Julani

Lutani pa vo ve mukati

Agalatiya 6:1-18

NKHANI ZO ZE MUBUKU ILI

  • Nyamuliyanani mphingu (1-10)

    • Cho munthu wamija ndichu wavuna (7, 8)

  • Kudumulika kulivi phindu (11-16)

    • Chakulengeka chifya (15)

  • Mazu ngakumaliya (17, 18)

6  Abali, asani munthu walandiya kuheni kwambula kuziŵa, yimwi Akhristu akukhwima,* yesani kumunyolo munthu waviyo mwakuzika. Kweni yimwi mwaŵeni phweriyani kuti namwi so muleki kuyeseka.  Lutirizgani kunyamuliyana mphingu, ndipu asani muchita venivi, mufiskengi dangu laku Khristu.  Asani munyaki watijivwa kuti iyu ndiyu, penipo ndi munthu mweneku cha, watijipusika ŵaka.  Kweni weyosi wasandi vakuchita vaki, ndipu pavuli paki waŵengi ndi chifukwa chakukondwe pa vo iyu mweneku wachita, kweni mwakujiyeruzgiya ndi munthu munyaki cha.  Pakuti weyosi wazamunyamuwa katundu* waki.  Kweniso, weyosi yo wasambizika mazu,* wagaŵani vinthu vosi vamampha ndi munthu yo watimusambiza* vinthu venivi.  Mungalandizgikanga cha: Chiuta ngwakuti wanganyozeka* cha. Pakuti chechosi cho munthu wamija, ndichu so wazamuvuna;  pakuti yo wamija mwakukoliyana ndi liŵavu laki, wazamuvuna kuvunda kutuliya mu liŵavu laki, kweni yo wamija mwakukoliyana ndi mzimu, wazamuvuna umoyu wambula kumala kutuliya mu mzimu.  Tingavukanga cha kuchita vamampha, pakuti pa nyengu yaki tazamuvuna asani taleka kuvuka. 10  Mwaviyo, asani tasaniya ŵaka mpata,* tichiti vamampha ku ŵanthu wosi, ukongwa kwa abali ŵidu mu chivwanu. 11  Wonani vilembu vikulu vo ndakulembiyani ndi janja langu. 12  Wosi wo akhumba kuwoneka umampha mwakuliŵavu ndiwu atesesa kukuchichizgani kuti mudumuliki. Yiwu achita viyo kuti agwenthi ŵaka kutombozgeka chifukwa cha chimiti chakutombozgekiyapu* chaku Khristu. 13  Pakuti chinanga mbanthu wo adumulika, yiwu ŵeneku asunga cha Dangu,* kweni akhumba kuti yimwi mudumuliki ndi chilatu chakuti aŵi ndi chifukwa chakujiŵikiyamu pa liŵavu linu. 14  Kweni ini ndingajiŵikamu cha, kupatuwaku vakukwaskana ndi chimiti chakutombozgekiyapu* cha Ambuyafwi Yesu Khristu pe, ŵeniwo kuporote mwaku yiwu, kwaku ini charu chosi chabayika* ndipu kucharu, ini ndabayika.* 15  Pakuti kudumulika pamwenga kuleka kudumulika nkhanthu cha, kweni chakulengeka chifya ndichu. 16  Kweni kwaku wosi wo atenda umampha mwakulongozgeka ndi dangu lenili, chimangu ndi lisungu viŵi paku yiwu, chinanga mpha Isirayeli waku Chiuta. 17  Kwamba sonu, paŵevi munthu wakundisuzga, pakuti paliŵavu langu pe mabamba ngakulongo kuti nde kapolu waku Yesu. 18  Abali, wezi ukulu wa Ambuyafwi Yesu Khristu, uŵi ndi mzimu wo mulongo. Ame.

Mazu Ngam'mphata

Pamwenga kuti, “yimwi akulongozgeka ndi mzimu waku Chiuta.”
Pamwenga kuti, “udindu.”
Pamwenga kuti, “wasambizika mazu mwapamulomu.”
Pamwenga kuti, “yo watimusambiza mwapamulomu.”
Pamwenga kuti, “ngwakuti wangapusikika.”
Mazu ngaki chayingu, “asani tasaniya ŵaka nyengu yakuŵikika.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Pamwenga kuti, “chabayikiya pachimiti.”
Pamwenga kuti, “ndabayikiya pachimiti.”