Aheberi 13:1-25

  • Mazu ngakumaliya ngakuchiska kweniso moni (1-25)

    • Mungaluwanga cha kulonde alendu (2)

    • Nthengwa yiŵi yakutumbikika (4)

    • Kuvwiya ŵanthu wo alongozga (7, 17)

    • Kupereka sembi yakulumba (15, 16)

13  Lutirizgani kwanja abali.  Mungaluwanga cha kulonde alendu,* pakuti mwakuchita viyo, anyaki angulonde angelu mwambula kuziŵa.  Lutirizgani kukumbuka ŵanthu wo ŵe mujeri* nge kuti namwi mukumangikiya nawu limoza. Mukumbukengi so wo atombozgeka, pakuti yimwi namwi mweche mu liŵavu.*  Nthengwa yiŵi yakutumbikika ku ŵanthu wosi, ndipuso pakugona ŵanthu akutorana paŵi pambula kufipiskika, pakuti Chiuta wazamuyeruzga ŵanthu akuchita malusu ngaheni ngakugonana* kweniso achigololu.  Umoyu winu uje wambula kwanja ndalama, kweni mukhorwengi ndi vo mwenavu pasonu panu. Pakuti iyu wangukamba kuti: “Ndazakukusiyani cha ndipuso ndazakukujowoni cha.”  Kuti tije ndi chiganga ndi kukamba kuti: “Yehova ndiyu watindiwovya, ndichitengi mantha cha. Kumbi munthu wangandichitanji?”  Kumbukani wo alongozga pakati pinu, ŵeniwo atikukambiyani mazu ngaku Chiuta, ndipu muchilereseska vipasu va jalidu lawu, yezgani chivwanu chawu.  Yesu Khristu wasintha cha, zana, msanawale ndipuso muyaya.  Lekani kulandizgika ndi visambizu vakupambanapambana kweniso vachilendu. Pakuti nkhanthu kuti mtima ukhwimisiki ndi wezi ukulu kuluska kuti ukhwimisiki ndi vakurya* vo vitiŵawovyapu cha wo atangwanika navu. 10  Te ndi malu ngakuperekiyapu sembi, ngo* ŵanthu wo achita uteŵeti wakupaturika pachihema alivi mazaza ngakurya va pamalu ngakuperekiyapu sembi ngenanga.* 11  Pakuti maliŵavu nga nyama zo wasembi mura watole ndopa zaki kumalu ngakupaturika nge sembi ya ubudi, ngawotcheke kubwalu kwa msasa. 12  Mwaviyo, Yesu nayu wangusuzgikiya kubwalu kwa geti la tawuni kuti watowesi ŵanthu ndi ndopa zaki. 13  Sonu nasi tiyeni tiluti kwaku iyu kubwalu kwa msasa tichinyozeka nge mo iyu wangunyozeke, 14  pakuti kunu tilivi tawuni yo yijengeku mpaka muyaya, kweni tikhumbisiska tawuni yo yituza. 15  Kuporote mwaku iyu, tiyeni nyengu zosi tiperekengi sembi yakulumba kwaku Chiuta, yo ntchipasu cha milomu yidu yo yizomereza zina laki pakweru. 16  Ndipuso mungaluwanga cha kuchita vamampha ndi kugaŵana ndi anyinu vinthu vo mwenavu, pakuti Chiuta wakondwa ukongwa ndi sembi zaviyo. 17  Muvwiyengi ŵanthu wo alongozga pakati pinu ndipuso mujithereskengi kwaku yiwu, pakuti yiwu awonere maumoyu nginu nge ŵanthu wo azamumuka mulandu. Muchitengi venivi kuti agwiri ntchitu yawu mwalikondwa kweniso mwambula kudandawula, chifukwa asani mungachita viyo, mupwetekekengi. 18  Lutirizgani kutipemphere, pakuti tigomezga kuti te ndi njuŵi yauneneska,* chifukwa tikhumba kuchita vinthu vosi mwauneneska. 19  Kweni nditikupemphani kuti mupempherengi ndi chilatu chakuti ndiwere so kwaku yimwi pambula kuswera. 20  Sonu Chiuta wachimangu yo wakuyuska Ambuya Yesu, mliska mura wa mbereri, wo wenga ndi ndopa za phanganu lamuyaya, 21  wakupaskeni chinthu chechosi chamampha kuti muje akunozgeka kuchita khumbu laki, kweniso kuporote mwaku Yesu Khristu wachiti kwaku isi cho ntchakukondwesa pa masu paki. Kwaku iyu kuŵi unkhankhu muyaya mpaka muyaya. Ame. 22  Sonu nditikupemphani abali kuti muvwisiyi mwakuphwere mazu ngakuchiska yanga, chifukwa ndakulembiyani kalata yifupi. 23  Ndikhumba kukuziŵisani kuti mubali widu Timote wafwatulika. Asani waza liŵi, po ndiziyengi ko kuzikuwonani, ndizengi nayu. 24  Mundipereke moni kwaku wosi wo atikulongozgani kweniso kwa akupaturika wosi. Wo ŵe ku Itale atikutawuzgani. 25  Wezi ukulu uŵi namwi mosi.

Mazu Ngam'mphata

Pamwenga kuti, “kuchitiya lisungu ŵanthu ambula kuŵaziŵa.”
Mazu ngaki chayingu, “ŵanthu akumangika.”
Panyaki kuti, “nge kuti namwi musuzgikiya nawu limoza.”
Wonani Mazu ngo Ngakonkhoskeka.
Kung’anamuwa marangu ngakukwaskana ndi vakurya.
Pamwenga kuti, “Te ndi jotcheru, lo.”
Pamwenga kuti, “pajotcheru.”
Mazu ngaki chayingu, “yamampha.”