Aheberi 7:1-28

  • Melekizedeki, fumu ndipuso wasembi wapade (1-10)

  • Khristu ndiyu wasembi mura ukongwa (11-28)

    • Khristu wangafiska kutaskiya limu (25)

7  Pakuti Melekizedeki mwenuyu, fumu ya ku Salemu, wasembi waku Chiuta Wapachanya Limu, wangukumana ndi Abrahamu yo watuwanga kuchibaya mafumu ndipu wangumutumbika,  ndipu Abrahamu wangumupaska* chatchumi cha vinthu vevosi. Chakwamba, zina laki lifwatulikiya kuti “Fumu ya Urunji,” ndipu pavuli paki yidanika so kuti fumu ya ku Salemu, kung’anamuwa kuti, “Fumu ya Chimangu.”  Pakuŵa wambula awisi, wambula anyina, wambula mkoka, wambula chiyambi cha mazuŵa pamwenga umaliru wa umoyu, kweni pakuŵa wakupangika nge Mwana waku Chiuta, walutirizga kuŵa wasembi mpaka muyaya.  Wonani kuti munthu uyu wenga mura ukongwa, mweniyo Abrahamu, mutu wa banja wangumupaska chatchumi cha vinthu vevosi vamampha vo wangulonda ku nkhondu.*  Kukamba uneneska, mwakukoliyana ndi dangu, ŵana aku Levi wo alonde udindu wawu nge asembi ŵenga ndi dangu lakuti alondiyengi chatchumi kutuliya ku ŵanthu, kung’anamuwa kuti kutuliya kwa abali ŵawu, chinanga kuti yiwu ndi mphapu yaku* Abrahamu.  Kweni munthu uyu yo mkoka waki watuliyanga kwaku yiwu cha, wanguto chatchumi kutuliya kwaku Abrahamu ndipu wangutumbika yo wangulonde malayizgu.  Sonu palivi yo wangasuska kuti mumana ndiyu watumbikika ndi munthu mura.  Pa chakuchitika chinyaki, ŵanthu wo angafwa ndiwu alonde chatchumi, kweni pa chakuchitika chinyaki, munthu munyaki yo waperekeke ukaboni kuti ngwamoyu ndiyu walonde chatchumi.  Ndipu tingakamba kuti chinanga ndi Levi yo walonde chatchumi, nayu wapereka chatchumi kuporote mwaku Abrahamu, 10  pakuti iyu wenga weche mphapu yakunthazi ya* mpapi waki wakali pa nyengu yo Melekizedeki wangukumana ndi Abrahamu. 11  Asani munthu wangaja wakufikapu kuporote mu usembi wa Alevi (pakuti ntchigaŵa cha Dangu* lo linguperekeka ku ŵanthu), kumbi patingi pakhumbikengi so kuti paje wasembi munyaki yo wakambika kuti waŵengepu nge mo vinguŵiya ndi Aroni cha, kweni nge mo vinguŵiya ndi Melekizedeki? 12  Pakuti udindu wakuja wasembi usinthika, ndikuti Dangu* nalu litenere kusinthika. 13  Pakuti munthu yo wakambikiya vinthu venivi watuliya mu fuku linyaki, ndipu palivi munthu wakutuliya mu fuku lenili yo wakuteŵetiyapu pamalu ngakuperekiyapu sembi.* 14  Vakuwoneke limu kuti Ambuyafwi akutuliya mu fuku laku Yuda, kweni Mozesi wangukambapu kanthu cha vakukwaskana ndi asembi akutuliya mu fuku lenili. 15  Ndipu venivi vawoneka umampha ukongwa kwaku isi pakuti wasembi munyaki wange Melekizedeki wasankhika. 16  Iyu wateŵete nge wasembi chifukwa chakuzomerezeka ndi Dangu* lakutuliya ku munthu cha, kweni ndi nthazi yo yitimupaska umoyu wo unganangika cha. 17  Pakuti lemba linyaki lipereka ukaboni wakukwaskana ndi iyu kuti: “Ndiwi wasembi kwamuyaya nge mo vinguŵiya ndi Melekizedeki.” 18  Mwaviyo, dangu lakali liŵikika pamphepeti chifukwa chakuti lilivi nthazi kweniso ndakovya cha. 19  Pakuti Dangu* lichitiska chinthu chechosi cha kuja chakufikapu, kweni kwamba kwa chilindizga chamampha ndiku, ndipu kuporote mu chilindizga chenichi tindere kufupi ndi Chiuta. 20  Ndipuso venivi vinguchitika cha kwambula kulapizga 21  (pakuti pe ŵanthu anyaki wo akuja asembi kwambula kuti munyaki waŵalapizgiya, kweni uyu waja wasembi mwakuchita kumulapizgiya vakukwaskana ndi iyu. Ndipu Yo walapizga wangukamba kuti: “Yehova walapizga ndipu wasinthengi cha maŵanaŵanu ngaki, ‘Yiwi ndiwi wasembi kwamuyaya’”), 22  mwaviyo, Yesu waja chisimikizu* cha phanganu lamampha. 23  Kweniso anandi wo ajanga pa udindu wa usembi aserenga mumalu mwa ŵanthu anyaki chifukwa nyifwa yaŵatondekesanga kulutirizga kuja asembi. 24  Kweni pakuti iyu walutirizgengi kuja ndi umoyu mpaka muyaya, palivi munthu yo wangasere pa udindu waki nge wasembi mumalu mwaki. 25  Sonu iyu wangafiska so kutaskiya limu wosi wo atuza kwaku Chiuta kuporote mwaku iyu chifukwa ngwamoyu nyengu zosi kuti waŵeyere mumalu mwawu. 26  Pakuti mphakwenere kwaku isi kuja ndi wasembi mura yo ngwakugomezgeka, wambula kafukwa, wambula kufipiskika, wakupambana ndi akubuda, ndipuso wakukwezeka kuchanya. 27  Mwakupambana ndi asembi ŵara wo, iyu wakhumbika cha kupereka sembi zuŵa lelosi, chakwamba ya maubudi ngaki ndipu pavuli paki ya maubudi nga ŵanthu anyaki wosi, chifukwa wakuchita venivi kamoza pe mbwenu mpaka muyaya wati wajipereka mweneku. 28  Pakuti Dangu* lisankha ŵanthu akulopwa kuti aje asembi ŵara, kweni mazu ngakulapizgika pavuli pa Dangu,* ngasankha mwana, yo wapangika kuja wakufikapu mpaka muyaya.

Mazu Ngam'mphata

Mazu ngaki chayingu, “wangumugaŵiya.”
Pamwenga kuti, “vo wanguskoŵa.”
Mazu ngaki chayingu, “yiwu mbakutuliya muchiwunu chaku.”
Mazu ngaki chayingu, “wenga muchiwunu mwa.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Pamwenga kuti, “pajotcheru.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Pamwenga kuti, “waja nge chikoli.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.