2 Atesalonika 2:1-17

  • Munthu wambula kuvwiya marangu (1-12)

  • Achiskika kuti aje akukho (13-17)

2  Kweni abali, pa nkhani yakukwaskana ndi kuŵapu kwa Ambuyafwi Yesu Khristu kweniso kuwunganiskika kwidu kwaku iyu, titikupemphani kuti  muleki kusukunyika pa maŵanaŵanu nginu, pamwenga kuchita mantha ndi uthenga wakuwoneka nge kuti watuliya kwaku Chiuta,* pamwenga uthenga wa pamulomu pamwenga wa mukalata yakuwoneka nge kuti yatuliya kwaku isi, wakukamba kuti zuŵa laku Yehova lafika.  Paŵevi munthu wakukulandizgani* mu nthowa yeyosi, chifukwa zuŵa lo lizengi cha mpaka po wampatuku waziya dankha, ndipuso mpaka po wavumbulikiya munthu wambula kuvwiya marangu, mwana wa pharanyiku.  Iyu ngwakususka ndipu watijikweza pachanya paku weyosi yo wadanika kuti chiuta, pamwenga chinthu cho chisopeka, mwakuti waja munyumba yakusopiyamu yaku Chiuta ndi kujilongo pakweru kuti ndi chiuta.  Kumbi mwaluwa kuti pa nyengu yo ndenga ndeche namwi ndakukambiyaningi vinthu venivi?  Ndipu sonu muziŵa cho chitimujalizga, ndi chilatu chakuti wazivumbuliki pa nyengu yaki.  Kukamba uneneska, chisisi ichi chakuleka kuvwiya marangu, chigwira ntchitu mpaka po watuzgikiyapu yo sonu panu wachita nge chakujalizga.  Pavuli paki, wazamuvumbulika munthu wambula kuvwiya marangu, mweniyo Ambuya Yesu azakumubaya mwakugwiriskiya ntchitu mzimu wa mulomu wawu, ndi kumutuzgapu pa nyengu yo kuŵapu kwawu kwazamuwoneke.  Kweni kuŵapu kwa munthu wambula kuvwiya marangu, kuchitika chifukwa chaku Satana ndipuso wachita ntchitu zosi zanthazi, visimikizu vaboza, vakuziziswa, 10  kweniso chinyengu chambula urunji chamtundu wewosi, ku ŵanthu wo anangika ndipu kunangika kwenuku ntchilangu chawu, chifukwa angukana chanju chauneneska kuti ataskiki. 11  Ndichu chifukwa chaki Chiuta wakuzomereza kuti alandizgiki, ndi chilatu chakuti agomezgengi boza, 12  kuti wosi ayeruzgiki chifukwa anguwugomezga cha uneneska, kweni ayanjanga vinthu vambula urunji. 13  Kweni nyengu zosi tiwonga Chiuta chifukwa chaku yimwi abali akwanjika ndi Yehova, chifukwa Chiuta wakukusankhani kutuliya pakwamba kuti wakutaskeni mwakukutowesani ndi mzimu waki, kweniso chifukwa chakuti mugomezga uneneska. 14  Wakukudaniyani ku utaski wenuwu kuziya mu uthenga wamampha wo tipharazga kuti musaniyi unkhankhu waku Yesu Khristu, Ambuyafwi. 15  Mwaviyo abali, jani akukho ndipu lutirizgani kukoleska midawuku yo mungusambizika, kwali mwa uthenga wa pamulomu pamwenga mukalata yakutuliya kwaku isi. 16  Kweniso, yiwu ŵeneku Ambuyafwi, Yesu Khristu ndipuso Chiuta Awusefwi yo wangutiyanja ndi kutipembuzga kwamuyaya ndipuso kutipaska chilindizga chamampha mwakugwiriskiya ntchitu wezi ukulu, 17  apembuzgi mitima yinu ndi kukuwovyani kuti muje akukho,* ndi chilatu chakuti nyengu zosi muchitengi ndi kulongoro vinthu vamampha.

Mazu Ngam'mphata

Pamwenga kuti, “nge kuti waperekeka ndi mzimu.”
Pamwenga kuti, “wakukunyengani.”
Pamwenga kuti, “ndi kukupaskani nthazi.”