2 Akorinto 7:1-16

  • Tijitowesi ku ukazuzi wewosi (1)

  • Paulo wakondwa chifukwa cha Akorinto (2-4)

  • Tito wakonkhoska nkhani yamampha (5-7)

  • Chitima chakukoliyana ndi khumbu laku Chiuta kweniso kulapa (8-16)

7  Mwaviyo akwanjiwa, pakuti te ndi malayizgu ngenanga, tiyeni tijitowesi ku chinthu chechosi chakukazuza liŵavu ndi mzimu, kuti tifiki pa kutowa chayiku tichiwopa Chiuta.  Tipaskeni malu mumitima yinu. Tanangiya munthu weyosi cha, tananga munthu weyosi cha ndipuso tagolore munthu weyosi cha.  Ndikamba vinthu venivi kuti ndikususkeni cha. Pakuti ndakambapu kali kuti yimwi mwe mumitima yidu kuti tifwiyi limoza ndipuso tijaliyi limoza amoyu.  Ndilongoro namwi mwawanangwa ukongwa. Ndimalika ukongwa chifukwa chaku yimwi. Ndapembuzgika ukongwa kweniso ndikondwa ukongwa mu masuzgu ngidu ngosi.  Ndipu tati tafika ku Makedoniya, maliŵavu ngidu ngangupumuwa cha,* kweni tingulutirizga kukumana ndi masuzgu mu nthowa zakupambanapambana, kubwalu kwidu kwenga kulimbana, mukati mwenga mantha.  Kweni Chiuta yo wapembuzga akusuzgika mumtima, watipembuzga chifukwa cha kuza kwaku Tito.  Tapembuzgika chifukwa cha kuza kwaki pe cha, kweni chifukwa so chakuti yimwi mungumupembuzga. Iyu wangutikonkhoske kuti mukhumbisiska kuzindiwona, mwe ndi chitima chikulu kweniso mutindiŵanaŵaniya.* Mwaviyo ndingukondwa ukongwa.  Pakuti chinanga kuti kalata yangu yingukuchitiskani chitima, ndidandawulapu cha. Ndipu chinanga kuti pakwamba ndingudandawula (ndati ndawona kuti kwa kanyengu kamanavi kalata yangu yingukuchitiskani chitima),  sonu ndikondwa, ndipu ndikondwa chifukwa chakuti munguchita chitima cha, kweni chifukwa chakuti chitima cho chingukuwovyani kuti mulapi. Pakuti munguchita chitima mwakukoliyana ndi khumbu laku Chiuta, mwakuti mukupwetekekapu cha chifukwa chaku isi. 10  Pakuti kuchita chitima mwakukoliyana ndi khumbu laku Chiuta kutovya kuti munthu walapi ndi kutaskika ndipu venivi vakudandawulisa cha. Kweni kuchita chitima mwakukoliyana ndi charu kulongozge ku nyifwa. 11  Wonani mo chitima chinu chakukoliyana ndi khumbu laku Chiuta chakuwovyiyani kuti muchitengi vinthu ndi mtima wosi! Chakuwovyani kuti mujitowesi, mutinkhengi viheni, muwopengi, mukhumbisiskengi ndi mtima wosi, muje aphamphu ndipuso munozgengi po panangika. Mu nthowa yeyosi, mwalongo kuti mwe akutowa* pa nkhani iyi. 12  Chinanga kuti ndingukulembiyani, kweni ndingulemba chifukwa cha munthu yo wangunanga cha pamwenga chifukwa cha ŵanthu wo wanguŵanangiya, kweni kuti phamphu linu kwaku isi liwoneke pa masu paku Chiuta. 13  Ndichu chifukwa chaki tapembuzgika. Kweni kusazgiyapu pa kupembuzgika kwidu, takondwa so ukongwa chifukwa chakuti Tito ngwakukondwa pakuti mosi mungusisipuwa mtima waki. 14  Pakuti asani ndingumumalikiya vakukwaskana ndi yimwi, ndikuti ndalengeseka cha. Kweni nge mo vinthu vosi vo tingukukambiyani vinguŵiya vauneneska, vo tingumalikiya navu Tito vasimikizika kuti vauneneska. 15  Ndipuso iyu watikuyanjani ukongwa wachikumbuka kuvwiya kwinu mosi, mo mungumulondere ndi mantha kweniso muchimbwambwanthiya. 16  Ndikondwa kuti mu nthowa yeyosi ndija ndi chigomezgu mwaku* yimwi.

Mazu Ngam'mphata

Mazu ngaki chayingu, “mnofu widu ungupumuwa cha.”
Mazu ngaki chayingu, “phamphu linu kwaku ini.”
Pamwenga kuti, “mwe ambula chifukwa.”
Panyaki kuti, “ndija ndi chiganga chifukwa chaku.”