3 Yohane 1:1-14

  • Moni kweniso pempheru (1-4)

  • Kulumba Gayo (5-8)

  • Diyotirefe wakujikuzga (9, 10)

  • Demetiriyasi walumbika (11, 12)

  • Kunozga ulendu wakuchiŵayende ndipuso kutawuzga (13, 14)

 Ini mura, ndilembe wakwanjiwa Gayo, mweniyo nditimuyanja nadi.  Wakwanjiwa, ndipemphera kuti vinthu vosi vilutirizgi kukuyende umampha ndipuso kuti uje ndi umoyu wamampha,* nge mo sonu vitikuyende umampha.  Pakuti ndingukondwa ukongwa abali ŵati aza ndi kupereka ukaboni wakukwaskana ndi uneneska wo wawukoleska, penipo ulutirizga kwenda mu uneneska.  Palivi chinthu cho chitindikondwesa ukongwa* kuluska kuvwa kuti ŵana ŵangu alutirizga kwenda mu uneneska.  Wakwanjiwa, yiwi walongo kuti we wakugomezgeka pa vo uchitiya abali, chinanga kuti yiwu mbalendu kwaku yiwi.  Yiwu apereka ukaboni ku mpingu wakukwaskana ndi chanju chaku. Nditikupempha kuti achituwaku kweniko, ulayirani nawu mu nthowa yakukondwesa Chiuta.  Pakuti anguluta chifukwa cha zina laki, ndipu angutoku kanthu kekosi cha ku ŵanthu amitundu yinyaki.  Mwaviyo, nasi titenere kuŵalonde umampha ŵanthu aviyo, kuti tije antchitu anyawu mu uneneska.  Mpingu ndinguwulembe nkhani yinyaki, kweni Diyotirefe mweniyo watanja kuja wakwamba pakati pawu, walonde mwaulemu cha kanthu kekosi kakutuliya kwaku isi. 10  Ndichu chifukwa chaki, asani ndaza ndazamuchitapu kanthu pa ntchitu zo wachita zakuwandisa nkhani zakunanga mbiri yidu. Pakuti wakhorwa cha ndi venivi, wakana kulonde abali mwaulemu ndipu ŵeniwo akhumba kuŵalonde, watiŵajalizga ndipu watiŵasezga mu mpingu. 11  Wakwanjiwa, ungayezganga vinthu viheni cha, kweni uyezgengi vinthu vamampha. Mweniyo wachita vamampha ngwakutuliya kwaku Chiuta. Mweniyo wachita vinthu viheni wechendamuwonepu Chiuta. 12  Ŵanthu wosi akamba vamampha vakukwaskana ndi Demetiriyasi, ndipu uneneska nawu utimusimikiziya. Isi nasi titimuchitiya ukaboni ndipu uziŵa kuti ukaboni wo tipereka ngwauneneska. 13  Nde ndi vinandi vakuti ndikulembe, kweni ndakhumba cha kuti ndilutirizgi kukulembe mwakugwiriskiya ntchitu chakulembe ndi inki. 14  Kweni ndigomezga kuti ndikuwonengi pambula kuswera yapa, ndipu tazamukambiskana pa masu ndi pa masu. Chimangu chiŵi nawi. Anyangu atikutawuzga. Unditawuzgiyi anyangu mwakuchita kuŵazumbuwa mazina ngawu.

Mazu Ngam'mphata

Pamwenga kuti, “umoyu wambula kutamatama.”
Panyaki kuti, “cho chitindichitiska kuwonga ukongwa.”