2 Timote 2:1-26

  • Sambiza uthenga ku ŵanthu akwenere (1-7)

  • Kukunthiyapu masuzgu chifukwa cha uthenga wamampha (8-13)

  • Sambiza umampha mazu ngaku Chiuta (14-19)

  • Thaŵa makhumbiru nga unyamata (20-22)

  • Kuchita vinthu ndi ŵanthu akususka (23-26)

2  Mwaviyo, yiwi wamwana wangu lutirizga kusaniya wezi ukulu wo we mwaku Khristu Yesu;  ndipu vinthu vo ukuvwa kwaku ini, venivo akaboni anandi anguvizomereza, uvisambizi ku ŵanthu akugomezgeka, wo nawu so azamukuŵa akwenere kusambiza ŵanthu anyaki.  Nge msilikali wamampha waku Khristu Yesu, zomereza kukumana ndi masuzgu.  Palivi munthu yo wateŵete nge msilikali, mweniyo wachitaku* malonda nga* mu umoyu wunu, kuti wakondwesi yo wakumulemba ntchitu nge msilikali.  Ndipu chinanga mpha maphara, ndi weyosi cha yo wachitaku maphara mweniyo walonde mphotu.* Pijapija asani wachita maphara ngo, mwakulondo marangu ngaki.  Mlimi yo wagwira ntchitu mwaphamphu ndiyu watenere kwamba kurya vipasu.  Lutirizga kuŵanaŵaniya vo ndikamba; Ambuya akuwovyengi kuti uvwisengi vinthu vosi.  Ukumbukengi kuti Yesu Khristu wakuyuskika ku nyifwa ndipu wenga mphapu* yaku Davidi, mwakukoliyana ndi uthenga wamampha wo ndipharazga,  wo ini ndisuzgikiya ndipuso wo ndimangikiya nge wakuchita vinthu viheni. Kweni mazu ngaku Chiuta ngamangika cha. 10  Pa chifukwa chenichi ndilutirizga kukunthiyapu vinthu vosi chifukwa cha akusankhika, kuti nawu alonde utaski wo uŵapu kuporote mwaku Khristu Yesu, limoza ndi unkhankhu wamuyaya. 11  Mazu yanga ngakugomezgeka: Kukamba uneneska, asani tikufwiya nayu limoza, tazamuja so ndi umoyu limoza nayu; 12  asani tilutirizga kukunthiyapu, tazamuwusa so nayu limoza nge mafumu; asani titimukana, nayu so wazakutikana; 13  asani te ambula kugomezgeka, iyu walutirizga kuja wakugomezgeka, pakuti iyu wangajikana cha. 14  Lutirizga kuŵakumbusa vinthu venivi ndi kuŵalunguchizga* pa masu paku Chiuta kuti angalimbananga cha pa mazu, kuchita viyo kulivi phindu lelosi chifukwa kunanga* ŵanthu wo avwisiya. 15  Yesesa kuja wakuzomerezeka ndi Chiuta, wantchitu wambula chifukwa chakuchitiya soni, wakusambiza umampha mazu ngauneneska. 16  Kweni ukanengi nkhani zambula fundu zo zinanga cho ntchakupaturika, pakuti nkhani zenizi zingachitiska kuti mijalidu yakupambanapambana yambula kopa Chiuta yilutiriyi, 17  ndipu mazu ngawu ngazamusapaliya nge chilonda cha zoza. Anyaki mwa ŵanthu ŵenaŵa, ndi Hemenayo kweniso Fileto. 18  Ŵanthu ŵenaŵa atuwaku ku uneneska ndipu akamba kuti chiyuka chikuchitika kali, ndipuso ananga chivwanu cha ŵanthu anyaki. 19  Chinanga kuti ve viyo, fawundeshoni yakukho yaku Chiuta yisukunyika cha, ndipu ye ndi chidindu cha mazu ngakuti, “Yehova waziŵa ŵanthu wo mbaki,” ndipuso “Weyosi yo wadaniya pa zina laku Yehova, waleki kuchita vinthu vambula urunji.” 20  Sonu munyumba yikulu muja viyaŵi vagolidi ndi vasiliva pe cha, kweni muja so vachimiti ndipuso vadongu. Ndipu vinyaki vigwira ntchitu yakuzirwa, penipo vinyaki vigwira ntchitu yambula kuzirwa. 21  Sonu asani munthu wakhwecha viyaŵi vo vigwira ntchitu yambula kuzirwa, wajengi chidya* chakugwira ntchitu yakuzirwa, chakutoweseka, chakukhumbika ku mweneku, chakunozgeke ntchitu yeyosi yamampha. 22  Mwaviyo thaŵa makhumbiru nga unyamata, kweni penja urunji, chivwanu, chanju, chimangu limoza ndi ŵanthu wo adaniya pa Ambuya ndi mtima wakutowa. 23  Kweniso ukanengi suskanu zakupusa ndipuso zambula zeru, pakuziŵa kuti zitambisa ndewu. 24  Pakuti kapolu wa Ambuya wakhumbika cha kuchita ndewu, kweni wakhumbika kuja wakuzika ku* ŵanthu wosi, wakwenere kusambiza, wakuwuko mtima asani ŵanthu amunangiya, 25  walunguchizgengi mwakuzika ŵanthu wo atimususka. Panyaki Chiuta wangaŵawovya kuti alapi,* vo vingachitiska kuti awuziŵi umampha uneneska, 26  ndipuso kuti panyaki angawamu ndi kupona ku chiŵana chaku Dyaboli, pakuwona kuti Dyaboli waŵako amoyu kuti achiti khumbu laki.

Mazu Ngam'mphata

Mazu ngaki chayingu, “yo wawira mu.”
Panyaki kuti, “vakuchitika va zuŵa ndi zuŵa va.”
Pamwenga kuti, “chisoti.”
Mazu ngaki chayingu, “mbewu.”
Mazu ngaki chayingu, “ndi kupereke ukaboni mwakukwana.”
Pamwenga kuti, “kugadabuwa.”
Pamwenga kuti, “chiyaŵi.”
Pamwenga kuti, “kuja mwakuphwere ndi.”
Pamwenga kuti, “asinthi maŵanaŵanu.”