Akolose 1:1-29

  • Moni (1, 2)

  • Kuwonga chivwanu cha Akolose (3-8)

  • Kupemphere kukuwa kwauzimu (9-12)

  • Udindu ukulu waku Khristu (13-23)

  • Paulo wagwira ntchitu mwaphamphu chifukwa cha mpingu (24-29)

1  Ini Paulo, wakutumika waku Khristu Yesu chifukwa cha khumbu laku Chiuta, nde limoza ndi mubali widu Timote,  ndilembe akupaturika ndipuso abali akugomezgeka, akukoliyana ndi Khristu wo ŵe ku Kolose kuti: Wezi ukulu kweniso chimangu vakutuliya kwaku Chiuta Awusefwi, viŵi namwi.  Nyengu zosi tiwonga Chiuta Awisewu ŵa Ambuyafwi Yesu Khristu, asani titikupempheriyani,  pakuti tikuvwa vakukwaskana ndi chivwanu chinu mwaku Khristu Yesu kweniso chanju cho mulongo akupaturika wosi,  chifukwa cha chilindizga cho chasungikiya yimwi kuchanya. Kuvuli uku mukuvwapu vakukwaskana ndi chilindizga chenichi kuporote mu mazu ngauneneska nga uthenga wamampha  wo ukuza kwaku yimwi. Nge mo uthenga wamampha upasiya vipasu ndipuso ukuliya mucharu chosi, ndimu so uchitiya kwaku yimwi kutuliya pa zuŵa lo mukuvwiya ndi kuziŵa mwauneneska wezi ukulu chayiwu waku Chiuta.  Venivi ndivu mwasambira kwaku Epafura, kapolu munyidu wakwanjiwa, yo ndi mteŵeti wakugomezgeka waku Khristu mumalu mwaku isi.  Iyu wangutiziŵisa so vakukwaskana ndi chanju cho mzimu waku Chiuta wakuwovyani kuti muŵi nachu.*  Ndichu chifukwa chaki so, kutuliya pa zuŵa lo tikuvwiya venivi, tilekapu cha kukupempheriyani kweniso kupempha kuti muziŵi mwauneneska vinthu vakukwaskana ndi khumbu laki, muje ndi zeru zosi, ndipuso kuti muvwisengi vinthu vauzimu, 10  ndi chilatu chakuti muyendengi nge mo Yehova wakhumbiya, kuti mumukondwesengi ukongwa muchilutirizga kupasa vipasu mu ntchitu yeyosi yamampha ndipuso musazgiyengeku kuziŵa Chiuta mwauneneska; 11  ndipuso mupaskiki nthazi zinandi mwakukoliyana ndi nthazi zaki zaunkhankhu, kuti mukunthiyengepu ukongwa mwakuzizipizga ndipuso mwalikondwa, 12  muchiwonga Ada wo akuchitiska kuti namwi muje akwenere kulondiyaku chihara cha akupaturika wo ŵe mu ukweru. 13  Iyu wakutitaska ku mazaza nga mdima, ndi kutisamisiya mu ufumu wa Mwana waki wakwanjiwa, 14  kuporote mwaku iyu, tikufwatulika ndi sembi yakuwombole kuti maubudi ngidu ngagowokereki. 15  Iyu ntchikozgu chaku Chiuta wambula kuwoneka, wakwamba kuwaku pa chilengedu chosi; 16  chifukwa kuporote mwaku iyu, vinthu vinyaki vosi vikulengeka kuchanya ndi pacharu chapasi, vinthu vakuwoneka ndi vinthu vambula kuwoneka, kwali ndi mipandu ya ufumu, pamwenga ambuya, pamwenga maboma pamwenga mazaza. Vinthu vinyaki vosi vikulengeka kuporote mwaku iyu ndipuso chifukwa chaku iyu. 17  Kweniso, iyu wakuŵaku vinthu vinyaki vosi vechendaŵeku, ndipuso vinthu vinyaki vosi vikuŵaku kuporote mwaku iyu, 18  ndipu iyu ndi mutu wa liŵavu, lo ndi mpingu. Iyu ngwakwamba pa vinthu vosi, ndi mwana wakwamba kuwaku kutuliya ku nyifwa, kuti waje wakwamba pa vinthu vosi; 19  pakuti Chiuta wanguwona kuti veumampha kuti vinthu vosi vizazi mwaku iyu, 20  ndipuso kuti kuporote mwaku iyu, vinthu vinyaki vosi viyanjanisiki kwaku iyu mwakujalikiska chimangu kuporote mu ndopa zo wangudira pachimiti chakutombozgekiyapu,* kwali ndi vinthu vapacharu chapasi pamwenga vakuchanya. 21  Ndipu yimwi, kali mwenga kutali kweniso mwenga arwani chifukwa maŵanaŵanu nginu ngenga pa ntchitu ziheni, 22  sonu mwayanjana nayu mwakugwiriskiya ntchitu liŵavu laumunthu la munthu mwenuyu kuporote mu nyifwa yaki, kuti wakuperekeni mwe akupaturika, ambula kalema, ndipuso ambula mulandu pa masu paki . . . 23  Kweni mulutirizgi kuja mu chivwanu, mujalikiskiki pafawundeshoni ndipuso muje akukho, ambula kunderezeka pa chilindizga cha uthenga wamampha cho mukuvwa kweniso cho chingupharazgika ku chakulengeka chechosi pacharu chapasi. Ndipu ini Paulo ndaja mteŵeti wa uthenga wamampha wenuwu. 24  Sonu ndikondwa ukongwa ndi masuzgu ngo ndikumana nangu chifukwa chaku yimwi. Ndiwona kuti masuzgu ngo ndikumana nangu nge chiŵalu cha liŵavu laku Khristu ngalutiriyi mbwenu. Kusuzgika kwenuku kuwovyengi liŵavu laku Khristu, lo ndi mpingu. 25  Ndikuja mteŵeti wa mpingu wenuwu mwakukoliyana ndi uteŵeti wakuwonere nyumba wakutuliya kwaku Chiuta, wo ndikupaskika mumalu mwaku yimwi kuti ndipharazgi mazu ngaku Chiuta mwakukwana, 26  chisisi chakupaturika cho chingubisika kwambiya ku migonezi yakali* ndipuso ku ŵanthu wo angujaku kali. Kweni sonu chavumbulika kwa akupaturika ŵaki. 27  Ndipuso Chiuta ngwakukhumba kuziŵisa akupaturika chuma cha unkhankhu cha chisisi chenichi, cho wachiziŵikisa so pakati pa ŵanthu amitundu yinyaki. Chisisi ichi ndi Khristu mwakukoliyana ndi yimwi, yo ntchilindizga cha unkhankhu waki. 28  Iyu ndiyu tipharazga, titcheŵeska weyosi ndipuso tisambiza weyosi mwa zeru zosi, ndi chilatu chakuti tipereki munthu weyosi we wakukwana mwakukoliyana ndi Khristu. 29  Mwaviyo, nditesesa kugwira ntchitu mwaphamphu, nditijipereka mwakugwiriskiya ntchitu nthazi zaki zo zigwira ntchitu mwaku ini.

Mazu Ngam'mphata

Mazu ngaki chayingu, “vakukwaskana ndi chanju chinu mu mzimu.”
Wonani Mazu ngo Ngakonkhoskeka.
Pamwenga kuti, “mu nyengu zakali.” Wonani Mazu ngo Ngakonkhoskeka.