Aheberi 12:1-29

  • Yesu Wakufiska chivwanu chidu (1-3)

    • Mtambu ukulu wa akaboni (1)

  • Kuyuyuwa cha chilangu chaku Yehova (4-11)

  • Nyoloskani nthowa za maphazi nginu (12-17)

  • Kufika ku Yerusalemu wakuchanya (18-29)

12  Mwaviyo pakuti te ndi mtambu ukulu wenuwu wa akaboni wo watizunguliya, tiyeni so tizuwi chizitu chechosi kweniso ubudi wo utitiwonja mwambula kusuzga, ndipu tiyeni titchimbiyi mwakukunthiyapu maphara ngo ngaŵikika panthazi pidu.  Tichiti venivi tichilereseska Mulongozgi Mura ndipuso Wakufiska chivwanu chidu, Yesu. Chifukwa cha likondwa lo linguŵikika panthazi paki, iyu wangukunthiyapu chimiti chakutombozgekiyapu,* wangutoliyaku kanthu cha vinthu vakuchitiska soni, ndipu waja kujanja lamaryi la mpandu waku Chiuta waufumu.  Ndipuso tiŵanaŵaniyengi mwakuphwere munthu yo wangukunthiyapu kunyoza kwa ŵanthu akubuda kwenuku, ko anguyanduwa naku cha, kuti muleki kuvuka kweniso kuwere vuli.  Muchilimbana ndi ubudi wenuwu, mwalimbana nawu mpaka kufika pakufwa cha.  Ndipu mwaluwiya limu kuŵeyere ko kutikuchitiskani kuti mudaniki nge ŵana kuti: “Mwana wangu, ungayuyuwanga cha chilangu chaku Yehova pamwenga kuwere vuli asani iyu watikuchenya.  Pakuti Yehova walanga wo watiŵayanja, ndipu kukamba uneneska, wakwechuwa weyosi yo watimulondere nge mwana waki.”  Mukhumbika kukunthiyapu nge chilangu chinu.* Chiuta wachita namwi vinthu nge ŵana ŵaki. Pakuti ndi mwana nuyu yo wakulangikapu cha ndi awisi?  Kweni asani mosi mukulondiyaku cha chilangu chenichi, ndikuti mwe ŵana ŵaki cha, kweni mwe ŵana apadondu.  Kweniso awusefwi akuliŵavu ayanjanga kutilanga ndipu taŵapaskanga ulemu. Kumbi titenere cha kujithereska ndi mtima wosi kwa Ada a umoyu widu wauzimu kuti tije ndi umoyu? 10  Pakuti yiwu atilanganga kwa kanyengu kamanavi mwakukoliyana ndi vo awonanga kuti vamampha, kweni Chiuta watitilanga kuti tiyanduwi ndi chilatu chakuti tije atuŵa nge mo iyu waliri. 11  Kukamba uneneska palivi chilangu cho chija chakukondwesa pa nyengu yo chiperekeka kweni chija chakuŵaŵa. Kweni pavuli paki chibala chipasu cha chimangu cho mburunji, ku ŵanthu wo asambirapu kanthu. 12  Mwaviyo, chinthisani manja ngakulombotoka ndipuso makongonu ngakundenguka, 13  ndipu lutirizgani kunyoloska nthowa za maphazi nginu, kuti cho chapinthuka chileki kutuwamu mumalunga, kweni mumalu mwaki chichizgiki. 14  Yesesani kuja mwachimangu ndi ŵanthu wosi ndipuso jani akutowa, ndipu kwambula kutowa kwenuku munthu wazakuŵawona cha Ambuya. 15  Muwonesesi kuti paŵevi munthu wakutondeka kulonde wezi ukulu waku Chiuta, ndi chilatu chakuti paleki kume msisi wapoyizoni, wo ungachitiska masuzgu ndipuso wo ungafipiska ŵanthu anandi. 16  Ndipuso muwonesesi kuti paŵevi wakuchita malusu ngaheni ngakugonana* pamwenga weyosi yo waleka kuwonga vinthu vakupaturika, nge Esawu, yo wangupereka wanangwa waki wakuja mwana wakwamba kuwaku mwakusinthana ndi chakurya chakuryapu kamoza pe. 17  Pakuti yimwi muziŵa kuti pavuli paki wachikhumba kuhara vitumbiku, wangukanizika chinanga kuti wangwesesa ndi mtima wosi kweniso ndi masozi kuti awisi asinthi maŵanaŵanu, kweni palivi cho chinguchitika.* 18  Pakuti mwafika cha ku chinthu chakuti chingakwaskika, chakuti chakole motu, cho che ndi mtambu ufipa, mdima wakuti bii, chimphepu, 19  kweniso ko kuliya mbata ndipuso ko kuvwika mazu ngakulongoro, ngo ŵanthu ŵati angavwa angupempha kuti ngangakambikanga so cha kwaku yiwu. 20  Pakuti angutondeka kukunthiyapu dangu lakuti: “Asani chinyama chakwaska phiri, chitenere kuponyeka mya.” 21  Ndipuso vo vinguwoneka venga vakofya ukongwa mwakuti Mozesi wangukamba kuti: “Nditopa ndipuso ndimbwambwanthiya.” 22  Kweni yimwi mwafika ku Phiri la Ziyoni ndipuso tawuni yaku Chiuta wamoyu, Yerusalemu wakuchanya, ko kwe masawuzandi nganandi nga angelu 23  mu unganu ukulu, ndipuso mpingu wa mwana waumwali yo walembeka zina kuchanya. Ko so kwe Chiuta Wakweruzga ŵanthu wosi ndipuso kwe maumoyu nga ŵanthu arunji wo apangika kuja akufikapu. 24  Ndipuso ko kwe Yesu, mwendapakati wa phanganu lifya, ndi ndopa zakuwazika, zo zilongoro mu nthowa yamampha ukongwa kuluska ndopa zaku Abelu. 25  Muwonesesi kuti mukana cha kuvwisiya kwaku yo walongoro. Pakuti asani wo angukana kuvwisiya kwaku yo wangutumika ndi Chiuta kuti waŵatcheŵeski pacharu, angupona cha, ndikuti isi tingapona cha asani tituwaku kwaku yo walongoro kutuliya kuchanya! 26  Pa nyengu yo, mazu ngaki ngangusukunyisa charu, kweni sonu iyu walayizga kuti: “Ndazamusukunyisa so charu pe cha, kweni ndazamusukunyisa so kuchanya.” 27  Sonu mazu ngakuti “ndazamusukunyisa so” ngalongo kutuzgikapu kwa vinthu vo visukunyika, vinthu vo vapangika, kuti vinthu vo vasukunyika cha, vilutirizgi kuŵapu. 28  Mwaviyo pakuti tiwona kuti tazamulonde Ufumu wo ungasukunyika cha, tiyeni tilutirizgi kulonde wezi ukulu, ndipu kuporote mu wezi wenuwu tichita uteŵeti wakupaturika kwaku Chiuta mwakuzomerezeka, mwamantha ndi ulemu ukulu. 29  Pakuti Chiuta widu ndi motu wakunanga.

Mazu Ngam'mphata

Wonani Mazu ngo Ngakonkhoskeka.
Pamwenga kuti, “kuti musambirepu kanthu.”
Wonani Mazu ngo Ngakonkhoskeka.
Mazu ngaki chayingu, “pengavi nthowa yakusinthiya vo wanguchita.”