2 Peturo 2:1-22

  • Kuzengi asambizi aboza (1-3)

  • Cheruzgu cha asambizi aboza ntchakusimikizika (4-10a)

    • Angelu aponyeka mu Tatalasi (4)

    • Chigumula; Sodomu ndi Gomora (5-7)

  • Vakuchita va asambizi aboza (10b-22)

2  Kweni panguza achimi aboza pakati pa ŵanthu nge mo so paŵiyengi asambizi aboza pakati pinu. Yiwu aserezengi mwachisisi timagulu takugaruka takupweteka ndipu afikengi mpaka pakukana mweneku yo wakuŵagula. Venivi vichitiskengi kuti ajidaniyi pharanyiku mwaliŵiliŵi.  Ndipuso anandi azakuŵalondo pakuchita jalidu liheni mwambula soni* ndipu chifukwa chaku yiwu, ŵanthu azamukamba vinthu vakunyoza nthowa ya uneneska.  Kweniso mwambunu, azakukugololiyani ndi mazu ngachinyengu. Kweni cheruzgu chawu cho chikupangika kali, chituza kamanakamana cha, ndipu pharanyiku lawu ligona cha.  Kukamba uneneska, Chiuta wangutondeka cha kulanga angelu wo angubuda, kweni wakuŵaponya mu Tatalasi,* wakuŵamanga simbi* mu mdima wakuti bii* ndipu alindizga cheruzgu.  Ndipuso wangutondeka cha kulanga charu chakali, kweni wangutaska Nowa mupharazgi wa urunji limoza ndi ŵanthu anyaki 7, pa nyengu yo wanguchitiska chigumula pacharu cha ŵanthu ambula kopa Chiuta.  Wanguwotcha Sodomu ndi Gomora mpaka kuja vyotu pe, wangususka matawuni ngenanga, ndipu wangupereka chakuwoniyapu cha vinthu vo viziyengi ŵanthu ambula kopa Chiuta.  Ndipu wangutaska munthu murunji Loti mweniyo wasuzgikanga maŵanaŵanu, chifukwa ŵanthu ambula kuvwiya marangu achitanga jalidu liheni mwambula soni,*  pakuti zuŵa lelosi munthu murunji mwenuyu wasuzgikanga ukongwa chifukwa cha vinthu vakuleka kuvwiya marangu vo wawonanga ndi kuvwa pa nyengu yo wajanga pakati pawu.  Mwaviyo, Yehova waziŵa kutaska ŵanthu akujipereka kwaku iyu asani ayeseka, kweni wasunga ŵanthu ambula urunji kuti azinangiki* pa zuŵa lacheruzgu, 10  ukongwa wo akhumba kufipiska maliŵavu nga anyawu kweniso wo ayuyuwa amazaza.* Mwakuchitiya dala kweniso mwakujikuzga, atopa cha kunyoza ŵanthu aunkhankhu. 11  Penipo angelu chinanga kuti angachita vikulu kweniso mbanthazi kuluska yiwu, kweni atiŵamangala mwakunyoza cha, chifukwa chakuti atumbika Yehova. 12  Ŵanthu ŵenaŵa mwakuyanana ndi nyama yambula zeru, yo yichitiyamu ŵaka vinthu kweniso yo yikuwaku kuti yiwonjeki ndi kubayika, alongoro mwakunyoza nkhani zakukwaskana ndi vinthu vo aleka kuviziŵa. Vinthu viheni vo achita vazamuchitiska kuti anangiki. 13  Yiwu akumana ndi masuzgu nge mphotu ya vakuchita vawu viheni. Awona kuti kuchita makhumbiru nga liŵavu nkhwakukondwesa, chinanga angachita ndi msana. Yiwu ndi midonthu kweniso vilema ndipu akondwa ukongwa* asani atikusambizani visambizu vawu vakulandizga achirya namwi mumaphwandu. 14  Masu ngawu ngazaza chigololu ndipu atondeka kujikaniza kuchita ubudi ndipuso anyengere ŵanthu ambula kujalikiskika. Ŵe ndi mtima wakusambizika mbunu. Yiwu mbana akutembeka. 15  Asiya nthowa yakunyoloka ndipu alandizgika. Yiwu alondo nthowa yaku Balamu mwana waku Beyori, yo wangwanja mphotu ya kuchita vinthu viheni. 16  Kweni wanguchenyeka chifukwa cha kunanga vinthu vamampha. Nyama yakunyamuwa katundu yo yilongoro cha, yingulongoro nge munthu ndipu yingutondekesa vakuchita vauzereza va mchimi yo. 17  Yiwu mbakasupi ambula maji ndipuso nyankhuŵinda wakututuzgika ndi chimphepu chanthazi, ndipu mdima wakuti bii* wasungikiya yiwu. 18  Yiwu alongoro mwakujikuzga vinthu vambula phindu. Anyengere ŵanthu wo athaŵa ŵaka sonu ku ŵanthu wo achita viheni ndipuso atiŵakopa ndi makhumbiru nga liŵavu kweniso ndi nkharu yakuchita jalidu liheni mwambula soni.* 19  Penipo atiŵalayizga wanangwa, yiwu ŵeneku mbakapolu a kuvunda; pakuti asani munthu wathereskeka ndi munthu munyaki, ndi kapolu waki.* 20  Kukamba uneneska, asani atuwaku ku vinthu vakufipiska va charu ichi mwakuŵaziŵa umampha Ambuya ndipuso Mtaski, Yesu Khristu, mbwenu awere so ku vinthu viheni ndi kuthereskeka, umaliru wawu uja uheni ukongwa kuluska po ŵenge pakwamba. 21  Vatingi viŵajaliyengi umamphaku asani anguleka kuyiziŵa umampha nthowa ya urunji, kuluska kuti pavuli pakuyiziŵa, atuweku ku dangu lakupaturika lo akulonde. 22  Vo nthanthi yauneneska yikamba ndivu vaŵachitikiya vakuti: “Galu wawere kumawukuzi ngaki ndipu nkhumba yo yingusambisika yawere so kuchikunkhuluka mumawulambwi.”

Mazu Ngam'mphata

Mu Chigiriki, a·selʹgei·a. Wonani Mazu ngo Ngakonkhoskeka.
Wonani Mazu ngo Ngakonkhoskeka.
Panyaki kuti, “wakuŵaŵika muvimazenji.”
Pamwenga kuti, “mdima wamunkhorwi.”
Mu Chigiriki, a·selʹgei·a. Wonani Mazu ngo Ngakonkhoskeka.
Mazu ngaki chayingu, “azidumuliki.”
Pamwenga kuti, “wo adelera alongozgi.”
Pamwenga kuti, “ndipu akondwa kuchita vinthu mwambula kujiko.”
Pamwenga kuti, “mdima wamunkhorwi.”
Mu Chigiriki, a·selʹgei·a. Wonani Mazu ngo Ngakonkhoskeka.
Pamwenga kuti, “asani munthu wathereskeka ndi chinthu chinyaki, ndi kapolu wa chinthu cho.”