi umoyu chifukwa cha chivwanu (16, 17)

  • Ŵanthu ambula kopa Chiuta alivi pakugwenthe (18-32)

    • Chilengedu chilongo mijalidu yaku Chiuta (20)

1  Ini Paulo, kapolu waku Khristu Yesu, ndikudanika kuti ndije wakutumika ndipuso ndikusankhika kuti ndipharazgi uthenga wamampha waku Chiuta,  weniwo ukukambikiya limu kuporote mwa achimi ŵaki mu Malemba ngakupaturika.  Uthenga wenuwu, ngwakukwaskana ndi Mwana waki, yo wati waja munthu wanguzija mphapu* yaku Davidi.  Mwa nthazi yaku Chiuta, iyu wangumemezeka kuti ndi Mwana waku Chiuta mwakukoliyana ndi mzimu wakupaturika chifukwa wakuyuskika ku nyifwa. Mwenuyu ndi Yesu Khristu Ambuyafwi.  Kuporote mwaku iyu tikulonde wezi ukulu kweniso tikusankhika kuja akutumika, kuti ŵanthu amitundu yinyaki aje ndi chivwanu ndipuso amuvwiyi mwakutumbika zina laki.  Ndipu kutuliya mu mitundu yeniyi, namwi mukudanika kuti muje aku Yesu Khristu.  Akwanjiwa aku Chiuta mosi yimwi muja ku Roma, yimwi mukudanika kuti muje akupaturika nditikulembiyani kuti: Wezi ukulu kweniso chimangu vakutuliya kwaku Chiuta, Awusefwi ndipuso Ambuya Yesu Khristu, viŵi namwi.  Chakwamba, ndiwonga Chiuta wangu kuporote mwaku Yesu Khristu, chifukwa chaku yimwi mosi, pakuti chivwanu chinu chikambika pacharu chosi.  Pakuti Chiuta mweniyo nditimuchitiya uteŵeti wakupaturika ndi umoyu wangu wosi chifukwa cha uthenga wamampha wakukwaskana ndi Mwana waki, ndi kaboni wangu kuti nyengu zosi ndileka cha kukuzumbuwani mu mapempheru ngangu. 10  Nditimupempha kuti asani vingachitika, ulendu wunu pe ndifiski kuza kwaku yimwi asani Chiuta wakhumba. 11  Pakuti ndikhumbisiska kukuwonani, kuti ndizikupaskeni mphasu yakutuliya kwaku Chiuta ndi chilatu chakuti muje akukho. 12  Pamwenga kuti tizichiskani mu chivwanu, chinu ndi changu. 13  Kweni ndikhumba cha abali kuti muje ambula kuziŵa kuti kanandi ŵaka, ndakhumbanga kuza kwaku yimwi, kweni vilipu vo vitinditondekesa mpaka sonu. Ndikhumba kuti ndizisaniyi vipasu pakati pinu nge mo ndachitiya pakati pa ŵanthu amitundu yinyaki yosi. 14  Ini nde ndi ngongoli kwa Agiriki ndi alendu,* kweniso kwa azeru ndi azereza. 15  Sonu ndikhumbisiska kuti namwi ndizikupharazgiyeni uthenga wamampha kweniko ku Roma. 16  Pakuti ndichita nawu soni cha uthenga wamampha, chifukwa uthenga wenuwu ndi nthazi yaku Chiuta yakutaskiya munthu weyosi yo we ndi chivwanu, pakwamba Myuda pavuli paki Mgiriki. 17  Pakuti wo ŵe ndi chivwanu atuŵa nachu chifukwa cha uthenga wamampha wo uvumbuwa urunji waku Chiuta ndipu chivwanu chawu chija chakukho nge mo vikulembeke kuti: “Kweni munthu murunji wazamuja wamoyu chifukwa cha chivwanu.” 18  Pakuti ukali waku Chiuta uvumbulika kutuliya kuchanya pa ŵanthu ambula kopa Chiuta kweniso ambula urunji ŵeniwo akandirizga uneneska mu nthowa yambula urunji. 19  Chifukwa vo yiwu akhumbika kuziŵa vakukwaskana ndi Chiuta, viziŵika umampha pakati pawu, pakuti Chiuta wakuvivumbuwa umamphaumampha kwaku yiwu. 20  Chifukwa mijalidu yaki yambula kuwoneka, kung’anamuwa nthazi zaki zambula kumala ndipuso udindu waki wakuti ndi Chiuta, yiwoneka umampha kutuliya po charu chikulengeke kuluta munthazi, pakuti yiwoneke mu vinthu vo iyu wakulenga. Ve viyo kuti asoŵi pakugwenthe. 21  Chinanga kuti amuziŵanga Chiuta, angumuthamika cha nge Chiuta pamwenga kumuwonga, kweni angwamba kuŵanaŵana mwambula zeru ndipuso mitima yawu yakupusa yinguchita mdima. 22  Chinanga kuti ajikambanga kuti mbazeru, kweni ŵenga azereza 23  ndipu unkhankhu waku Chiuta yo wangavunda cha, awusambusa chikozgu cha munthu, cha viyuni, cha nyama za malundi nganayi ndipuso cha vakukwaŵa, venivo vosi vingavunda. 24  Mwaviyo, mwakukoliyana ndi makhumbiru ngaheni nga mitima yawu, Chiuta wakuŵaleka kuti achitengi vinthu vaukazuzi, kuti alengesi maliŵavu ngawu. 25  Mumalu mwakugomezga uneneska waku Chiuta yiwu agomezga boza, ndipu asopa vinthu vakulengeka kweniso ativichitiya uteŵeti wakupaturika mumalu mwa Mlengi yo wathamikika kwamuyaya. Ame. 26  Ndichu chifukwa chaki Chiuta wakuŵaleka kuti aje ndi khumbiru lakugonana kwambula kujiko, pakuti anthukazi pakati pawu asintha mo atenere kugwiriskiya ntchitu maliŵavu ngawu ndipu atingagwiriskiya ntchitu mu nthowa yachilendu. 27  Anthulumi nawu akuleka kugonana ndi anthukazi nge mo vikulengeke, ndipu amaliska khumbiru lawu lanthazi lakugonana, mwakugonana ndi anthulumi anyawu. Yiwu achita vinthu vamsiku ndipu alonde cheruzgu chawu chosi chifukwa cha kunanga kwawu. 28  Nge mo yiwu akuwone kuti kuziŵa Chiuta nkhwambula kwenere, Chiuta nayu wakuŵapereka ku maŵanaŵanu ngaheni ngo iyu watingazomereza cha, kuti achitengi vinthu vambula kwenere. 29  Ndipu yiwu mbakuzazika ndi vinthu vosi vambula urunji, uheni, mbunu,* ndipuso ubudi. Mbakuzazika ndi sanji, kubaya ŵanthu, mphindanu, chinyengu, mtima uheni, mbamitokutoku,* 30  akunena anyawu kwambula ŵeneku kuziŵa, akutinkha Chiuta, aganyavu, akujikuzga, akunyada, akunozge anyawu viŵembu, ambula kuvwiya apapi, 31  ambula kuvwisa vinthu, ambula kufiska phanganu, ambula chanju chakuwa nachu kweniso ambula lisungu. 32  Chinanga kuti yiwu atiliziŵa umampha dangu la urunji laku Chiuta kuti ŵanthu akuchita venivi atenere kubayika, kweni yiwu ŵeneku alutirizga kuchita venivi, ndipuso azomereza wo ativichita.

Mazu Ngam'mphata

Mazu ngaki chayingu, “mbewu.”
Pamwenga kuti, “ndi wo Mbagiriki cha.”
Pamwenga kuti, “kukhumbira mwasanji.”
Pamwenga kuti, “kukamba vinthu viheni va ŵanthu anyaki.”