Aheberi 10:1-39

  • Sembi zanyama zakupereŵere (1-4)

    • Dangu, chithuthuzi (1)

  • Sembi yaku Khristu yikuperekeka kamoza pe mbwenu (5-18)

  • Nthowa yifya yakulongozge ku umoyu (19-25)

    • Tingalekanga cha kuwungana pamoza (24, 25)

  • Kutcheŵeska pa nkhani yakuchitiya dala ubudi (26-31)

  • Kukunthiyapu kukhumbika chiganga kweniso chivwanu (32-39)

10  Pakuti Dangu* le ndi vinthu chayivu cha, kweni le ndi chithuthuzi ŵaka cha vinthu vamampha vo vituza, lingachitiska cha* kuti ŵanthu wo asopa Chiuta aje akufikapu mwakupereka sembi zimozamoza pe, zo zilutirizga kuperekeka chaka ndi chaka.  Asani venga viyo, asi sembi zatingi ziperekekengi so cha, chifukwa wo achita uteŵeti wakupaturika, asani atoweseka ŵaka atingi angaziŵengi so cha maubudi?  Mwakupambana ndi venivi, sembi izi zikumbusa maubudi chaka ndi chaka,  chifukwa ndopa za nkhuzi* kweniso za mbuzi zingatuzgapu cha maubudi.  Sonu wati waza pacharu chapasi wangukamba kuti: “‘Sembi ndi chakupereka munguvikhumba cha, kweni mungundinozge liŵavu.  Mungukondwa cha ndi sembi zakupiriza zamphumphu ndipuso sembi za ubudi.’  Pavuli paki ndingukamba kuti: ‘Awonani! Ndaza (mumpukutu* mukulembeka vakukwaskana ndi ini) kuzichita khumbu linu yimwi Chiuta.’”  Wati wakamba dankha kuti: “Mungukhumba cha ndipuso mungukondwa cha ndi sembi, vakupereka, sembi zakupiriza zamphumphu kweniso sembi za ubudi,” kung’anamuwa sembi zo ziperekeka mwakukoliyana ndi Dangu,*  wangukamba so kuti: “Awonani! Ndaza kuzichita khumbu linu.” Watuzgapu chakwamba kuti wajalikiski chachiŵi. 10  Chifukwa cha “khumbu” lenili, tatoweseka kuporote mu sembi ya liŵavu laku Yesu Khristu lo likuperekeka kamoza pe mbwenu mpaka muyaya. 11  Ndipuso wasembi weyosi watuma pamalu ngaki zuŵa ndi zuŵa kuchita uteŵeti wakupaturika, kweniso kaŵikaŵi kupereka sembi zimozamoza pe zo zingatuzgiyapu nkhani cha maubudi. 12  Kweni munthu uyu wakupereka sembi yimoza pe mpaka muyaya chifukwa cha maubudi ndipu wakuja kujanja lamaryi laku Chiuta. 13  Kutuliya pa nyengu yeniyo, walindizga kuti arwani ŵaki aŵikiki kusi kwa maphazi ngaki. 14  Pakuti mwakupereka sembi yimoza, wachitiska kuti ŵanthu wo atoweseka aje akufikapu mpaka muyaya. 15  Ndipuso mzimu wakupaturika utitipaska ukaboni chifukwa wati wakamba kuti: 16  “Yehova wakamba kuti, ‘Ili ndi phanganu lo ndazamuchita nawu pavuli pa mazuŵa ngo. Ndazamuŵika marangu ngangu mumitima yawu ndipuso ndazakungalemba mumaŵanaŵanu ngawu,’” 17  pavuli paki ungukamba kuti: “Ndazamukumbuka so cha maubudi ngawu kweniso ntchitu zawu za kuleka kuvwiya marangu.” 18  Sonu pakuti venivi vagowokereka, palivi chifukwa chakupereke sembi ya ubudi. 19  Mwaviyo abali, pakuti tagomezga nthowa yakuselere kumalu ngakupaturika chifukwa cha ndopa zaku Yesu, 20  yeniyo wakutijuliya nge nthowa yifya yakulongozge ku umoyu kuporota paketani yo ndi liŵavu laki, 21  ndipuso pakuti te ndi wasembi wapachanya ukongwa wakuwonere nyumba yaku Chiuta, 22  tiyeni tifiki kwaku iyu ndi mtima wauneneska kweniso chivwanu chosi, te ndi mitima yakuwazika ndi ndopa zaki kuti titoweseki ku njuŵi yiheni ndipuso te ndi maliŵavu ngakusambisika ndi maji ngakutowa. 23  Tiyeni tikoleski mwaŵi wakupharazga pakweru chilindizga chidu, ndipu tingasukunyikanga cha, pakuti yo wakulayizga ngwakugomezgeka. 24  Ndipu tiyeni tiŵanaŵaniyanengi kuti tichiskiyani ku chanju ndi ku ntchitu zamampha, 25  ndipu tingalekanga cha kuwungana pamoza, nge nkhalusu ka ŵanthu anyaki, kweni tichiskanengi, ukongwa po muwona kuti zuŵa lo le pafupi. 26  Pakuti asani tichitiya dala ubudi pavuli pakuti tawuziŵa umampha uneneska, palivi so sembi ya ubudi yo yingaperekeka, 27  kweni chilindizga cho chilipu ntcheruzgu chakofya ndipuso ukali wakukore wo utuza kuzinanga akususka. 28  Munthu weyosi yo wayuyuwa Dangu* laku Mozesi watufwa kwambula kumuchitiya lisungu, asani pe ukaboni wa ŵanthu ŵaŵi pamwenga atatu. 29  Kumbi muŵanaŵana kuti munthu yo wakandakanda Mwana waku Chiuta ndipuso yo wayuyuwa ndopa za phanganu zo wakutoweseka nazu kweniso yo wakwiyisa mzimu wa wezi ukulu mwakuwunyoza, wazamulonde cheruzgu chikulu wuli? 30  Pakuti titimuziŵa Yo wakukamba kuti: “Kuweze nkhwangu; ndazamuweze ndini.” Ndipuso kuti: “Yehova wazamuyeruzga ŵanthu ŵaki.” 31  Kulangika ndi Chiuta wamoyu nkhwakofya ukongwa. 32  Kweni lutirizgani kukumbuka mazuŵa ngakudankha ngeningo ukweru wati wakuŵaliyani, mungukunthiyapu vinthu vinandi limoza ndi masuzgu. 33  Nyengu zinyaki mwanyozekanga ndipuso mwasuzgikanga pakweru,* ndipu nyengu zinyaki mwasuzgikiyanga nawu limoza* ŵanthu wo akumananga ndi venivi. 34  Pakuti mungulongo lisungu wo ŵenga mujeri, kweniso munguzomereza mwalikondwa kulondeka vinthu vinu, pakuziŵa kuti mwe ndi katundu wamampha ukongwa kuluska mwenuyu kweniso wakujalisa. 35  Mwaviyo, mungatayanga cha wanangwa winu wakulongoro wo mwazamutumbikika nawu. 36  Pakuti mukhumbika kukunthiyapu kuti asani mwachita khumbu laku Chiuta, muzilonde vo wakulayizga. 37  Pakuti kwaja “kanyengu kamanavi,” ndipu “yo watuza, wafikengi ndipu waswerengi cha.” 38  “Kweni murunji wangu wazamuja wamoyu chifukwa cha chivwanu,” ndipu “asani wawere vuli, ndikondwa nayu cha.” 39  Sonu te mtundu wa ŵanthu wo awere vuli cha kuluta ku kunangika, kweni te mtundu wa ŵanthu wo ŵe ndi chivwanu chakusunga maumoyu ngidu.

Mazu Ngam'mphata

Wonani Mazu ngo Ngakonkhoskeka.
Panyaki kuti, “ŵanthu angachitiska cha.”
Pamwenga kuti, “ng’ombi zinthulumi.”
Mazu ngaki chayingu, “mumpukutu wa buku.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Mazu ngaki chayingu, “pakweru nge kuti mwe mubwalu lamasaza.”
Pamwenga kuti, “mwaŵawovyanga.”