Julani

Lutani pa vo ve mukati

Aheberi 4:1-16

NKHANI ZO ZE MUBUKU ILI

  • Ngozi ya kutondeka kusere mu chipumulu chaku Chiuta (1-10)

  • Achiskika kuti asere mu chipumulu chaku Chiuta (11-13)

    • Mazu ngaku Chiuta ngamoyu (12)

  • Yesu, wasembi mura ukongwa (14-16)

4  Mwaviyo pakuti layizgu lakusere mu chipumulu chaki lecheŵaka, tiyeni tiphwere* kope kuti munyaki pakati pinu wangaŵa wambula kwenere kuseremu.  Pakuti uthenga wamampha ukupharazgika so kwaku isi, nge mo venge kwaku yiwu, kweni yiwu anguyanduwa cha ndi mazu ngo anguvwa, chifukwa angukoliyana cha mu chivwanu ndi wo anguvwa mazu ngo.  Pakuti isi talongo chivwanu tisere mu chipumulu chenichi, nge mo wakukambiya kuti: “Ndati ndakwiya ndingulapizga kuti, ‘Yiwu azamusere cha mu chipumulu changu,’” chinanga kuti ntchitu zaki zikumala kwambiya pa kujalikiskika kwa charu.  Pakuti pamalu panyaki wakukambapu vakukwaskana ndi zuŵa la 7 kuti: “Ndipu Chiuta wangupumuwa ku ntchitu zaki zosi pa zuŵa la 7,”  Sonu yapa wakamba so kuti: “Yiwu azamusere cha mu chipumulu changu.”  Sonu pakuti anyaki aserengemu mbwenu, ndipu ŵeniwo angudankha kupharazgikiya uthenga wamampha angutondeka kuseremu chifukwa chakuleka kuvwiya,  pati pajumpha nyengu, wangusankha so zuŵa mwakukambiya limu mu sumu yaku Davidi kuti, “Msanawale”; nge mo vakambikiyapu kali kuti, “Msanawale asani mwavwa mazu ngaki, munganonopesanga mitima yinu cha.”  Pakuti asani Yoswa wanguŵalongozge mumalu ngachipumulu, Chiuta watingi wakambengi so cha pavuli paki va zuŵa linyaki.  Mwaviyo sabata lakupumuliya lecheŵaka ku ŵanthu aku Chiuta. 10  Pakuti munthu yo wasere mu chipumulu chaku Chiuta wapumuwa so ku ntchitu zaki nge mo Chiuta wakupumuliya ku ntchitu zaki. 11  Tiyeni tiyesesi kuti tisere mu chipumulu chenichi, ndi chilatu chakuti paŵevi wakutole jalidu la kuleka kuvwiya. 12  Pakuti mazu ngaku Chiuta ngamoyu ndipuso nganthazi, ngakuthwa kuluska lipanga lelosi la wuyi kosikosi, ndipu ngahoma mpaka kupatuwa umoyu ndi mzimu,* kweniso kupatuwa mafundu ku nyama ya mukati muviwanga, ndipuso ngafiska kuvumbuwa maŵanaŵanu ndi makhumbu nga mtima. 13  Ndipu palivi chakulengeka cho chibisika pa masu paki, kweni vinthu vosi ve nkhuli ndipuso ve pakweru pa masu paku yo tazakumumuka. 14  Mwaviyo, pakuti te ndi wasembi mura ukongwa yo wakuluta kuchanya, Yesu Mwana waku Chiuta, tiyeni tilutirizgi kupharazga pakweru vakukwaskana ndi iyu. 15  Pakuti wasembi mura yo te nayu wangaleka cha kutivwiya lisungu pa maubudi ngidu, kweni iyu wayeseka mu vinthu vosi nge isi, kweni wasanirika kuti walivi ubudi. 16  Mwaviyo tiyeni tifiki kumpandu waufumu wa wezi ukulu ndi wanangwa wakulongoro, kuti tilonde lisungu ndi kusaniya wezi ukulu kuti vitiwovyi pa nyengu yakwenere.

Mazu Ngam'mphata

Mazu ngaki chayingu, “tije ndi mantha.”
Wonani Mazu ngo Ngakonkhoskeka.