2 Peturo 1:1-21

  • Moni (1)

  • Musimikiziyi kudanika kwinu (2-15)

    • Mijalidu yakusazgiyapu pa chivwanu (5-9)

  • Mazu nga uchimi ngakusimikizika ukongwa (16-21)

1  Ini Simoni Peturo, kapolu ndipuso wakutumika waku Yesu Khristu, ndilembe ŵanthu wo asaniya chivwanu chakuzirwa nge chidu kuporote mu urunji waku Chiuta widu kweniso waku Yesu Khristu, Mtaski kuti:  Wezi ukulu ndipuso chimangu visazgikiyeku kwaku yimwi chifukwa chakumuziŵa umampha Chiuta kweniso Yesu Ambuyafwi.  Chifukwa cha nthazi zaki, Chiuta watipaska* vinthu vosi vo vititiwovya kusaniya umoyu kweniso kuja akujipereka kwaku iyu chifukwa chakumuziŵa umampha Yo wakutidana kuporote mu unkhankhu waki kweniso umampha waki.  Ndipu kuporote mu vinthu venivi, iyu wakutipaska* malayizgu ngakuzirwa kweniso ngakulu ukongwa, kuti kuporote mu malayizgu ngenanga, namwi muje ndi mijalidu yaku Chiuta, pakuti mwatuwaku ku mijalidu yakuvunda ya charu yo yituliya mu makhumbiru ngaheni.  Pa chifukwa chenichi, yesesani ndi mtima wosi kuti pa chivwanu chinu musazgiyepu umampha, pa umampha, musazgiyepu kuziŵa vinthu,  pa kuziŵa vinthu, musazgiyepu kujiko, pa kujiko, musazgiyepu kukunthiyapu, pa kukunthiyapu, musazgiyepu kujipereka kwaku Chiuta,  pa kujipereka kwaku Chiuta, musazgiyepu kwanja abali, pa kwanja abali, musazgiyepu chanju.  Pakuti asani mwe ndi vinthu venivi ndipu vizara mwaku yimwi, vikuvikiliyeningi kuti muleki kuja akulopwa pamwenga ambula kupasa vipasu pa nkhani yakuŵaziŵa umampha Ambuyafwi Yesu Khristu.  Pakuti munthu weyosi yo walivi vinthu venivi ngwachibulumutiya, wajala masu ngaki ku ukweru* ndipu waluwa kuti wakutoweseka ku maubudi ngaki ngakali. 10  Mwaviyo abali, yesesani ndi mtima wosi kuti yimwi mwaŵeni musimikiziyi kudanika kweniso kusankhika kwinu, pakuti asani mulutirizga kuchita venivi mwazamukuwa cha mwemosi mo vingaŵiya. 11  Ndipu mu nthowa yeniyi, mwazamuzomerezeka kusere wamphumphu mu Ufumu wamuyaya wa Ambuyafwi kweniso Mtaski widu, Yesu Khristu. 12  Pa chifukwa chenichi nyengu zosi ndikhumba kuti ndikukumbuseningi vinthu venivi, chinanga kuti mutiviziŵa kali ndipuso mwe akujalikiskika mu uneneska wo muziŵa. 13  Kweni ndiwona kuti nkhwakwenere pa nyengu yo ndeche muchihema ichi* kukusukunyisani mwakukukumbusani, 14  pakuziŵa kuti po ndichita venivi chihema changu chituzgikengepu pambula kuswera yapa, nge mo so Yesu Khristu Ambuyafwi wakundilongole. 15  Ndiyesesengi kuchita vosi vo ndingafiska kuti asani ndatuwapu muzikumbukengi* mwija vinthu venivi. 16  Tingukuziŵisani nthazi kweniso kuŵapu kwaku Yesu Khristu, Ambuyafwi, ndipu tingugwiriskiya ntchitu nkhani zaboza zakunozgeka mwauryarya cha, kweni tingujiwone tija ukulu waki. 17  Pakuti iyu wangulonde ulemu ndi unkhankhu kwaku Chiuta pa nyengu yo mazu nga nge yanga ngangukambikiya iyu mwaunkhankhu ukulu kuti: “Uyu ndi Mwana wangu, mweniyo nditimuyanja, yo watindikondwesa.” 18  Kukamba uneneska, mazu yanga nganguvwika kutuliya kuchanya pa nyengu yo tenga ndi iyu muphiri lakupaturika. 19  Mwaviyo te ndi mazu nga uchimi ngakusimikizika ukongwa, ndipu muchita umampha kungaphwere nge mo mungachitiya ndi nyali yo yimbulika mumalu nga mdima mumitima yinu (mpaka po chiwumbu chateme ndipuso mpaka po nyenyezi ya thondu* yatuliya). 20  Pakuti chakwamba, muziŵa kuti palivi uchimi wa mu Lemba wo utuliya kunyaki. 21  Pakuti palivi nyengu yo uchimi ukuzapu chifukwa cha khumbu la munthu, kweni ŵanthu alongoronga mazu ngakutuliya kwaku Chiuta mwakukoliyana ndi mo mzimu wakupaturika waŵalongozgiyanga.*

Mazu Ngam'mphata

Pamwenga kuti, “watipaska kwawezi.”
Pamwenga kuti, “wakutipaska kwawezi.”
Panyaki kuti, “ngwachibulumutiya, wawona patali cha.”
Kung’anamuwa liŵavu laki we pacharu chapasi.
Pamwenga kuti, “muzizumbuwengi.”
“Thondu” ndi nyenyezi yo yimaliya kuwoneka asani lumwi laja kamanavi kutuwa.
Mazu ngaki chayingu, “waŵapingiyanga.”